Epektibon Panagpulong Panamegley na Literature Display

Talagan epektibo so panagpulong ed publiko ya uusaren iray cart, literature stand, odino lamisaan pian iyasingger ed katuaan iray mauyamon totoo. (Juan 6:44) Kanian papasesegen iray elder ya organisaen so onian uksoyan ed saray matoon pasen diad teritorya na kongregasyon da. Lapud aliwan apasakey so pangipue-puestoan tayod saraya, kaslakan et kaukolan tayoy manpatanir ed saray opisyal. Balet, siopa ray kualipikadon mibiang? Saray manangipalapag ya maong so pakatebek da, presentable, tan maong a mitongtong ed nanduruman totoo. Nia ray nepeg tan agnepeg a gawaen na saray mibiang pian mas epektibo ira.

Nepeg a gawaen:

Magmaliw a makaaro tan matulong ed saray ondadalan. Say arum ya manangipalapag et iimisan tan ibabano da ray ondadalan. No walay onnengneng ed display, nayarim ya ibaga: “Walay agustoan yo? Sarag yoy mangala.”
Ondistansya na dugaruga ed display. Diad arum ya lugar et epektibo no saray manangipalapag et walad abay na display stand. Balet diad arum et ag-iya epektibo ta nababaingan ya ontunda iray ondadalan no walay akabantay. Kanian onaarawi na daiset iray manangipalapag, insan labat ira onasingger no walay ontundan too ed display. No walay onasingger, pitongtongan mo, nayarim ya ibaga: “Naisip yo la ‘tan ya tepet?”
Anggad posible, naynay ya usaren so Biblia.
Ipaliwawa so iyoopresi tayon panagaral na Biblia ed siopaman ya mangalay publikasyon ya uusaren tayod panagaral na Biblia, singa say libron Ibabangat na Biblia. Ipabantay so videon Akin ya Aralen so Biblia?
Isulat so impormasyon no panon ya nakontak iray interesado. No agmanaayam ed teritorya yo, isulat ed Please Follow Up (S-43) form so impormasyon, insan iter ya tampol ed sekretaryo na kongregasyon.