Tepet na Saray Manbabasa
Siopa iramay abitlad 1 Timoteo 5:21 ya “saray apilin anghel”?
Oniay insulat nen apostol Pablo ed kapara ton elder ya si Timoteo: “Igaganggan ta ka diad arap na Dios tan si Kristo Jesus tan saray apilin anghel a tumbok mo irayan bilin ya anggapon balot so papaboran odino lalabien mo.”—1 Tim. 5:21.
Pian naamtaan tayo no siopa irayay abitla dia ya “saray apilin anghel,” amtaen tayo ni no siopa ray agtutukoyen nen Pablo ed sayan imbaga to. Seguradon ag-iya ontutukoy ed saray 144,000 ta nen sinulatan nen Pablo si Timoteo, agni ginmapon paolien iray alanaan diad tawen. Kanian aliwa nin espiritu iray apostol tan arum nin alanaan. Malinew sirin ya aliwan sikara imay tutukoyen nen Pablo.—1 Cor. 15:50-54; 1 Tes. 4:13-17; 1 Juan 3:2.
“Saray apilin anghel” et agmet ontutukoy ed saray anghel ya nanrebelde ed si Jehova diad panaon na Delap. Say kinampian na sarayan anghel et si Satanas tan nagmaliw iran demonyo, kanian kabkabusol ira nen Jesus. (Gen. 6:2; Luc. 8:30, 31; 2 Ped. 2:4) Diad arapen, ibantak ira nen Jesus ed kaaralman diad loob na 1,000 taon, insan kayari to ’tan et deralen to ra pati si Satanas a Diablo.—Jud. 6; Apo. 20:1-3, 10.
Kanian amay binitla nen Pablo ya “saray apilin anghel” et ontutukoy ed saray anghel ed tawen ya matoor ed “Dios tan si Kristo Jesus.”
Dakdakel so matoor ya anghel, ‘samplon libolibo’ ira. (Heb. 12:22, 23) Nanduruman asainmin so iiter nen Jehova ed sikara. (Apo. 14:17, 18) Singa bilang, seguro nanonotan yo may sakey ya anghel ya imbaki nen Jehova pian pateyen so 185,000 ya sundalo na Asirya. (2 Ara. 19:35) Nayarin say asainmin met na arum ya anghel et “ekalen dad Panarian [nen Jesus] so amin a bengatlan pakagapolan tan saray totoon manggagawa na kaugsan.” (Mat. 13:39-41) Say asainmin balet na arum et “tiponen” da ray alanaan diad tawen. (Mat. 24:31) Tan wala ray anghel ya igaganggan nen Jehova ‘pian bantayan so amin ya dalan tayo.’—Sal. 91:11; Mat. 18:10; ikompara so Mateo 4:11; Lucas 22:43.
“Saray apilin anghel” ya abitlad 1 Timoteo 5:21 et nayarin ontutukoy ed saray anghel ya inyasain pian ontulong ya mangasikaso ed saray kongregasyon. Base ed konteksto, binilin nen Pablo iray elder no panon dan nagawaan iray responsabilidad da, tan no panon ya nipanengneng na saray agagi so respeto ed saray elder. Binilin met nen Pablo iray elder ya nepeg ya ‘anggapoy papaboran odino lalabien’ da. Agmet ira bastabasta mandedesisyon o manguukom ya agda pinannonotan ya maong. Insan to imbagad sikara no akin ya importantin seryosoen da irayan bilin to. Imbaga to ya panlilingkoran da ray agagi “diad arap na Dios tan si Kristo Jesus tan saray apilin anghel.” Labay ton ibaga, nanenengneng nen Jehova, Jesus, tan saray apilin anghel no panon dan aasikasoen so kongregasyon. Base ed sarayan impormasyon, alinewan tayo ya wala ray anghel ya inyasain nen Jehova ed saray kongregasyon—proprotektaan da ray lingkor na Dios, tutulongan da rad panagpulong ya kimey, tan ibabaga rad si Jehova iray naoobserbaan da.—Mat. 18:10; Apo. 14:6.