Panangidepensa ed Karapatan ya Mandayew Diad Saray Katutubon Komunidad

Diad nilasus milyon ya totoo ya manaayam ed Latin America, minilyon ed sikara so walaan na sarili dan katutubon lenguahe tan kustombre. Dakel ed sarayan katutubon totoo et espiritual ya agagi tayo, tan papablien da so kultura da. Pian natulongan iray totoo ya naamtaan so katuaan ed Biblia, mangipapatalos tan mangipapalapag iray Tasi nen Jehova na saray publikasyon diad masulok ya 130 ya katutubon lenguahe na Latin America.a Balet arum ed sikara et siansian napapasegsegang lapud panlilingkor da ed si Jehova tan lapud agda labay so mibiang ed saray kustombre ya kontra ed ibabangat na Biblia ya kaslakan ya gagawaen ed komunidad da. Panon ya akatulong ed sikara iray donasyon yo?

Atulongan Iran Makapawil ed Ayaman Da

Diad Mexico, saray agagi tayo ed sakey a komunidad na Huichol diad saray mapalandey ya probinsya na Jalisco et marespeto dan imbaga ya ag-ira nayarin mibiang ed saray relihyoson kustombre ta ag-iratan naako na konsiensia da.b Balet amasnok so arum ed komunidad. Nen Disyembre 4, 2017, inataki na mamapasnok ya totoo so sakey a grupo na saray Tasi tan arum nin kaiba ra. Puersaan da ran pinaalis ed komunidad, dinederal da ray kagawaan da tan tinaktakot da ra ya pateyen da ra no ompawil ira diman.

Tampol ya intarya na saray Tasi diad asingger iran lugar iray pankaukolan na saray agagi tayo. Balet panon iran makapawil ed panaayaman da? “Anggapoy kuarta mi ya ibayar ed abogado,” so imbaga na sakey brother ya si Agustín, “tan agmi amta no siopay pantepetan mi nipaakar ed saray legal ya pamaakaran.”

Lapud napepeligro so karapatan ed panagdayew na saray agagi tayo, kinmiwas ya tampol so Central America Branch. Unona, kinerew dad saray opisyal ed satan ya lugar ya imbestigaan irayan krimen. Insan inaprobaan ira na Coordinators’ Committee na Mananguley ya Ulop na saray Tasi nen Jehova ya mikimeyan ed legal department diad world headquarters, tan mangisampa ra na kaso diad biang na saray Huichol ya agagi tayo. Say kaso et sinmabi ed Supreme Court of Justice of the Nation—say sankatageyan ya korte na Mexico.

Saray abogado ya manlapud nanduruman bansa et angiparaan na sakey ya malinew ya argumento tan impaliwawa da ed satan ya nepeg ya respetoen tan protektaan na saray katutubon komunidad so karapatan na amin ya membro da, no panon ya labay dan respetoen na arum so kultura da. Nepeg ya respetoen so karapatan na totoo, inerman so panaayaman da.

Nen Hulyo 8, 2020, nandesisyon so Supreme Court of Justice ya pabor ed saray Tasi nen Jehova. Ingganggan da ya amin ya pinataynan et nayari lan ompawil ed komunidad da. Imbalikas nen Agustín so liket ya nalilikna to tan saray kakaiba to: “Misalsalamat kami tan malikeliket kami lapud ginawa na saray agagi parad sikami. Anggapoy nagawaan mi, maong labat ta tinulongan da kami.”

‘Baleg ya Sakripisyo Parad Daiset ya Totoo’

Kaleganan to, saray agagi tayo ed San Juan de Ilumán, sakey ya baryo ed Ecuador ya panaayaman na dakel ya katutubon totoo na Otavalo Valley, et napapasegsegang met. Nen 2014, kayari dan akompleto so amin ya kaukolan ya permit, ginapoan dan ipaalagey so sakey ya Kingdom Hall. Balet indaulo na sakey a pari so masulok ya 100 a totoo tan puersaan dan pinatunda iray mangipapaalagey. Insan binawalan na komunidad iray Tasi nen Jehova ya mantitipon parad panagdayew da.

Nantulongan iray legal department diad Ecuador Branch tan diad world headquarters pian idepensa so kongregasyon manlapud sayan panangataki ed karapatan dan mandayew. Insegep itan na saray agagi tayo ed korte. Tampol ya intunda na komunidad so pampapasegsegang dad saray agagi tan inabuloyan day kongregasyon ya mantitipon lamet tan sumpalen so ipapaalagey dan Kingdom Hall. Balet pian naprotektaan so karapatan na saray agagi tayo diad arapen, kinerew na saray abogadon agagi tayo ed saray ataragey ya korte ya manggaway desisyon nipaakar ed sakey ya importantin isyu: Kasin nepeg ya respetoen na saray katutubon komunidad iray internasyonal ya totontonen parad karapatan na too?

Nen Hulyo 16, 2020, dinengel na Constitutional Court of Ecuador, say sankatageyan ya korte diad bansa, so kaso. Inrepresenta na saray agagin abogado diad Ecuador so kongregasyon. Kaaruman ni, apatira ed saray agagi tayo ya eksperiensyadon internasyonal ya abogado so akitongtong ed korte. Lapud saray restriksion na COVID-19, akitongtong ira panamegley na videoconference manlapud nanduruman bansa. Aya so sankaunaan ya pankanawnawa ya inabuloyan na korte so sakey ya legal team ya mangirerepresenta ed saray Tasi nen Jehova diad interon mundo ya ipresenta iray argumento da ed onian paraan.c Binitla na team iray internasyonal ya legal ya autoridad pian paneknekan ya saray katutubo et agda nepeg ya ibaliwala so karapatan da bilang indibidual lapu labat ta kabiangan ira na sakey ya katutubon komunidad.

Tatalaranan na saray agagi tayo diad Otavalo Valley so desisyon na Constitutional Court. Balet kaleganan to, misalsalamat la ra ed naawat dan tulong. Oniay imbaga nen César, sakey ya elder ed Ilumán Quichua Congregation: “Si Jehova labat so manggawa na ontan kabaleg ya sakripisyo parad daiset ya totoo panamegley na organisasyon to.”

Amin ya abogado ya kaiban angidepensa ed saray kaso et Tasi nen Jehova, tan maliket iran manginabang ed amin ya amta ra ed legal iran pamaakaran ya anggapoy bayar. Balet siansia nin kaukolan so panaon tan kuarta ed pangisegep tan pamparaan ed saray kaso, tan pangilaban ed saratan ed korte. Saray abogado tan arum nin agagi tayo et angusar na masulok ya 380 ya oras pian niparaan iray legal ya argumento tan 240 ya oras pian ipatalos iray dokumento parad hearing ed Mexico. Ngalngali 40 ya abogado manlapud nanduruman pasen na mundo so angusar na nilasus ya oras ed samay kaso diad Ecuador. Iner so angalaan ed saray ginastos ed impangidepensa ed saray agagi tayo? Diad saray donasyon ya inter yo diad nanduruman paraan ya naromog ed donate.jw.org. Salamat ed saray maliket ya indonasyon yo.