Dayewen si Jehova Bilang Pamilya
1 Diad panaon na Biblia, saray sankapamilyaan so mankakaiban nanggawa na dakel a bengatla. Ginawa da iray inagew-agew a kimey tan sankaimportantian ed amin et dinayew da si Jehova bilang pamilya. (Lev. 10:12-14; Deu. 31:12) Natan, diad dakel a pasen, saray sankapamilyaan so mataltalag a maniiban manggawa na saray kimey. Anggaman ontan, bibidbiren na saray Kristiano so kablian na pibiang ed saray aktibidad bilang pamilya, nagkalalo la no nipaakar ed panagdayew. Agaylan makapaliket ed Angigapo na pamilya so pakaimano to ed saray sankapamilyaan a nankakasakey a mangidadayew ed sikato!
2 Maniiban Manpulong: Say paniiban pangipulong ed maong a balita so mamaelet ed pankakasakey na pamilya. Kanian, niarum ni ed piulop ed arum a membro na kongregasyon ed panagpulong, say sakey a matatken so regular met a miuulop ed asawa tan ananak to. (1 Tim. 3:4, 5) Anggaman napno so eskedyul na saray ombiabiahen manangasikaso, siansian niyuuksoy da so piulop ed kaasawaan da diad ministeryo.
3 Saray atateng a manguulop ed ananak da ed panagpulong so ontulong ed ananak dan onaligwas bilang manag-ebanghelyo. Aglabat naoobserbaan na ananak so liket tan inkapnek na atateng da ed ministeryo noag ingen et naiimano da met iray atateng da a mangipapatnag na mismon panangaro ra ed si Jehova tan ed kaparan totoo. (Deu. 6:5-7) Say kaimportantian na saya so mantultuloy legan ya ombabaleg so ananak. Sakey a sanasawa a walaan na taloran ananak a mantaon na 15 anggad 21 so siansian manguulop ed sikara ed ministeryo a regular. Inkuan na ama: “Mabetbet mi iran babangatan. Tan seseguroen min makapaliket tan makapaseseg itan ya eksperiensya.”
4 Maniiban Manparaan: Naimano na saray pamilya a makagunggona so paniiban pamparaan ed ministeryo. Mabetbet a panliliketan na ananak so panaon na antikey iran panagpasal kaiba iray membro na pamilya a mansusublayan a mangiter na presentasyon odino onakto bilang unabung. Arum so manguusar na pigaran minuto diad sampot na panagaral na pamilya pian manpasal.
5 Lalo itayon naliketan sano mibiang itayo ed importanti tan makapenek iran kimey kaiba iray inad-aro tayo. Agaylan makapaliket parad saray sankapamilyaan a manuulop ed panagkabkaabungan a kimey ontan met ed saray panagpawil tan panangiyaral na Biblia! Legan yon dadayewen si Jehova kaibay pamilya yo, maliket yon niyabawag: “Nipaakar ed siak tan say abung ko, manlingkor kami ed si Jehova.”—Jos. 24:15.