Antoy Makatulong Pian Maong so Bilay Mo ed Arapen?
Dakel so manisia ya kokontrolen na agnanengneng iran puersa so arapen da. Lapud satan, wala ray tutumboken dan ritual pian oninawa kuno so bilay da.
NO ANTOY PAPANISIAAN NA DAKEL
ASTROLOHIYA: Papanisiaan na arum ya totoo ya say bilay dad arapen et akabase ed posisyon na saray bitewen nen inyanak ira. Susubaybayan day horoscope pian naamtaan day nagawad arapen da tan naiwasan day peligro odino pian onaligwas so bilay da.
FENG SHUI: Papanisiaan na arum ya no manpaalagey iray abung, dapat ya aliwa itan ya kontra ed saray agnanengneng ya puersa pian maliket tan onaligwas so bilay da. Kuan nen Lo Winga ya taga Hong Kong: “Imbagad siak na ekspertod feng shui ya no mankarga ak na espisyal a kristal ed tindaan ko, dakel so nalakok.”
PANDAYEW ED INATEY LAN KAKANAYON: Wala met iray manisia ya dapat dan idayew iray inatey lan kakanayon da odino nanduruman dios pian naprotektaan tan nabendisyonan ira. Kuan nen Van ya manaayam ed Vietnam: “Manisia ak ya no idayew ko ray inatey lan kakanayon ko, nawalaan ak na balibalin bilay natan tan seguradon maong so bilay kod arapen tan na saray ananak ko.”
REINKARNASYON: Dakel so manisia ya no ompatey so sakey, sikatoy paulit-ulit ya nabilay ed nanduruman anyo. Saray naeeksperiensya to kuno natan et lapud saray ginawa tod apalabas ya bilay to.
Ibabaga balet na arum ya anito labat iratan. Balet anggano agda iratan papanisiaan, siansia nin onkokonsulta irad manghuhula, horoscope, baraha, tan dakel ni. Iisipen da ya aglapigan naamtaan day arapen da.
TALAGA KASIN MAKATULONG IRATAN?
Kasin saramay manisia ed saratan ya ideya et nagmaliw ya maliket so bilay da tan awalaan iray maong ya arapen?
Nengnengen tayo so eksperiensya nen Hào ya taga Vietnam. Sikatoy kinmonsultad astrolohiya, feng shui, tan nandayew ed inaatey lan kakanayon to pian naamtaan toy arapen to. Kasin akatulong iraman? Oniay imbaga to: “Alugi negosyok, alubog ak ed utang, maguloguloy pamilyak, tan a-depress ak ya maong.”
Manisia met si Qiuming ya taga Taiwan ed astrolohiya, reinkarnasyon, kapalaran, feng shui, tan pandayew ed inaatey lan kakanayon. Kayari ton pinan-isipan ya maong iratan ya papanisiaan to, oniay imbaga to: “A-realize ko ya saratan ya bangat tan tradisyon et mankokontraan tan magulo. Naamtaan ko ya saray prediksion na astrolohiya et mabetbet ya aliwa. No diad reinkarnasyon balet, no anggapoy natandaan mo ed apalabas ya bilay mo, panon kan manguman tan ayosen so bilay mo ed onsublay ya bilay?”
“A-realize ko ya saratan ya bangat tan tradisyon et mankokontraan tan magulo.”—QIUMING, TAIWAN
Singa si Hào tan Qiuming, naamtaan met na dakel ya totoo ya say arapen tayo et ag-akabase ed kapalaran, saray bitewen, inaatey lan kakanayon, tan reinkarnasyon. Labay to kasin ibaga ya anggapoy nagawaan tayo parad arapen tayo?
Iisipen na dakel ya say pangalay atagey ya edukasyon tan pampayaman so mangiter na seguradon maong ya bilay ed arapen. Antoy nansumpalan na saramay ontan so ginawa da?
a Sinalatan so arum ya ngaran ed sayan artikulo tan saray onsublay.
b Nabasa iya ed Masanton Biblia diad Galacia 6:7. Mipara met iya ed kabkabat ya kasabihan ed Asia ya No mantanem kay melon, man-ani kay melon; no mantanem kay agayep, man-ani kay agayep.