Rebyuen Iray Manunan Punto

Kasin no maminsan et nanairapan kan tandaan so inaral mo? Normal labat itan. Anto sirin so gawaen mo pian agmo iratan nalingwanan? Rebyum iray manunan punto.

Legan kan manaaral, tunda ka sagpaminsan tan nonot mo no anto la ray naaralan mo. Atan so impaseseg nen apostol Pablo ed saray agagi nen inmunan siglo legan dan aaralen so sulat to. Oniay imbaga to: “Nia so manunan punto.” (Heb. 8:1) Lapud satan ya ginawa nen Pablo, atalosan na saray agagi so labay ton ibaga, tan apankokonektaan da so kada punto ya imbaga to.

Kanian kayarim ya manaral, mangigana kay anggano samploran minuto pian nonoten iray manunan punto ya naaralan mo. No agmo masyadon natandaan, nengneng mo lamet iray subheading odino basam so unonan sentence na kada parapo. No walay balon naaralan mo, salim itan ya ibalikas ed sarilim ya salita. No mangigana kay panaon pian rebyuen iray manunan punto, seguradon agmo iratan nalingwanan, tan mas natalosan mo no panon iratan ya makatulong ed bilay mo.