Amta Yo ta no Antoray Napampilian Yo?

Diad interon mundo et ondarakel iray hospital a manggagawa na panag-opera ya ag-uusaran na dala. Amta yo ta, tan natatalosan yo iray napampilian yo ed saray panagtambal ya ag-uusaran na dala? Nepeg yon naamtaan iratan pian makapandesisyon kayon maong nipaakar ed saray medikal a panagpatambal tan panagpa-opera. Bantayan so video a No Blood​—Medicine Meets the Challenge. Insan ipikasi tan repasoen so naaralan yo diad tulong na saray tepet ed leksab.​—Imanoen: Lapud walaray antikey ya eksena na panag-opera diad sayan video, nepeg a nonoten a maong na atateng no ipila daray ugugaw nin anak da ed pambantay.

(1) Anto so manunan rason no akin ya agmanpapasaksak na dala iray Tasi nen Jehova? (2) No nipaakar ed panagpatambal, anto so pilalek na saray Tasi nen Jehova? (3) Anto so manunan kanepegan na saray pasyente? (4) Akin a say pamili ed kasandi na panagpasaksak na dala et sakey a desisyon a makatunongan tan makabat? (5) Sano nagawa so pirmin pamparala, anton duaran manunan paraan so nagawaan a tampol na saray doktor? (6) Anto so apatiran prinsipyo na saray kasandi na panagpasaksak na dala? (7) Anto so nayarin gawaen na saray doktor pian (a) naamper so pirmin pamparala, (b) napansiansia iray ambalangan selula na dala, (c) napapeles so idakel na dala, tan (d) nisalba so pinmaway a dala? (8) Deskribien iray metodo a (a) hemodilution tan (b) cell salvage. (9) Anto so nepeg yon naamtaan nipaakar ed antokaman a kasandi na panagpasaksak na dala? (10) Nagawaan kasi iray kritikal tan komplikadon panag-opera anggan agmanpasaksak na dala? (11) Anton positibon bengatla so nagagawa la natan nipaakar ed medikal a panagtambal?

Balang sakey so mandesisyon parad inkasikaton dili base’d nipasal-ed-Biblian konsiensia to, no awaten to odino andi so pigara ed saray panagtambal a nipanengneng ed video. Akapandesisyon kayo la kasi no dinan iran medikal a panagtambal tan metodo so labay yon usaren ed sikayo tan ed angkelag nin anak yo tan asulatan yo la kasi tan apirmaan so DPA kard yo? Parad kompleton impaningbat ed sarayan pamaakaran, repasoen a maong so “Tepetepet Manlapud Saray Managbasa” a walad Hunyo 15, 2004, tan Oktubre 15, 2000 ya isyu na Say Panag-Bantayan. Insan yo usaren so tsart diad insert na Enero 2007 ya isyu na Ministeryo Tayo ed Panarian, “Panon Kon Moriaen Iray Angkekelag a Kabiangan na Dala tan Saray Medikal a Paraan na Panagtambal ya Usaren so Mismon Dalak?” diad pandesisyon yo parad inkasikayon dili no dinan iray awaten yo tan agyo awaten. Kayari to, seguro yon nisulat yo ed DPA kard yo no anto iramay mismon apili yo. Nepeg a saray desisyon yo et naamtaan tan natalosan na saray apili yon manangilaman tan siopaman a kapamilya yon aliwan Tasi.