No Panon so Pangigapo na Saray Panangiyaral ed Libron Ibabangat na Biblia

Dakel ed sikatayo so maliket a mangikondukta na panangiyaral na Biblia no makapangigapo itayo lambengat. Natulongan itayo na balon libro ya Anto so Peteg ya Ibabangat na Biblia? Say paunan salita ed pahina 3-7 so adesinyo pian nipaarap so unabung ed tongtongan ed Biblia ya usaren so publikasyon. Anggan saramay walaan na limitadon eksperiensya ed ministeryo so makaimanon mainomay itan ya usaren ed pangigapo na saray panangiyaral.

◼ Nayari yon salien iyan metodo ya usaren so pahina 3:

Kapamitla yo ed sakey a balita odino sakey a problema a kapapagaan na totoo ed teritorya yo, ipaarap so imano na unabung ed saray tepet a niprintan mabaltaw ed pahina 3, tan pakomentoan ed sikato. Insan ibukay ed pahina 4-5.

◼ Odino nayarin mas labay yon igapo diad pangipabitar ed saray pahina 4-5:

Nayari yon ibaga, “Agta alay abig no saray pananguman a nilitrato dia et aktual a nagawa?” Odino nayari yon itepet, “Dinan ed sarayan sipan so labay yon nanengneng a nagawa?” Ondengel a maong ed ebat.

No interesadon tuloy so akan-abung ed sakey a teksto, ipanengneng ed sikato no antoy ibabangat na Biblia ed satan a tema diad paningbat ed saray parapo ed libro a manisingbat ed satan a teksto. (Nengnengen so kahon ed sayan pahina na insert.) Singbaten so materyal a singa ed gagawaen yo sano mangiyaaral kayo na Biblia. Nagawaan la iya ed loob na limara anggad samploran minuto ed unonan dalaw diad mismon puerta.

◼ Say sananey nin metodo et ipaibesngaw ed too so nononoten to ya usaren so pahina 6:

Ipaimano ed unabung iray tepet diad leksab na pahina, insan itepet, “Naumameng yo ta la so nipaakar ed dinanman ed sarayan tepet?” No ibalikas toy interes ed sakey ed saray tepet, ibukay ed saray parapo ed libro a mangeebat ed tepet. (Nengnengen so kahon ed sayan pahina na insert.) Legan yon sisingbaten a dua so impormasyon, mangikokondukta kayo la na panangiyaral na Biblia.

◼ Nayarin usaren so pahina 7 pian itonton ed sakey a demostrasyon na panangiyaral na Biblia:

Basaen so unonan taloran estansa ed pahina, insan ibukay ed kapitulo 3 tan idemostra so panagaral ya usaren iray parapo 1-3. Iyuksoy so ipawil pian singbaten iray ebat ed saray tepet ed parapo 3.

◼ No Panon ya Iyuksoy so Ipawil:

Sano sasampotan la so primeron panagaral, iyuksoy so pangituloy ed tongtongan. Nayarin onia labat lay ibaga yo: “Diad pigaran minuto labat, naaralan ta no antoy ibabangat na Biblia nipaakar ed sakey ya importantin tema. No ontumbok, pantongtongan ta so [mangitilak na tepet a singbaten]. Nayarin onsamar ak dia no ontumbok a simba ed onia met lanlamang ya oras?”

Diad panasingger na aturon panaon nen Jehova, itutultuloy to itayon ipaparaan parad kimey natan. (Mat. 28:19, 20; 2 Tim. 3:17) Komon ta epektibo tayon usaren iyan alay abig a balon uusaren ed pangigapo na saray panangiyaral na Biblia.

[Kahon ed pahina 3]

Napantongtongan Iran Kasulatan ed pahina 4-5

◻ Apocalipsis 21:4 (p. 27-8, par. 1-3)

◻ Isaias 33:24; 35:5, 6 (p. 36, par. 22)

◻ Juan 5:28, 29 (p. 72-3, par. 17-19)

◻ Salmo 72:16 (p. 34, par. 19)

Saray Ebat ed Tepetepet ed Pahina 6

◻ Akin a maniirap itayo? (p. 108-9, par. 6-8)

◻ Panon tayon natalonaan iray pakakaaburidoan ed bilay? (p. 184-5, par. 1-3)

◻ Panon tayon napagmaliw a mas maliket so bilay na pamilya tayo? (p. 142, par. 20)

◻ Anto so nagawa ed sikatayo sano ompatey itayo? (p. 58-9, par. 5-6)

◻ Kasin napinengnengan tayo lamet iray inaatey lan inad-aro tayo? (p. 72-3, par. 17-19)

◻ Panon itayon makaseguro a sumpalen na Dios iray sipan to parad arapen? (p. 25, par. 17)