Kasin Ipapaleen Yo?
Ipapaleen so anto? Pansulat ed DPA (durable power of attorney) card a nitarya parad bautismado iran Tasi. Lapud “agyo amta so onsabi nabuas,” importante a masakbay yo lan desidien tan isulat no antoran panagtambal tan paraan so awaten yo no walay emerhensia. (Sant. 4:14; Gawa 15:28, 29) Pian tulongan kayo, pinawala so video a Transfusion-Alternative Health Care—Meeting Patient Needs and Rights. Bantayan itan, insan repasoen a tekepan na pikakasi no antoy naaralan yo diad tulong na saray tepet a nidatak ed leksab.—Paimano: Lapud nanengneng ed video so antikey iran eksena ed panag-opera, nepeg a maalwar iray atateng sano babantayan da so video a kaiba iray ugugaw nin ananak da.
(1) Akin ya uusisaen lamet na arum a doktor tan propesyonal ed medikal so panagpasaksak na dala? (2) Mangiter na taloran alimbawa na komplikado iran panag-opera ya agawaan anggan ag-inusaran na dala. (3) Kaunongan karakel a doktor tan manag-opera ed sankamundoan so malabay a manambal tan mangopera ed saray pasyente ya agmanguusar na dala? Akin a labay dan gawaen itan? (4) Anto so ipaparungtal na agano nin impanaral na saray ospital nipaakar ed panangusar na dala? (5) Antoray medikal a kapeligroan a mikonektaan ed panagpasaksak na dala? (6) Anto so konklusyon na dakel ya eksperto nipaakar ed saray gunggona ed pangusar na saray alternatibo? (7) Antoy sengegan na anemia? Anggad iner so nayarin pangitepel na totoo ed satan? Antoy remedyo ed satan? (8) Panon a napapeles so idakel na ambalangan-selula ed laman na pasyente? (9) Antoran metodo so uusaren pian naparaisetan so pamparala legan na operasyon? (10) Kasin epektibo so pangusar ed saray alternatibo ed saray ugugaw nin ananak odino ed totoo a nalalanor ed emerhensia a kapepeligroay bilay? (11) Anto so sakey ed saray manunan prinsipyo ed moral na maong a medikal a panangasikaso? (12) Akin ya importante parad saray Kristiano so masakbay lan pandeside no dinan iran alternatibo so awaten da? Panon tayo iyan nagawaan?
Say pangawat ed pigaran panagtambal a niparungtal ed video et sakey a personal a desisyon base’d nipasal ed Biblia a konsiensia na balang sakey. Kasin denesidi yo la no dinan iran panagtambal tan paraan so mabulos yon awaten parad inkasikayo tan ed ananak yo? Parad mas malaknab ya impaningbat ed sarayan pamaakaran, nengnengen so “Tepetepet Manlapud Saray Managbasa” ed Hunyo 15, 2004, tan Oktubre 15, 2000, iran paway na Say Panag-Bantayan tan insert a “Panon Kon Moriaen Iray Angkekelag a Kabiangan na Dala tan Saray Medikal a Paraan na Panagtambal ya Usaren so Mismon Dalak?” ed Enero 2007 ya isyu na Ministeryo Tayo ed Panarian. Nepeg ya ipaamta yo iray desisyon yo ed saray pinili yon manangilaman ed panagpatambal tan ed siopaman ya aliwan Tasi iran membro na pamilya yo.