Kasin Ipapaleen Yo?
Ipapaleen so anto? Say pansulat ed DPA (durable power of attorney) card a parad bautismado iran Tasi. Lapud “agyo amta no antoy nagawa ed bilay yo nabuas,” importante a masakbay yo lan desidien tan isulat no antoran paraan na panagtambal tan panag-opera so awaten yo no walay emerhensia. (Sant. 4:14; Gawa 15:28, 29) Pian natulongan kayo ed saya, pinawala so video a Transfusion-Alternative Health Care—Meeting Patient Needs and Rights. Bantayan yo itan, insan tekep na pikakasi et repasoen no antoy naaralan yo diad tulong na sarayan tepet.
(1) Akin ya uusisaen lamet na arum a doktor tan propesyonal ed medikal so panagpasaksak na dala? (2) Mangiter na taloran alimbawa na komplikadon operasyon ya agawaan anggan ag-inusaran na dala. (3) Akin et dakel a doktor tan manag-opera ed sankamundoan so malabay a manambal tan mangopera ya agmanguusar na dala ed saray pasyente? (4) Anto so ipapanengneng na agano nin impansuri ed saray ospital nipaakar ed panangusar na dala? (5) Antoray medikal a kapeligroan a mikonektaan ed panagpasaksak na dala? (6) Anto so konklusyon na dakel ya eksperto nipaakar ed saray gunggona ed pangusar na saray alternatibo? (7) Antoy sengegan na anemia? Anggad iner a sarag itan a labanan na laman na too? Antoy remedyo ed satan? (8) Panon a napapeles so idakel na ambalangan-selula ed laman na pasyente? (9) Antoran metodo so uusaren pian naparaisetan so pamparala legan na operasyon? (10) Akin et importante parad saray Kristiano ya antis ni na emerhensia odino operasyon et akapandesisyon la ra no dinan iran alternatibo so awaten da? Panon tayon nagawaan itan?
Say pangawat ed pigaran panagtambal a nipanengneng ed video et personal a desisyon, a base’d nipasal ed Biblia a konsiensia na balang sakey. Kasin akapandesisyon kayo la no dinan iran paraan na panagtambal tan panag-opera so awaten yo parad sarili yo tan ed ananak yo? Kasin insulat yo la iratan ed DPA card? Parad mas malaknab ya impaningbat ed sarayan pamaakaran, repasoen a maong so kapitulo 7 na libron “Panangaro na Dios” tan saray reperensyan sinalambit ditan. Nengnengen met so insert a “Panon Kon Moriaen Iray Angkekelag a Kabiangan na Dala tan Saray Medikal a Paraan na Panagtambal ya Usaren so Mismon Dalak?” ed Enero 2007 ya isyu na Ministeryo Tayo ed Panarian. Kaunoran, seguroen a suston nisulat yo iray desisyon yo diad DPA card yo. Nepeg yon ipaamta iratan ed saray pinili yon manangilaman ed panagpatambal (health-care agent) tan ed siopaman a membro na pamilya yo ya aliwan Tasi.
[Litrato ed pahina 2]
• Kasin akapandesisyon kayo la no dinan iran paraan na panagtambal tan panag-opera so awaten yo parad sarili yo tan ed ananak yo?
• Kasin awi-awit yon lanang so akompleto lan DPA card yo parad emerhensia?