Patundaen nen Jesus so Krimen

Amta nen Jesus so nalilikna na saramay biktima na krimen tan ag-inkahustisya. Nensaman wala ray palson inyakusa dad sikato, pinepekpek da anggano kontra itan ed ganggan, aliwan patas so impanlitis dad sikato, senentensiaan da anggano anggapoy kasalanan to, tan ansakisakit so impamatey dad sikato. Agmakasarili si Jesus ta anggano anggapoy kasalanan to, mabulbulos ton inter so “bilay to a panondon ed amayamay.” (Mateo 20:28; Juan 15:13) Natan ta Ari la na Panarian na Dios, asingger to lan iter so hustisya ed interon dalin kanian naandi lay krimen ed andi-anggaan.—Isaias 42:3.

Ibabaga na Biblia no antoy pagmaliwan na dalin no onaksion lay Jesus:

• “Anggapo lay mauges; nengnengen moy kawalaan da, et anggapo la ra. Balet saray mauyamo et tawiren day dalin, tan manliket iran maong ed agnaparaan a kareenan.”—Salmo 37:10, 11.

Panon tayon nipanengneng ya talagan misalsalamat tayo ed amin ya ginawa nen Jesus parad sikatayo, tan ed saray gawaen to ni labat? Say sakey ya paraan et no aralen tayoy nipaakar ed “maong a balita na Panarian na Dios” ta atan may mensahe ya impulong to. (Lucas 4:43) Basaen so artikulon “Anto so Panarian na Dios?”