Ipapatnag Da so Alimbawa na Katooran
1 Ginmapo ed taon 1954 so balon aspekto na sigpot-panaon a serbisyo diad Pilipinas, salanti, say panag-espisyal payunir. Saray makayarin lalaki tan bibii, ya eksperiensyado ed Makristianon ministeryo, so mabulos ya angawat ed saray asainmin a manlingkor ed inerman a pangibakian na organisasyon. Kayari na pigaran dekada, saray espisyal payunir natan so mantutultuloy nin mangipapatnag na alimbawa na katooran a manepeg tayon aligen.—Heb. 6:12.
2 Angidaulo Ira: Manlapu la’d gapo, indaulo na saray espisyal payunir so panagpulong diad saray teritoryan anggapo so Tasi, nagkalalo la diad saray Isla na Visayas tan Mindanao. Pinawil dan amin so interesado insan inyaralan da ira na Biblia. Bilang resulta na maseet iran sagpot da, aporma so dakel a balon kongregasyon. Lapud maseseg a panag-ebanghelyo ra, importante so agawaan da diad inlaknab a tuloy na organisasyon a nanenengneng tayo natan. (Isa. 60:22) Saray espisyal payunir so siansia nin walaan na importantin betang diad panangikayat ed maong a balita “ed amin a pinalsa ed leksab na tawen”—Col. 1:23.
3 Manepeg Ira ya Aligen: Walaray espisyal payunir a manlilingkor ed sigpot-panaon a ministeryo diad loob la na saray dekada. Diad inlabas na saray taon, apino so pananisia na saratan a matoor a lalaki tan bibii diad nanduruman kipapasen. (1 Ped. 1:6, 7) Mabulos ira ya angisakripisyo ed saray materyal a pakainawaan ta pian makapanlingkor ira ed saray lugar a walay nikaduman pankaukolan. Natan, arum ed sikara so maedad la tan makapuy lay bunigas da, odino nipapaarap ira ed arum nin mairap a kipapasen. (2 Cor. 4:16, 17) Ingen ta ‘manbubunga niran siansia ed inkamasiken’ odino inkatatken da. (Sal. 92:14) Manmamatalek ira ed si Jehova tan naeeksperiensya ra so panamendisyon to.—Sal. 34:8; Uli. 10:22.
4 Saray espisyal payunir so talagan makanepegan na maaron komendasyon tayo. No apribilehyoan kayon nawalaan na saray espisyal payunir ed kongregasyon yo, anamoten yo so pankanawnawan miulop ed sikara pian nagunggonaan kayo ed eksperiensya ra. Ipanengneng so apresasyon yo ed panlilingkor da bilang matoor a manangiyabawag na Panarian. Onggamor na biskeg ed ipapatnag dan katooran. Amin a mangalig ed pananisia ra so makagamor met na panangabobon tan panamendisyon nen Jehova lapud “saray managamil na katuaan [“inkamatoor,” NW] sikara so kalikliket to.”—Uli. 12:22.