Tepet

◼ Kasin matukoy ed saray dumerengel so pantipak kayari na kada parte ed Teokratikon Eskuelaan Parad Ministeryo tan Pantitipon Parad Panagserbi?

Sanen inletneg na Manamalsa a si Jehova so dalin, “saray bitewen ed kabuasan nankanta ra a bansag, tan amin iray anak na Dios inmeyag ira lapu ed liket.” (Job 38:7) Pinilalek na sarayan anghel ya ananak na Dios ya idayew si Jehova lapud matalonggaring ya impamalsa to, a saman so balon pakapatnagan na kakabatan, kaabigan, tan pakapanyari to.

Maabig so pangibalikas tayo na impapuson apresasyon ed saray sagpot na agagi tayo tan ed paliwawa odino demostrasyon ya imparungtal da. Alimbawa, kaslakan et titipakan tayo iray paliwawa tan presentasyon diad espisyal iran pantitipon, a singa saray asamblea tan kombension. Mas baleg a panaon tan sagpot so inusar ed impangiparaan ed sarayan parte. Say pantipak tayo et panangipatnag na apresasyon tayo ed aliwa labat lan impasyan kimey na espiker noag ontan met ed instruksion ya itatarya nen Jehova panamegley na Salita tan organisasyon to.​—Isa. 48:17; Mat. 24:45-47.

Komusta met so pantipak sano impresenta iray betang ed Teokratikon Eskuelaan Parad Ministeryo tan ed Pantitipon Parad Panagserbi? Anggapo iray totontonen a manesebel ed pantipak no satan et natural a balikas na apresasyon, a singa sano agawaan na sakey ya estudyante so unonan betang to ed Teokratikon eskuelaan. Balet, say pantipak et magmainomay a magmaliw a rotina labat la a naandi lay gagala na satan. Kanian, kaslakan et agtayo titipakan so kada presentasyon.

Anggaman agtayo titipakan so kaslakan a betang ed Teokratikon Eskuelaan Parad Ministeryo tan Pantitipon Parad Panagserbi, walaray arum a paraan a nibalikas tayon amin so apresasyon tayo ed instruksion tan ed impansagpot na saramay mangipresenta ed saray parte. Nagawaan tayo iya diad pansiansian italineng a maong ed saray espiker. Tan kayari na pantitipon, sarag tayo ran pisalamatan ed impansagpot da.​—Efe. 1:15, 16.