Ipatnag so Personal ya Interes—Panamegley na Matukoy a Pimataan
1 Sano mantatasi ed publiko tan ed kabkaabungan, mabetbet ya onnengneng tayo nin unona ed mata na totoo sakbay itayon onggapon mansalita. Diad satan a maganon bekta, nayarin nalikas tayo ed ipapatnag na lupa ra no anto so liknaan da nipaakar ed inyakar tayo ed sikara tan no antoy disposisyon da. Ontan met, dakel so natebek da ed sikatayo. Onia so inkuan na sakey a bii nipaakar ed imbisita na sakey a Tasi: “Say nanonotan ko ed maimis a lupa to et say inkakalmado to. Nainteresan ak.” Saya so sengegan na indengel na bii ed maong a balita.
2 Say pimataan ed arum et epektibon paraan pian nigapo so pantasi sano manpupulong diad karsada odino diad arum niran publikon pasen. Sakey ya agin laki so onnenengneng ed mata na saramay aasinggeran to. Sano mimataan, sikatoy onimis insan to iparungtal iray magasin. Diad panggagawa ed sayan metodo, panliliketan toy dakel a maabig iran pitotongtong tan makapangipapalima na dakel a literatura.
3 Tebeken so Liknaan na Arum: Say pamasiansia ed pimataan so ontulong ed sikatayon natebek so liknaan na arum. Alimbawa, no ag-itayo natalosan na sakey odino agmipakna ed bengatlan imbaga tayo, kaslakan et ompatnag itan ed lupa to. No sikatoy okupado odino naaalipanesan la, nalikas tayo itan diad pangobserba ed ipapatnag na lupa to. Diad ontan et nauman tayo odino napatikeyan tayoy panangipresenta tayo. Say pagmaliw a malikas ed liknaan na arum et maabig a paraan pian nipatnag tayoy personal ya interes tayo ed sikara.
4 Inkasimoon tan Kombiksion: Diad dakel a kultura, say pimataan ed too et ipapasen a pakapatnagan na inkasimoon na sakey. Imanoen no anto so reaksion nen Jesus sanen intepet na saray babangatan to: “Siopa sirin so nayari a nilaban?” Inkuan na Biblia: “Sanen ninengneng to ra inkuan to’d sikara, Diad saray totoo agnayari so saya; balet diad Dios ami’ bengabengatla nayari.” (Mat. 19:25, 26) Segurado a say kombiksion ed mata nen Jesus so nampagmaliw a lalon makakombinse iray salita to. Diad mipadparan paraan, say pamasiansia ed matukoy a pimataan so ontulong ed sikatayon ipasabi so mensahe na Panarian tekep na inkasimoon tan kombiksion.—2 Cor. 2:17; 1 Tes. 1:5.