Jehovah’s Witnesses—Faith in Action, Part 2: Let the Light Shine
Kayarin nibulos manlapud prisoan si Brother Rutherford tan saray kakaiba to nen 1919, walay baleg a kimey ya kaukolan a gawaen na saray Estudyante na Biblia. Singa nipanengneng ed video ya Jehovah’s Witnesses—Faith in Action, Part 2: Let the Light Shine, dakel so onsumpa ed saray Estudyante na Biblia, onlinew lan onlinew so pakatalos dad Kasulatan, tan napino so pananisia ra. (Uli. 4:18; Mal. 3:1-3; Juan 15:20) Kayari yon bantayan so video, ebatan irayan tepet.
(1) Anto ran paraan so ginawa na saray Estudyante na Biblia pian nipakabat so maong a balita? (2) Antoy agawa ed saramay agnalinglingwanan ya kombension nen 1931 tan 1935? (3) Anton importantin impormasyon so walad Nobyembre 1, 1939 ya isyu na The Watchtower? (4) Deskribien so agawa ed Madison Square Garden legan na paliwawa nen Brother Rutherford ya “Government and Peace.” (5) Akin a makapainteres so paliwawa nen Brother Knorr ya “Peace—Can It Last?” (6) Nen 1942, anto ran plano so ginawa na saray Tasi nen Jehova pian palaknaben so panagpulong a kimey da? (7) Ipaliwawa so arum ed saray kaso ya indepensa dad korte diad United States, Canada, tan Greece. (8) Antoy epekto na Gilead ed inlaknab na panagpulong a kimey? (9) Anton importantin kimey so ginmapo nen 1946, tan akin? (10) Antoy ginawa na saray Tasi nen Jehova pian naseguron say kondukta da et mitunosan ed estandarte ya ipapabitar na Biblia. (11) Ipaliwawa so arum ed saray pananguman nen 1970’s pian mas maapit ya natumbok na organisasyon so pangaligan ya walad Biblia. (12) Panon a tinmulong so impanbantay mod sayan video pian mas natalosan mo ya si Jehova et kontrolado toy amin, tan saya so organisasyon to? (13) Panon ya pinabiskeg na sayan video so determinasyon mon mantultuloy ya maseseg a manpulong anggano wala ray mangaamper? (14) Panon tayon usaren iyan video pian tulongan iray kakanayon tayo, iyaaralan na Biblia, tan arum ni?
Kada agew ya onlalabas et onaarum ed history na saray Tasi nen Jehova. Antoy ipanengneng na rekord nipaakar ed saray sagpot tayo ed ministeryo? Singa ginawa na saray agagi tayo nensaman, komon ta maseseg tayon itultuloy ya ‘pasindagen so liwawa’!—2 Cor. 4:6.