Aligen so ‘Maliket a Dios’ Tayon si Jehova
1 Talagan labay nen Jehova a manliket so totoo. Ipapaamta ed sikatayo na Salita to tekep na panilalo so alay abig iran bendisyon ya imparaan to parad katooan. (Isa. 65:21-25) Nepeg a napatnagan na arum a panliliketan tayo so panginanabang ed sikara na “ebanghelyo na gloria na bendito [“maliket,” NW] a Dios.” (1 Tim. 1:11) Say pangitotongtong tayo ed mensahe na Panarian so nepeg a pakapatnagan na panangaro tayo ed katuaan tan say puron interes tayo ed totoon kakatongtongen tayo.—Roma 1:14-16.
2 Tua, mairap no maminsan so pamasiansia ed maliket ya awawey. Diad arum a teritorya, daiset so naromog tayon interesado ed mensahe na Panarian. Wala met iray panaon ya aarapen tayo iray mairap a kipapasen ed mismon bilay tayo. Pian napansiansia tayo so magayagan awawey, nepeg tayon nodnonoten ya importantin narengelan tan natalosan na totoo ed teritorya tayo so maong a balita na Panarian ya ipupulong tayo. (Roma 10:13, 14, 17) No dalepdepen tayo itan, sikatayo so makapantultuloy ed maliket a panangipakabat ed mapangasi iran probisyon nen Jehova parad kilalaban.
3 Iyapasakey ed Positibo Iran Bengatla: Nakaukolan tayo met ya imanoen so ibabaga tayo. Anggaman nayarin igapo tayo so tongtongan diad panalambit ed sakey a problema odino balita a walad kanonotan na totoo, nepeg ya agtayo iyaapasakey ed negatibo iran bengatla. Say kimey tayo et say pangipakabat ed “saray maong a balita na kaabigan.” (Isa. 52:7; Roma 10:15) Sayan maong a balita et sakey a mensahe a nibase ed saray sipan na Dios nipaakar ed masnag ya arapen. (2 Ped. 3:13) Sinononot ed satan, usaren tayo iray Kasulatan a “mamedber ed puso a maermen.” (Isa. 61:1, 2) Saya so ontulong ed kada sakey ed sikatayo pian napansiansia so maliket ya awawey tan positibon ugali.
4 Seguradon naimano na totoo so maliket ya awawey tayo legan a mibibiang itayo ed panagpulong a kimey. Kanian, naynay tayo sirin ya ipatnag so awawey na ‘maliket a Dios’ tayon Jehova legan ya inanabang tayo so maong a balita na Panarian ed saray totoo diad teritorya tayo.