Nagunggonaan Manlapud Video a No Blood​—Medicine Meets the Challenge

Panon kalaknab so pikakabat yo ed saray napanpilian a panagtambal ya ag-uusaray dala? Kasin natatalosan yo no antoray pigaran kasandi ed panagpasaksak na dala tan no panon iratan ya uusaren? Bantayan iyan video, tan suboken so pikakabat yo ed onggendan iran tepet.​—Paimano: Lapud nabantayan ed video so antikey iran eksena ed panag-opera, nepeg a tebeken na atateng no kasin pabantayan da itan ed angkelag niran ananak da.

(1) Anto so manunan rason no akin ya agmanpapasaksak na dala iray Tasi nen Jehova, tan iner ed Biblia so pakaromogan ed satan a prinsipyo? (2) No nipaakar ed panagpatambal, anto so pilalek tayo? (3) Anto so manunan kanepegan na sakey a pasyente? (4) Akin a makatunongan tan responsable so pangipulisay ed panagpasaksak na dala? (5) Sano nagawa so pirmin pamparala, anto so duaran maganat a prayuridad a gawaen na saray doktor? (6) Anto iray kapeligroan ed bunigas a naala ed panagpasaksak na dala? (7) Anto so pigaran kagawaan a nausar na saray doktor pian naparaisetan so pamparala legan na operasyon? (8) Anto so nepeg yo nin amtaen no nipaakar ed dinanman ya isuheri a kasandi ed panagpasaksak? (9) Kasin nagawaan so seryoso tan komplikadon pan-opera ya ag-usaran na dala? (10) Anto so mabulos a gawaen na ondarakel a bilang na saray doktor parad saray Tasi nen Jehova, tan anto so nayarin magmaliw lan estandarte ed kaunoran parad amin a pasyente?

Say pangawat ed dinanman ed panagtambal a niparungtal ed video et desisyon na sinansakey base ed konsiensia to.​—Nengnengen so Hunyo 15, 2004, a Panag-Bantayan, p. 22-4, 29-31, tan Oktubre 15, 2000, a Panag-Bantayan, p. 30-1.