Tepetepet

◼ Antoray praktikal a paraan a natulongan tayo ray payunir?

Nen 2009 ya serbisyon taon, ngalngali 800,000 ya agagi so nanlingkor bilang regular tan espisyal payunir. Uusaren na sarayan sigpot-panaon ya lingkor so “manunaan a bunga” na panaon, biskeg, tan materyal a kaykayarian da pian nikayat so maong a balita na Panarian. (Uli. 3:9) Seguradon naliliketan si Jehova ed saray sagpot da! Diad antoran paraan ya naalig tayoy Jehova ed saya, diad ontan et mansiansian maliket iray payunir tan makapantultuloy ira’d serbisyo ra?

Panamegley na saray makapabiskeg ya salita et napaseseg tayo iran mantultuloy ed panagpayunir. (Uli. 25:11) Sarag tayo kasin i-adjust so eskedyul tayo pian nakaiba tayo ira’d ministeryo? No mankimey tayo’d ministeryo a kaiba ira, ompan sarag ton say luganan tayo so usaren imbes ya say luganan da. Tan no milugan tayo’d sikara, nayarin mangiter tayoy kontribusyon pian makatulong tayo’d gastos da. (1 Cor. 13:5; Fil. 2:4) Nipanengneng tayo met so maaron suporta diad pamarawes ed sikara, ya no maminsan et imbitaan tayo iran mangan ed abung tayo.​—1 Ped. 4:8, 9.

Ipapaseguro na Kasulatan ya itarya nen Jehova iray pankaukolan na saramay iyuuna day Panarian. (Sal. 37:25; Mat. 6:33) Say sakey ya paraan a gagawaen iya nen Jehova et diad panamegley na saray maaron agagi tayo. (1 Juan 3:16-18) Siempre, ag-iilaloan na saray payunir a suportaan ira na arum ed saray pankaukolan da’d pinansyal. Tan ompan ambaing iran mangibaga sano walay pankaukolan da. Anggaman ontan, diad praktikal iran paraan et sarag tayon tulongan iray matoor ya payunir tan ‘nasapotan iray kulang da’ no maobserba tan malikas itayo.​—2 Cor. 8:14, 15.

Si Febe et maseseg ya ebanghelisador ed kongregasyon na Cencrea nen inmunan siglo. Sanen sikatoy linma’d Roma, oniay impaseseg nen Pablo ed saray agagi diman: “Sikatoy awaten yo ed Katawan diad paraan a manepeg ed saray masanto, tan sikatoy tulongan yo diad antokaman a nakaukolan to.” (Roma 16:1, 2) Wala met so pankanawnawa tayon ipanengneng so ontan ya maaron suporta ed saray regular tan espisyal payunir ed kongregasyon tayo ya ag-ontutundan mangiyaabawag ed maong a balita.​—Gawa 5:42.