Jehovah’s Witnesses—Faith in Action, Part 1: Out of Darkness
Diad Biblia, say liwawa et ikokonekta ed katuaan, balet say kabilungetan et ikokonekta ed katilaan. (Sal. 43:3; Isa. 5:20) Pinawala nen Satanas so kabilungetan ed mundo sanen tinilaan toy Eva, ya anggad kinmayat so kabilungetan ed interon mundo. (Apo. 12:9) Say video ya Jehovah’s Witnesses—Faith in Action, Part 1: Out of Darkness so mangipapanengneng no panon ya sinminag so liwawa ed kabilungetan. (Isa. 60:1, 2) Kayarin bantayan iyan video, ebatan irayan tepet:
(1) Panon ya ginmapo so pirmin kabilungetan kayari impatey na saray apostol? (2) Diad gapo na 1100’s, anto ray agawa ya tinmulong ed saray totoo pian natebek da ya aliwan katuaan so ibabangat na simbaan? (3) Siopa ra di Henry Grew tan George Storrs? (4) Anto ray agawa ed bilay nen Charles Russell a walay baleg ya epekto ed sikato? (5) Panon dan ginawa di Brother Russell, say ama to, tan saray kakaiba ra so panagaral na Biblia, tan anto ran katuaan ed Biblia so naaralan da? (6) Panon ya akikasakey itan ya grupo ed grupo nen Nelson Barbour, balet antoy rason no akin ya sinmian lanlamang ira? (7) Antoy agawa nen Hulyo 1879 ya gapoan na balon panaon na espiritual ya liwawa? (8) Kayari na satan, antoy ginawa na saray ondarakel ya Estudyante na Biblia pian iyabawag so maong a balita? (9) Pigapigaran taon antis ni na 1914, antoy iilaloan na saray Estudyante na Biblia ya nagawad satan a taon? (10) Anto ran problema so naeksperiensya na saray Estudyante na Biblia kayari impatey nen Brother Russell? (11) Antoy ginawa na saray Estudyante na Biblia sanen nibulos ed prisoan si Brother Rutherford tan saray kakaiba to? (12) Panon a mas lalon naapresyam so organisasyon nen Jehova diad impanbantay mod sayan video? (13) Panon ya pinabiskeg na sayan video so determinasyon mon itultuloy so inkaseseg mo ed panagpulong anggaman wala ray kairapan? (14) Panon tayon usaren iyan video pian natulongan tayo iray kakanayon, saray iyaaralan na Biblia, tan arum ni ra?
Talagan sakey a mablin espiritual a tawir so intilak na saraman ya Estudyante na Biblia ed sikatayo! Diad mundon walad espiritual ya kabilungetan, makmakpel tan maseseg dan insindag so liwawa. Komon ta aligen tayo so ehemplo ra tan “mankurang bilang ananak na liwawa.”—Efe. 5:8.