‘Pansiansiaen Tayoy Pankakasakey Tayo’
BINILIN nen apostol Pablo iray Kristiano ed Efeso ya itultuloy dan ‘itepel so balang sakey lapud aro, tan gawaen day anggaay nayarian dan pansiansiaen so pankakasakey da ed espiritu tan manbilay ira a walay kareenan.’—Efe. 4:2, 3.
Walay “pankakasakey” tayo lapud “espiritu.” Labay ton ibaga, resulta itan na aktibon puersa na Dios. Pero, singa imbaga nen Pablo, kaukolan tayon gawaen so anggaay nayarian tayo pian mansiansiay pankakasakey tayo.
Singa onia ’tan ay: Imadyin mo pa ya walay angiregalo ed sika na balon luganan. Siopay akanresponsabilidad ya mangasikaso tan manmintina ed satan? Siempre sika. No aderal imay luganan ta agmo inasikaso, aliwan samay angiter so natetel.
Ontan met ed pankakasakey tayo ran Kristiano. Tua, regalo itan na Dios ed sikatayo. Pero responsabilidad na kada Kristiano ya pansiansiaen itan. Kanian no walay agyo pantatalosan na sakey ya agi tan akapanbarongan kayo, tepetan moy sarilim, ‘Kasin gagawaen koy anggaay nayarian ko ya mikareenan ed samay agi pian napansiansiay pankakasakey ed kongregasyon?’
‘GAWA YOY ANGGAAY NAYARIAN YON PANSIANSIAEN SO PANKAKASAKEY’
Nanengneng tayod samay insulat nen Pablo ya wala ray panaon ya ompan nairapan tayon pansiansiaen so pankakasakey tan maong ya ulopan tayo, lalo la no asakitan tayo ed imbaga o ginawa na sakey ya agi. Pian napansiansiay pankakasakey, kasin say alenleneg ya solusyon et katongtongen tayo imay agi tan ipaamta tayod sikato ya asakitan to tayo? Andi met. Maabig no tepetan tayoy sarili tayo, ‘No katongtongen ko tan ibagak ed sikato ya asakitan to ak, kasin naayos so problema o mas onloor laingen?’ No maminsan, say sankaabigan ya gawaen et palampasen tayo la—perdonaen tayo la may agi, tan lingwanan tayo la may agawa.—Pro. 19:11; Mar. 11:25.
Tepetan moy sarilim, ‘No katongtongen ko tan ibagak ed sikato ya asakitan to ak, kasin naayos so problema o mas onloor laingen?’
Diad samay sulat nen Pablo, imbaga to met ya itultuloy tayon “itepel [so] balang sakey lapud aro.” (Efe. 4:2) Base ed sakey ya reperensya, nayari met itan ya ipatalos ya “awat yo no siopa ra.” Labay ton ibaga, awaten tayo ya wala ran talagay kakapuyan na saray agagi tan nalilingo met ira ya singa sikatayo. Tua, gagawaen tayoy anggaay nayarian tayo ya “isulong so balon personalidad.” (Efe. 4:23, 24) Pero tandaan tayo ya amin tayo et aliwan perpekto. (Roma 3:23) No atan so sankanonot tayo, mas napakiwas tayon itepel iray agagi, mas mabulos tayo ya mamerdona, tan makakatulong tayo pian napansiansiay pankakasakey ed loob na kongregasyon.
No akaparaan tayon perdonaen iray agagi tan palampasen tayo lay lingo da, tuloytuloy tayon “manbilay . . . a walay kareenan.” Amay Griegon salita ya impatalos ya “manbilay kayo a walay kareenan” diad Efeso 4:3 et impatalos ya “ula-ulat” ed Colosas 2:19. Saray ula-ulat so rason no akin ya malmalet ya akakonekta ed sakey tan sakey iray pukel tayo. Mipadpara, no walay kareenan tan aroan ed sikatayo ran sanaagi, onelet so ulopan tayo anggano nandurumay ugali tayo.
Kanian no bilang ta asakitan ka na sakey ya agi, odino nasyosyodotan tan naiirita kad sikato, talosan mo la, tan agka manpopokus ed saray kakapuyan to. (Col. 3:12) Amin tayo et aliwan perpekto, kanian seguradon wala met la ray imbagam o ginawam ya asakitan mo met so arum. No lanang mon nonoten itan, mas desidido kan gawaen so betang mo pian ‘napansiansiay pankakasakey tayo.’