Importante so Personal tan Pampamilyan Panagaral!
1. Anto so nagkalalo lan sankanonot na Mananguley ya Ulop ed sikatayo ed sayan panaon, tan akin ya ontan?
1 Singa nen inmunan siglo, nagkalalo lan sankanonot na Mananguley ya Ulop so pankaabigan na totoo nen Jehova. (Gawa 15:6, 28) Legan a manasingger so baleg a kairapan, importante ya amin a manangipalapag na Panarian et walaan na malet a relasyon ed si Jehova. Panon yon usaren so panaon yo a datin nigana parad Panagaral na Kongregasyon ed Libro? Amin so napapaseseg a mangusar ed sayan panaon parad panagdayew na pamilya. Say makabat a pangusar ed sayan panaon so mangiyabuloy ed sikatayon aralen a maalwar so impuyan a Salita na Dios tan onasol na manangiter na bilay a danum.—Sal. 1:1-3; Roma 11:33, 34.
2. Panon a niyuksoy so labi a panagdayew na pamilya tayo?
2 Labi a Panagdayew na Pamilya: Saray ulo na pamilya so papasesegen a manakbat ed responsabilidad da ed imaton nen Jehova pian seguroen a natutumbok so makabaliksan tan regular a programa parad pampamilyan panagaral na Biblia. (Deu. 6:6, 7) Saray walad kasuloan ya agagin lalaki tan bibii ya andian na responsabilidad ed pamilya so nayarin mangusar ed sayan panaon parad personal a panagaral na Biblia tan panagsukimat. Importante parad amin tayo so ‘panganamot ed panaon’ parad panagaral tan panagdalepdep ta pian napansiansia so espiritual a biskeg a nakaukolan ed sarayan ‘mauges ya agew.’—Efe. 5:15, 16.
3, 4. Antoray isusuherin usaren tayon materyal, tan ed anton gagala?
3 No Anto so Ikonsidera: Say Watch Tower Publications Index odino Watchtower Library ed CD-ROM so makatulong ed sikayo pian naromog so impormasyon ya ontulong ed pamilya yo pian panliketan so panagaral na Biblia. Saray pamilya so nayarin mangikonsidera ed saray artikulo manlapud Say Panag-Bantayan, a singa say regular a kabiangan a “No Panon a Magmaliw a Maliket so Pamilya,” “Ibangat Yo Iray Anak Yo,” tan “Parad Saray Kalangweran.” Ontan met, say Awake! so walaan na “Young People Ask” a serye tan makapaliket iran artikulo nipaakar ed pankelawan a palsa.
4 Say agmanaapuran panagbasa na Biblia so mangipaslep na maridios a prinsipyo tan leksion ed kanonotan tan kapusoan na amin a pamilya. (Heb. 4:12) Diad arum a pankanawnawa, nayarin manbantay tan pantongtongan so sakey ed saray video a pinawala na organisasyon. Saraya so dakel a pankanawnawa parad mapamaraan a panagaral. Akin ya agtepetan iray membro na pamilya yo no antoy labalabay da?
5. Akin ya importante ed bilay tayo natan so personal tan pampamilyan panagaral na Biblia?
5 No Akin ya Importante Natan: Say pamabiskeg ed espiritualidad tayo so mangiparaan ed sikatayon “ontalindeg a mapekder tan nengnengen so panangiliktar nen Jehova.” (Exo. 14:13, NW) Saray atateng so mankaukolan na panangiwanwan na Dios parad pamabaleg ed ananak da diad “pegley na sakey a pikewet tan maramsak a kailalakan.” (Fil. 2:15) Kaukolan na ananak so tulong pian natalonaan so iyaabeba na moral ed eskuelaan natan. (Uli. 22:3, 6) Saray sanasawa so mamabiskeg met ed “tinalo a lubir” na panamaley da kaiba si Jehova. (Ecl. 4:12) Kanian, makabat tayo sirin ya usaren so nakekeran panaon pian pabiskegen so inkasikatayo diad “sankasantosan a pananisia”!—Jud. 20.