Agtayo Ontutundad Kimey Tayo
1. Panon tayon amta ya saray ebanghelisador nen inmunan siglo et agtinmundad kimey da?
1 Saray maseseg ya ebanghelisador nen inmunan siglo et ‘agtinmundan’ angiyabawag ed maong a balita iner man so kawalaay totoo. (Gawa 5:42) Kanian singa imposible ya no manpupulong irad kaabungan et labas labasan da labat iray totoo ed dalan ya agda ra pulongan. Agda met palalabasey pankanawnawa ya makapanpulong ya impormal sano mititindaan kayari ran nampulong. Singa si Jesus, ag-ira ontutundad kimey da.—Mar. 6:31-34.
2. Antoy kaibad pambilay tayo unong ed ngaran tayo?
2 Naynay ya Akaparaan: Say ngaran tayon Tasi nen Jehova et aglabat manideskribe no antoy gagawaen tayo; dedeskribien to met no siopa itayo. (Isa. 43:10-12) Kanian naynay tayon akaparaan ya onebat nipaakar ed ilalo tayo, aliwan sano onla ti’ labat ya manpulong ed kaabungan. (1 Ped. 3:15) Iisipen mo la kasi iray situasyon ya nayarin makapanpulong ka na impormal tan nononoten no antoy nayarin ibagam? Kasin naynay kan mangaawit na literatura ya iter ed saray interesado? (Uli. 21:5) Kasin manpupulong ka labat ed kaabungan odino inanabang mo so maong a balita ed saray totoo diad arum a lugar no iyabuloy na sirkumstansya?
3. Akin ya say pampulong ed saray karsada tan parking lot, plaza, pasen na negosyo, tan arum ni et agnepeg ya ipasen ya agtanton importante?
3 Pantasi ed “Publiko”: Manpupulong tayo diad saray karsada tan parking lot, plaza, pasen na negosyo, tan arum ni. Kasin saratan ya pansasagpot et aliwan ordinaryo, duma, odino opsyonal labat? Imbaga nen apostol Pablo ya sikatoy nampulong “diad arap na karaklan” o publiko tan diad kabkaabungan. (Gawa 20:20) Say pampulong ed kaabungan so manuna tan sanka-epektiboan ya paraan pian nipasabi ed totoo so mensahe na Panarian. Balet saray ebanghelisador nen inmunan siglo et nanpokus ed totoo, aliwan diad saray abung. Agda pinalampas so kada pankanawnawa ya inabang so katuaan—diad publiko, impormal ya paraan, tan diad kaabungan. Komon ta ontan met so panmoria tayo pian sigpot tayon nasumpal so ministeryo tayo.—2 Tim. 4:5.