Kasin Makapangigapo Kay Panangiyaral na Biblia Legay Oktubre?

¹ Say opresi parad Oktubre et saray magasin a Panag-Bantayan tan Awake! Pian nabayuboan so interes, napapaseseg itayon mangiyopresi ed tract a Kasin Labay Mon Naamtaan so Katuaan? tekep na gagalan nigapo so panangiyaral na Biblia. Panon tayon nagawaan itan sano manggawa itayoy panagpawil?

² No Panon ya Usaren so Tract: Nayarian tayon ibaga: “Samay magasin ya inter ko’d sikayo et papasesegen toy amin a klase na totoo a mangusisa ed Biblia, antokaman so kultura tan relihyon da. [Iter ed unabung so tract a Naamtaan so Katuaan tan ipaimano iray tepet ed arap.] Niraya so pigaran makapainteres a tepet ya eebatan na Biblia. Kasin nitepet mo la iraya?” Kayari ton onebat, nengnengen yon dua no antoy ebat na tract ed sakey ed saray tepet to, tan basaen so sakey ed saray nisitan teksto. Insan yo ipaliwawa ed sikato a sakey labat iya ed dakerakel a bangat na Biblia, tan iyopresi ed sikato so libron Ibabangat na Biblia. Sarag tayo la’d satan ya igapon pantongtongan so unonan parapo na kapitulo ya apili to. Odino nayarian tayon ibukay ed pahina na libro a pakalmoan na kaaruman iran impormasyon nipaakar ed teman apantongtongan diad tract. Niraya so pigaran reperensya a sarag tayon usaren:

● Talaga kasin inaro itayo na Dios?

(p. 9-11, par. 6-10)

● Manampot ni kasi guerra tan paniirap?

(p. 12, par. 12-13)

● Anto so nagawa ed sikatayo sano ompatey itayo?

(p. 59-61, par. 7-8)

● Wala ta so ilalo na saray inaatey?

(p. 71, par. 13-15)

● Panoy dugan pampikasik pian dengelen ak na Dios?

(p. 166-167, par. 5-8)

● Panon ak a magmaliw a maliket?

(p. 9, par. 4-5)

³ Siempre, no ag-iyabuloy na saray sirkumstansya so pakapangigapo tan pangidemostra ed panagaral na libron Ibabangat na Biblia diad unonan impawil, sarag tayon iyuksoy so ipawil lamet pian ituloy so tongtongan. Tan depende ed interes na unabung, nayarian tayo met a konsideraen so arum niran tepet ed tract diad pigaran ipawil tayo antis ya ipresenta so libro. Komon ta epektibo tayon usaren iyan mausa-usar a tract legan na Oktubre pian makapangigapoy panangiyaral na Biblia tan natulongan iray matuan impanpuson totoo a ‘naamtaan so katuaan.’​—Juan 8:31, 32.

[Tepetepet Parad Panagaral]

1. Anto so opresi ed Oktubre?

2. Panon tayon usaren so tract a Naamtaan so Katuaan pian nigapo so panangiyaral na Biblia sano pawilen iramay angawat na magasin?

3. Panon tayon itukoy so presentasyon tayo base ed saray sirkumstansya?