Kareenan Anggano Walay Guerra tan Panlalaban
Oniay imbaga nen Gary, ya datin sundalo: “Nen agak ni manaaral na Biblia, agko natatalosan no akin ya magulogulo so mundo, grabe so ag-inkahustisya, tan inkaruksa. Pero mareen la natay nonot ko. Amtak ya pagmaliwen nen Jehovan Dios ya maligen so interon mundo.”
Aliwan si Gary labat so makakaliknay ontan. Nengnengen tayo no panon ya atulongan met na Biblia so arum.
IBABAGA NA BIBLIA: “Maomaong ka, O Jehova, tan akaparaan kan mamerdona.”—Salmo 86:5.
NO PANON IYAN MAKATULONG: “Atalosan kod sayan bersikulo na Biblia ya mapangasi si Jehova. Amtak ya akaparaan ya mamerdona ed amin ya ginawak ed apalabas nen migi-guerra ak ni.”—Wilmar, Colombia.
IBABAGA NA BIBLIA: “Manggawa ak na balon tawen tan balon dalin; tan agla nanonotan iray apalabas a bengatla, tan agla iratan mansiansia ed puso.”—Isaias 65:17.
NO PANON IYAN MAKATULONG: “A-trauma ak tan grabe depression ko lapud aranasan kod militar. Pero naamtaan kod sayan bersikulo na Biblia ya magano lan pakalmaen nen Jehova so ag-ondeen ya nonot ko tan ekalen to ray pakaka-bangungotan ko. Onsabi panaon, agko la ratan sankanonot tan agla iratan mansiansiad pusok. Balibalin regalo!”—Zafirah, United States.
IBABAGA NA BIBLIA: “Diad saray agew to et ombulaslas so matunong, tan inerman a pasen et walay kareenan anggad kaandi na bulan.”—Salmo 72:7.
NO PANON IYAN MAKATULONG: “Lanang kon sankanonot itan ya imbaga na Biblia. Agmanbayag, anggapo lay guerra tan amin ya makapataktakot ya epekto na satan. Agtayo met la panaburidoan no kasin safe iray kapamilya tayo.”—Oleksandra, Ukraine.
IBABAGA NA BIBLIA: “Nabilay iray inatey mo. . . . Bangon kayo tan eyag kayo ed liket, sikayo ran manaayam ed dabok!”—Isaias 26:19.
NO PANON IYAN MAKATULONG: “Nen inataki so tribu min Tutsi, inatey lawarin amin so kapamilyak. Pero apabiskeg na sayan bersikulo so liknaan ko ta ipropromisa ton nanengneng ko ra lamet. Tatalaranan ko may panaon ya bilayen la ra tan narengel ko lamet iray maliket ya boses da!”—Marie, Rwanda.
IBABAGA NA BIBLIA: “Agmanbayag et anggapo lay mauges . . . Balet saray mauyamo et tawiren day dalin, tan manliket iran maong ed agnaparaan a kareenan.”—Salmo 37:10, 11.
NO PANON IYAN MAKATULONG: “Anggano anampot lay guerra, wala nin siansiay ag-inkahustisya tan mauges ya totoo. Akatulong ya maong ed siak iyan bersikulo na Biblia pian ombiskeg so liknaan ko. Nanenengneng nen Jehova so amin tan natatalosan to so situasyon ko. Insipan to ya magano to lan panampoten so amin ya paniirap tan agti la iraya nanonotan.”—Daler, Tajikistan.
Saray totoo ya abitla ed sayan magasin et pigara labat ed minilyon ya Tasi nen Jehova ya atulongan na Biblia pian ondeen so liknaan tan nonot da. Naaralan dan ekalen so pambusol ed sarili da, arum ya lahi, bansa, tan tribu. (Efeso 4:31, 32) Neutral ed politika iray Tasi nen Jehova tan ag-ira mibabali ed saray panlalaban.—Juan 18:36.
Saray Tasi nen Jehova ed interon mundo et mantutulongan ya singa ra sanaagi. (Juan 13:35) Singa bilang, si Oleksandra, ya abitla ed gapo et kaukolan ya ontakas kaibay agi to diad arum ya bansa lapud guerra. Imbaga to: “Kalampas mi ed border, anengneng min tampol iray kapara min Tasi diman tan in-welcome da kami. Tinulongan da kamin makapan-adjust ed bilay mi ta refugee kami ed bansa ra.”
Labay mi kan imbitaan ed saray aral mi. Ditan et naaaralan mi so mensahe na Biblia nipaakar ed kareenan tan no panon ya ondeen so bilay mi. Onlad jw.org/pag pian naalmom so sankaasinggeran ya pantitiponan mi odino pian man-request na libren panangiyaral na Biblia ed sakey ed Saray Tasi nen Jehova, gamit so publikasyon ya Panliketan so Bilay ya Anggapoy Anggaan!