Ipaamta so Katuaan ed Inas-asikason Paraan

1. Antoy gawaen tayo pian magmaliw tayon parte na pamilya nen Jehova?

NO WALAY agi ya first time tayon akaistoryaan, maslak say itetepet tayo, “Panon mon nalmoy katuaan?” Ompan wala ray akatongtong tayo ya ibaga ran “binmaleg ira ed katuaan.” Say arum et ibaga dan “balo ni ira labat ed katuaan.” Baleg so epekto na katuaan ed bilay tayo ta anggan diad kakaebat tayo et nabibitla itan. Talagan nansagpot tayon aroen tan iyaplika so katuaan ed bilay tayo. Impanengneng tayo itan diad panagnonot, panagsalita, tan kagagawa tayo. Ontan so ginawa tayo pian magmaliw tayon parte na pamilya nen Jehova.—Sal. 15:1-3.

2. (a) Antoy reputasyon nen Jesus? (b) Antoy reaksion na totoo ed katuaan ya imbangat nen Jesus?

² Amin ya ibabaga nen Jesus et tua. Anggan saray mamubusol ed sikato et inamin dan katuaan so ibabaga to. (Mat. 22:16) Amta nen Jesus ya aliwan amin et mangawat ed katuaan. Onia ingey imbaga to: “Linma ak dia pian pansengegay inkaapag-apag, anak a laki kontrad ama to, tan anak a bii kontrad ina to, tan manugang a bii kontrad katulangan ton bii.” (Mat. 10:35) Siempre, labay nen Jesus ya awaten na amin so mensahen ipupulong to tan na saray papatumbok to. Pero realistiko labat si Jesus. (Mat. 23:37) Amta to ya naapag iray totoo lapud mensahen ibangat to—wala ray mangaro ed katuaan tan wala met iray manbusol ed satan.—2 Tes. 2:9-11.

3. Anto ran tepet so pantongtongan ed sayan artikulo?

³ Singa si Jesus, maabig no lanang tayon ibagay tua anggano ag-itan nagustoan na arum. Ipulong tan ibangat tayo met iray katuaan ed Biblia, anggano ag-itan labay ya dengelen na totoo. Pero labay to kasin ibaga, anggapo lay pibabali tayo ed paraan na pangibaga tayoy katuaan ta tua met so ibaga tayo? Siempre andi. Kanian diad sayan artikulo, pantongtongan tayo irayan tepet: Iner tayo naromog so katuaan? Antoy motibo tayo no ipapaamta tayoy katuaan? Panon tayon ibaga itan, tan kapigan? No amta tayoy ebat ed saratan ya tepet, mas epektibo tayon naibangat so katuaan lapud inas-asikaso so paraan na pitotongtong tayo.

INER TAYO NAROMOG SO KATUAAN?

4. Akin et nibaga ya si Jehova et Subol na katuaan?

⁴ Si Jehova so Subol na katuaan. Amin ya ibabaga to et tua. No antoy estandarte tan ipapagawa to, aman so duga. (Sal. 19:9; 119:142, 151) Antokaman so ibaga ton nagawa et ontua. (Isa. 55:10, 11) Tan no antoy insipan to, seguradon gawaen to. (Num. 23:19) On, imposiblin mantila si Jehova! (Heb. 6:18) Agla sirin pankelawan ya diad Biblia, tinawag si Jehova ya “Dios na katuaan.”—Sal. 31:5.

5. Posible kasin nakabat tayoy Dios? Ipaliwawa. (Gawa 17:27)

⁵ Iisipen na arum ya anggapoy Dios. Tan anggano wala kuno bilang, imposible balet ya nakabat. Pero aliwan tua itan. Apaliberan tayoy dakdakel ya ebidensya ya talagan walay Dios. (Roma 1:20) Nen katongtong nen apostol Pablo iray de-aral ya Griego diad Atenas, imbaga ton labay na Dios ya Sikatoy “anapen” na totoo ta “sikatoy ag-arawi ed balang sakey ed sikatayo.” (Basaen so Gawa 17:27.) Diad tua, iyaasingger nen Jehova ed sarili to iray mapaabeban totoo ya manaanap ed katuaan.—Juan 6:44.

6. (a) Anto ran katuaan so nabasa ed Biblia? (b) Akin et misatsalamat kan naamtaan mo irayan katuaan?

⁶ Say sakey ya paraan pian nakabat tayoy Jehova et no aralen tayoy Biblia. Inusar nen Jehova so masanton espiritu to pian igiya iray lalakin nansulat ed sayan libro. (2 Ped. 1:20, 21) Kanian amin ya karga na Biblia et tua tan napantiwalaan. Singa bilang, napantiwalaan tayoy salaysay na Biblia no panon ya ginmapoy uniberso tan say bilay diad dalin. (Gen. 1:1, 26) Ipapaamta to met ya lapud atawir tayon kasalanan, maniirap tan ompapatey iray totoo. (Roma 5:12; 6:23) Segurado tayo met ya nagawa so ibabaga na Biblia ya usaren nen Jehova so Anak to pian apigeren so amin ya aliwliwan ginawa nen Satanas, say “ama na tila.” (Juan 8:44; Roma 16:20) Makapanmatalek tayo met ya onsabi panaon et deralen nen Jesus iray mauges, bilayen to iray inaatey, apigeren toy dalin, tan tulongan to tayon magmaliw ya perpekto. (Juan 11:25, 26; 1 Juan 3:8) Misatsalamat tayod si Jehova ta impaamta tod sikatayo irayan katuaan, tan inikdan to tayoy pribilehyon ibangat met itan ed arum.—Mat. 28:19, 20.

AKIN ET IPAPAAMTA TAYOY KATUAAN?

7-8. Kasin importante so motibo tayo no ipapaamta tayoy katuaan? Mangiter na alimbawa. (Marcos 3:11, 12) (Nengnengen met so litrato.)

⁷ Singa abitla nen niman, importante ya ibaga tayoy katuaan pian magmaliw tayon parte na pamilya nen Jehova. Pero no ibaga tayoy tua, kasin automatic la ya napaliket tayoy Jehova? Wala ni sakey ya importante ed sikato—say motibo tayo. Imanoen tayo pa may sakey ya inkagawa nen manpupulong si Jesus diad asingger ed Dayat na Galilea. (Basaen so Marcos 3:11, 12.) Diad saman, minungkog na totoo si Jesus. Tan wala ray totoon aselepan na demonyo ya ondadakmomo ed sikato tan iyeeyag dan: “Sika so Anak na Dios.” Akin balet et ipapaamta na sarayan demonyo iyan katuaan nipaakar ed si Jesus? Nayarin say gagala da et labay dan manisia iray totoo ed saramay aselepan da tan kalkalna da ran iyarawi ed si Jehova. Anggan tua met so imbaga na saramay demonyo, makasarili balet so motibo da. Agda balet alokoy Jesus tan agto agustoan so ginawa ra. Diad tua, binano to ra tan binawalan to ran mangibaga na anggan anto nipaakar ed sikato.

⁸ Antoy naaralan tayo ed saya? Importantid si Jehova ya duga so motibo tayo no ipapaamta tayoy katuaan. Kanian no ibabangat tayoy katuaan ed Biblia, agtayo komon ipapaarap so atension ed sarili tayo. Seguradoen tayo ya say dayew tan atension na totoo et onlad si Jehova.—Mat. 5:16; ikompara so Gawa 14:12-15.

9. Antoy panalwaran tayo, tan akin?

⁹ Nia ni sakey ya situasyon ya panalwaran tayo ta ompan ipapaarap tayo la manayay dayew ed sarili tayo. Imadyin mo pa ya walay kompidensyal ya impormasyon ya impaamtad sika na sakey ya brother ya walay responsabilidad to ed organisasyon. Pero impaamtam met itan ed arum. Ag-abayag, naamtaan na saramay angibagaan mo ya tua may impormasyon ya imbagam. Kanian nayarin pambiliban da ka tan isipen dan “maksil” ka ta wala ray antam ya kompidensyal. Ompan onatagey ni ingen so pakanengneng dad sika. Pero no ontay nagawa, nabalang tayo balet so pabor nen Jehova. (Pro. 11:13) Akin ey? On ta impaamta tayo so bengatlan kompidensyal. Sakey ni, anggano tua met so imbaga tayo, aliwa balet so motibo tayo.

PANON TAYON IPAAMTA SO KATUAAN?

10. Antoy labay ya ibaga na pansalita na “maabig”? (Colosas 4:6)

¹⁰ Basaen so Colosas 4:6. Pinaseseg nen apostol Pablo iray Kristiano ed Colosas ya “naynay komon a maabig iray salita” da. Diad Griegon lenguahe, say labay to yan ibaga et aglabat komon makagunggona iray ibabaga tayo, dapat balibali met itan ya dengelen tan inas-asikaso so panagsalita tayo.

11-12. Akin et importante ya inas-asikaso so pangibangat tayoy katuaan? Mangiter na alimbawa. (Nengnengen met so litrato.)

¹¹ Panon tayon niyaplika imay bilin nen Pablo? No ibabangat tayoy katuaan ed arum, komon ta maabig so panagsalita tayo. Saray katuaan ed Biblia et singa makdem ya espada ya “pansianen toy kamarerwa tan espiritu.” (Heb. 4:12) Labay ton ibaga, ipaamta na Biblia no anton talagay walad puso tan motibo na sakey ya too. Kaukolan sirin ya marundunong tayon usaren so Biblia, ta no andi, ompan nasakitan so liknaan na saray katongtong tayo tan ompan kolkolen da tayo laingen. Posible kasi yan nagawa?

¹² Imadyin mo pa ’ya: Nen manpupulong ka, walay akatongtong mon relihyoson too. Mapikasi ed saray santo tan labalabay ton selebraay Krismas tan Balon Taon kaibay pamilya to. Sarag to pa ya ipanengneng mod Biblia ya anggapoy kana na pampikasi ed saray imahen tan pruebaan mo ya kontra ed Biblia so Krismas tan Balon Taon. (Isa. 44:14-20; 2 Cor. 6:14-17) Pero duga kasi ya ontan so gawaen tayo diad primeron pitongtong tayo? Tua, impaamta tayoy katuaan, pero aliwa balet ya marunong so impangusar tayo ed Biblia.

13. Panon ya nibagan atimplaan na asin so panagsalita tayo?

¹³ Imbaga met nen Pablo ya atimplaan komon na asin so panagsalita tayo. Agto labay ya ibaga ya pikeweten odino umanen tayoy katuaan. Say punto nen Pablo et kaukolan tayon “timplaan” so pangipresenta tayo ed katuaan pian nagustoan itan na totoo, ya singa naakan ya masamsamit ed “pakataway” da. (Job 12:11) Pero aliwa itan ya mainomay. No diad literal ya panangan, mabetbet ya no anto may timplan labay tayo et aman met lay isipen tayon nagustoan na arum. Mipadpara, ompan isipen tayo ya nalabayan na amin ya totoo so paraan na panagsalita tan pitotongtong tayo. Pero aliwan lanang ya ontan. Akin ey? Diad arum ya kultura, direktan ibabaga na totoo no antoy labay tan agda labay, tan ayos labat itan anggano say katongtong da et mas matatken nen say sikara. Pero diad arum ya kultura, makapabigla itan tan aliwan marespeto. Imbaga nen Pablo ya kaukolan ya amta tayo “no panon so nepeg [tayon] iyebat ed kada too.” Importante sirin ya timplaan tayoy panagsalita tayo—ibagay tayo itan ed no siopay katongtong tayo, aliwan diad apasalan o kultura tayo.

KAPIGAN TAYO IBAGA SO KATUAAN?

14. Nen wadiad dalin si Jesus, akin et agto imbangat ed saray disipulo to so amin ya amta to?

¹⁴ Maomaong so pitotongtong nen Jesus ed saray papatumbok to tan dakel so imbangat tod sikara. (Mar. 6:34) Pero anggano dakel ni kaukolan dan naamtaan, agto imbangat so amin ya amta to. Agto ra binuntonan lapud sankanonot toy limitasyon tan kapasidad da. Ta diad saman, anggano ibangat tod sikara so arum nin katuaan, agda met lanlamang natalosan. (Juan 16:12) Antoy naaralan tayod saya?

15. Duga kasi no ibangat tayon tampol so amin ya amta tayo ed sakey ya iyaaralan? Ipaliwawa. (Proverbio 25:11) (Nengnengen met so litrato.)

¹⁵ Singa si Jesus, anggano dakel so amta tayon katuaan ed Biblia, agtayo maminpinsan ya ibangat iratan. Ikonsidera tayoy kapasidad tan situasyon na saray ibabangat tayo. Pawilen tayo pa may relihyoson too ya labalabay ton selebraan so Krismas tan Balon Taon kaibay pamilya to. Amta tayo ya aratan ya selebrasyon et kontra ed bangat na Biblia tan ag-iratan makapaliket ed Dios. Imadyin mo pa ya naigapom lad sikatoy panag-aral na Biblia, tan sakey o duaran simba et Krismas la. Duga kasin ipaamtam lan tampol ya atan ya selebrasyon et ag-akabase ed Biblia, tan ilaloan mon agla man-Krismas? Tua, wala ray iyaaralan ya iyaplika dan tampol iray nanaaralan da. Say arum balet, kaukolan da ni panaon antis dan naipapuso so katuaan tan nauman iray apasalan da. Antoy punto? Mas mainomay ya awaten na iyaaralan na Biblia iray katuaan no ipaamta tayo itan diad dugan panaon—amay no nasarag da lan talosan itan.—Basaen so Proverbio 25:11.

16. Panon tayon natulongan iray iyaaralan tayo pian ‘tuloytuloy iran manakar ed katuaan’?

¹⁶ Agaylay liket tayo no walay natutulongan tayon too ya natalosan toy katuaan nipaakar ed si Jehova. Panon tayo sirin ya natulongan iray iyaaralan tayo pian ‘tuloytuloy iran manakar ed katuaan’? Magmaliw tayo komon ya maong ya alimbawa ed sikara. (3 Juan 3, 4) Ipanengneng tayod kabibilay tayo ya kombinsido tayon nagawa iray sipan na Dios ed Biblia. No ibabangat tayoy katuaan, dapat dugay motibo tayo. Importante met ya inas-asikaso so panagsalita tayo, tan ikonsidera tayo no kapigan tayo ipaamta so katuaan. Tan say sankaimportantian, ipaarap tayon lanang so dayew ed si Jehova. No ontan so gawaen tayo, ipapanengneng tayon lingkor itayo nen Jehova, “say Dios na katuaan.”