Bangungot na Guerra
Say guerra o panlalaban so sakey ed saray sankairapan ya naeksperiensya na too. Asali na saray sundalo tan sibilyan so aliwliwan epekto na satan.
SARAY SUNDALO
“Anengneng kon mismo iray totoon asugatan na grabe o pinapatey. Pakaliknak, anggan anton oras, onsublay ak met la.”—Gary, Britain.
“Apaltog ak ed beneg tan lupa. Dakdakel met so anengneng kon pinapatey, kaiba la ray ugugaw tan maedad. Gawaen kan manhid na guerra.”—Wilmar, Colombia.
“No walay toon pinaltog ed mismon arapan mo, pawilpawil ed isip mo so agawa. Singam ni nanenengneng tan narerengel ya mikakasi tan oneeyag. Tan agmon balot nalingwanan iman ya too.”—Zafirah, United States.
SARAY SIBILYAN
“Pakalinak, agak lan balot magmaliw ya maliket. Antakot koy ompatey, pero say mas antakot ko, amay no ompatey iray kapamilyak tan kakaarok.”—Oleksandra, Ukraine.
“Makapataktakot so ompila pian makalay rasyon, manlapud alas-dos na palbangon anggad alas-onse na labi, ta agmo amta ompan napatalosan kay bala.”—Daler, Tajikistan.
“Inatey iray atateng ko ed guerra. Kanian lapud ulila ak la, anggapo lay naasinggeran ko odino mangasikaso ed siak.”—Marie, Rwanda.
Anggano grabe so epekto na guerra ed sarayan abitlan totoo, maligen lay liknaan da natan. Aliwan satan labat, kombinsido met ira ya magano lan mangangga so amin ya guerra tan panlalaban. Usaren ed sayan isyu na Say Panag-bantayan so Biblia pian ipaliwawa no panon iratan ya nagawa.