Ipulong Tayo so Maong a Balita
1 Alay abig a pribilihyo tayo so pagmaliw a manangakbibit na “magayaga a balita na saray maong a bengatla!” (Roma 10:15) Walaan itayo na makarepreskon mensahe ya inabang ed totoo ya aliktob na kaguloan tan inkaandi-ilalo. Panon tayo iran natulongan a natalosan dan say iyoopresi tayo et “maong a balita na kaabigan”?—Isa. 52:7.
2 Mangiparaan na Positibon Mensahe: Say pitotongtong tayo ed ministeryo so nawalaan na maabig ya epekto no iyapasakey tayo ed makapabiskeg iran bengatla. Sirin, sano iparaan tayoy presentasyon tan repasoen tayo so publikasyon ya iyopresi tayo, kaukolan tayon ipabitar iray positibon aspekto na mensahe. Diad pangipasabi ed nibase’d Biblia ya ilalo tayo tekep na talek tan ligsa, nailaloan tayoy makapaseseg iran resulta.—Uli. 25:11.
3 Anggaman mililikna itayo sano ibalikas na totoo so kaaapektoan da ed iyuuges na kipapasen na mundo, kaukolan tayon ipabitar ed sikara no antoy peteg a solusyon ed saray problema na too, say Panarian na Dios. Anggan sano itongtong tayo so onsasabin “agew na kababales” nen Jehova, labay tayon ipalinew a saya so peteg a mankabaliksan na “maong a balita ed saray mauyamo.” (Isa. 61:1, 2) Napaseguroan tayo iray ondengel ed sikatayo ya amin a gawaen nen Jehova so diad kaunoran et mangitarok na pirmin liket tan sankaabigan a posiblin pansumpalan.
4 Ipresenta so Katuaan Tekep na Peteg a Gayaga: Sano naimano na totoo so magayagan itsura tayo tan marakep a tono na bosis, sikaray ontalineng a maong. No ipatnag tayo so positibon panmoria, natebek na saray katongtong tayo a sikatayoy ‘maliket ed ilalo.’ (Roma 12:12) Diad ontan, sikaray lalon onkiling ya onkiwas unong ed maong a balita. Seguradon walaan itayo na maabig a rason a lawas ipatnag so positibo tan magayagan awawey ed amin ya aspekto na ministeryo tayo.
5 Bilang ministro na maong a balita, aliwa labat lan basta mangipaamta na mensahe so gawaen tayo. Say panagpulong tayo so mangipapasabi na seguradon ilalo parad magmaong a bilay natan tan diad arapen. (1 Tim. 4:8) Diad iyasingger tayo ed kada too, say positibon kanonotan tayo so nipatnag ed say ibaga tayo tan makatulong itan ed totoo pian awaten da so maong a balita. Diad panimano ed no antoy ibaga tayo tan panoy pangibaga tayo, sagyaten tayo komon iray matuan-impanpuso ya abrasaen da so makapaliket a maong a balita ya ipupulong tayo!