Dinan a Medikal a Paraan so Sankaabigan a Parad Sikatayo?
“Diad tua, say pasyente ya angawat ed panagtambal ya ag-uusaran na dala et nibagan sikato so akaawat na sankaabigan lan paraan na operasyon.” Ontan so imbaga nen Dr. Michael Rose, sakey a direktor ed medisina tan anesthesiologist. Antoran paraan na panagtambal tan kasalat ed panagpasaksak na dala so nayarin kabiangan ed “panagtambal ya ag-uusaran na dala”? Saraya so kaukolan yon amtaen ta pian walaan kayo na pikakabat sano mandesisyon kayo nipaakar ed pampatambal tan pampaopera yo. Bantayan so video a No Blood—Medicine Meets the Challenge. Kayari yon manbantay, suboken yo no atalosan yo itan diad panamegley na saray onggendan a tepet.—Paimano: Lapud nanengneng ed video iray antikey ya eksena ed panag-opera, nepeg a maalwar ya igiya na atateng so angkekelag nin anak da sano kaiba da iran manbabantay.
(1) Anto so manunan rason no akin ya agmanpapasaksak na dala iray Tasi nen Jehova? (2) Nipaakar ed panangasikaso ed medikal, anto so labay na saray Tasi nen Jehova? (3) Anto so manunan kanepegan na saray pasyente? (4) Akin a say pamili ed saray kasalat ed panagpasaksak na dala so mangipatnag a sikatayoy makatunongan tan responsable? (5) Sano grabe so pamparala na pasyente, anto so duaran manunan paraan a gawaen a tampol na saray doktor? (6) Anto so apatiran prinsipyo ed pangusar na saray kasalat ed panagpasaksak na dala? (7) Anto so nayarin gawaen na saray doktor pian (a) naamper so ipaway na dakel a dala, (b) agnaperdi iray ambalangan selula na dala, (c) naparakel so dala, tan (d) nisalba da so pinmaway a dala? (8) Deskribien iray paraan a tatawagen a (a) hemodilution tan (b) cell salvage. (9) Anto so nepeg yon naamtaan nipaakar ed antokaman a kasalat ed panagpasaksak na dala? (10) Nagawaan kasi iray kritikal tan komplikadon operasyon anggan agla saksakan na dala so pasyente? (11) Antoran makagunggonan paraan tan kagawaan ed panagtambal so napapawala diad lawak na medisina?
Say pangawat ed arum ed saray paraan na panagtambal a nipanengneng ed video et personal a desisyon unong ed nipasal-ed-Biblia a konsiensia na balang sakey. Kasin akapampili kayo la no dinan ed saray kasalat ed panagpasaksak na dala so mabulos yon awaten parad sikayo tan parad ananak yo? Nepeg yo met ya ipaamtan maong ed saray aliwan Tasin kapamilyaan yo iray desisyon yo tan no antoray rason ed saratan.—Nengnengen so “Tepetepet na Saray Managbasa” diad Hunyo 15, 2004, tan Oktubre 15, 2000, a paway na Say Panag-Bantayan.