Mankanta na Panangigalang ed si Jehova
“Kantaan ko si Jehova, ta analo a magloria.”—EXODO 15:1.
1. Antoran atributo tan kalidad nen Jehova so mangiiter ed sikatayo na rason a sikato so igalang tayo?
LABIN-TALON danay a mangiiter so Salmo 150 na ganggan ya igalang si Jehova odino si Jah. Say unor a bersikulo so mangiyaabawag: “Amin a bengatla ya wala so panlinlinawa to idayew to si Jehova. Idayew yo si Jehova.” Bilang Tastasi nen Jehova, amta tayo a makanepegan si Jehova na galang tayo. Sikato so Sankatalbaan a Soberano, say Sankatageyan, say Ari ed andi-anggaan, say Manamalsa tayo, say Mananumang tayo. Sikato so andiay-kapara, nikadkaduma, tan agnikumpara, agnaparaan ed dakel a paraan. Sikato so anggapoy anggaan ed kakabatan tan pakayari, naspot ed inkahustisya, tan pinagka-uliran ed aro. Manuna ed amin et sikato so maong; sikato so matoor. (Lucas 18:19; Apocalipsis 15:3, 4) Kasin sikato so makanepegan na panangigalang tayo? Talagan sikato so makanepegan!
2. Antoray rason tayo ed pangibalikas na otang a linawa ed si Jehova?
2 Si Jehova so makanepegan aliwa lambengat ed panagdayew tan panangigalang tayo noag ontan met ed otang a linawa tan pisasalamat tayo ed amin a ginawa to para’d sikatayo. Sikato so Manangiter na “amin a maong a palankap tan amin ya ayadyarin palankap.” (Santiago 1:17) Sikato so Subol, say Lapuan, na amin a bilay. (Salmo 36:9) Amin a bengatlan pangagayagaan tayo bilang membro na atooan a rasa so manlalapud sikato, lapud sikato so Engranden Manamalsa tayo. (Isaias 42:5) Sikato met so Manangiter ed amin ya espiritual a bendisyon ya onsasabi ed sikatayo diad panamegley na espiritu to, organisasyon to, tan diad Salita to. Napeperdona iray kasalanan tayo diad letnegan na impangitarok ed Anak to bilang dondon tayo. (Juan 3:16) Walaan tayo na ilalo ed silong na Panarian ed “saray tawen a balo tan dalin a balo, a sikara so pana-ayaman na katunongan.” (2 Pedro 3:13) Walaan tayo na maabig a pililimog ed saray kaparan Kristiano. (Roma 1:11, 12) Walaan tayo na kagalangan tan saray gungguna ed pagmaliw a Tastasi to. (Isaias 43:10-12) Tan walaan tayo na mablin pribilihyo na panagpikasi. (Mateo 6:9-13) Peteg a walaan itayo na daakan a katunongan pian pisalamatan si Jehova!
Saray Paraan a Nigalang Tayo si Jehova
3. Diad antoran nanduruman paraan a nigalang tan nibalikas tayo so otang a linawa tayo ed si Jehova?
3 Bilang angitalagan ariripen nen Jehova, panon tayon igalang tan ibalikas so otang a linawa tayo ed sikato? Nagawaan tayo itan diad pibiang ed Kristianon ministeryo—panagtasi ed kabkaabungan, panagpawil, panangikondukta na saray panangiyaral ed Biblia, tan panagtasi ed lansangan. Sikato met so nigalang tayo diad impormal a panagtasi bektan wala so pankanawnawa. Tan lamet, nigalang tayo si Jehova diad maptek a kondukta tayo, anggan diad panamegley na mauksoy tan masimpit a panangawes tan panag-ayos tayo. Mabetbet a pandinayewan iray Tasi nen Jehova lapud pagmamaliw dan uliran ed sarayan pamaakaran. Nagkalalo ni, nigalang tan napisalamatan tayo si Jehova diad panamegley na pikakasi.—Nengnengen so 1 Awaran 29:10-13.
4. Anto so sakey ed sankarakpan iran paraan a nigalang tayo so maaron mangatatawen ya Ama tayo?
4 Nilikud ed saya, sakey ed sankarakpan iran paraan a nigalang tayo so maaron mangatatawen ya Ama tayo et diad pangitandoro ed sikato tan ed saray kaabigan to diad panamegley na makapaayat iran kanta nipaakar ed Panarian. Dakel a managtugtug tan saray kompositor so miabobon a say sankaabigan ya instrumento ed musika et say boses na too. Saray maestro ed musikan klasikal so mangegemtan a mansulat na saray opera lapud wala so baleg a gayaga ed italineng ed nipaatagey a boses na toon mankakanta.
5. Antoray rason a nepeg tayon seryosoen so panagkanta tayo ed saray kanta nipaakar ed Panarian?
5 Agaylan nangayagaan nen Jehova so italineng ed mangakantan totoo, nagkalautla sano mankanta ira na saray kanta na panangigalang tan pisasalamat! Maseguro, sirin ya ipapuso tayoray pananganta tayo na saray kanta nipaakar ed Panarian ed nanduruman pandoroypo tayo—diad saray miting ed kongregasyon, sirkiton asamblea, espesyal iran agew na asamblea, distrito iran kumbension, tan internasyonal iran kumbension. Saray panagkantaan tayo so walaan na dakel a talagan marakep a melodya, say inkarakpan to et mabetbet a pandinayewan na saray taga-paway. Legan a sikatayo so naliliketan a mangakanta ed saray kanta nipaakar ed Panarian, nagkalalon napaliket tayoray arum tan nagunggunaan tayo so inkasikatayo.
Panagkanta na Saray Panangigalang ed si Jehova ed Panaon na Biblia
6. Panon ya imbalikas na saray Israelita so apresasyon da ed inkiliktar da ed Ambalangan Dayat?
6 Ibabaga ed sikatayo na Salita na Dios a si Moises tan arum niran Israelita so nankantan sitatalona kayari inkiliktar da manlapud armada nen Paraon ed Ambalangan Dayat. Ginmapo so kanta ra ed saray salitan: “Kantaan ko si Jehova, ta analo a mangloria. Say kabayo tan say nankabayo inpataboy to ed dayat. Si Jehova so biskeg ko tan kantak, tan sikato so nagmaliw a kilabanan ko; sikato ya so Dios ko, tan sikato so igalang ko.” (Exodo 15:1, 2) Naisip tayo so entusiasmo tan gayaga na saray Israelita legan a kakantaen darayan salita kayari na mamilagron inkiliktar!
7. Antoray arum a makatantandan agawa ya inkurit na Hebreon Kasulatan nipaakar ed panangigalang na saray Israelita ed si Jehova diad kanta?
7 Diad 1 Awaran 16:1, 4-36, nabasa tayo a si Jehova so ingalang diad impankanta tan impantugtug na saray instrumento ed musika sanen intarok nen David so Kaban ed Jerusalem. Talagan saman so sakey a magayagan okasyon. Wala met so panagkanta na panangigalang ed si Jehova a tinekepan na musika na instrumento ed panaon ya indedika nen Arin Solomon so templo diad Jerusalem. Nabasa tayo itan ed 2 Awaran 5:13, 14: “Agawa, sanen saray managtrompeta tan managcanta sikara so singa saksakey, pian gawaen da so sakey a tanol ya narengel ed panangigalang tan pisalamat ed Jehova; et sanen inatagey da so voces da a pati saray trompeta tan saray cimbalo tan saray kagawaan na togtog, tan ingalang da si Jehova, ya inkuan da, Ta sikato’y maong; ta say abig na linawa to magnayon lawas; a nen saman say abung napno’y lurem, salanti say abung nen Jehova, dia ed ontan a saray sacerdote agda ayarian so nanalagey a mankatangbayan nisengeg ed lurem; ta say gloria nen Jehova pinano to so abung na Dios.” Anto so ipapanengneng na satan ed sikatayo? A si Jehova so tinmalineng ed sayan melodyan panangigalang tan aliketan met ed satan, unong ya impanengneng na labas-ed-natural a lurem. Diad saginonor, wala so panagkanta na duaran koro ed panaon na inagurasyon na saray pader na Jerusalem ed saray agew nen Nehemias—Nehemias 12:27-42.
8. Anto so mangipapanengneng a say panagkanta so sineryoso na saray Israelita?
8 Diad tua, say panagkanta so ontanlan importanti a kabiangan na panagdayew ed templo a sengegay impangibiig na 4,000 a Levita para’d panagtugtug. (1 Awaran 23:4, 5) Saraya so kaantabay na saray managkanta. Say musika, nagkalautla ed saray managkanta, so walaan na importantin pasen ed panagdayew, aliwan lapud panangipasepsep ed ambetbelat iran pamaakaran na Ganggan, noagta pian mangiter na dugan espiritu ed panagdayew. Tinmulong itan ed saray Israelita pian mandayew ed si Jehova ed paraan a napno na espiritu. Imanoen so panagparaan tan imano ed pangidetalye a nitalaga ed sayan kabiangan: “Say bilang da, pati saray agagi ra ya inpasal ed panagcanta ed Jehova, salanti amin a maronong, sikara so duanlasus walomplo tan walo.” (1 Awaran 25:7) Imanoen no panon dan seseryosoen so panagkanta na panangigalang ed si Jehova. Sikaray inpasal a mankanta tan magmaliw ya eksperto!
9. Anton panangidanet so niiter ed panagkanta diad Kristianon Griegon Kasulatan?
9 Nen inmunan siglo na komon a panaon tayo, anto so nanengneng tayo? Si Jesus, diad labi na impangitapat ed sikato, anggaman ed dakel ya importantin bengatla’d kanonotan to et akalikna ni na pankaukolan a saraan to so selebrasyon na Paskua tan say panangiletneg na Memoryal na ipapatey to diad pankanta na saray panangigalang ed si Jehova. (Mateo 26:30) Ontan met, nabasa tayo a “dia ed pegley labi,” si Pablo tan si Silas, kayarin pinekpek tan impangaw et “manpipikasira, nankakanta ra na himno [nipaakar] ed Dios, et saray pinangaw ya wadman sikara so dengdenglen da.”—Gawa 16:25.
Pankanta na Saray Panangigalang—Importantin Kabiangan na Panagdayew Tayo
10. Antoran ganggan so iiter na Salita na Dios no nipaakar ed panangigalang ed sikato diad kanta?
10 Kasin liknaen yo a say panagkanta na saray kanta nipaakar ed Panarian so aliwan ontanlan importanti ya ikdan na impapuson panangimano? No ontan, agta nepeg mon surien lamet itan a bengatla, lapud kaimportantian ya iiter nen Jehova a Dios tan si Jesu-Kristo ed pankanta na saray panangigalang? Siempre, say Salita na Dios so napno na saray ganggan a mangigalang ed si Jehova tan mankanta na saray panangigalang ed sikato! Alimbawa, diad Isaias 42:10, nabasa tayo: “Ikantaan yo si Jehova na sakey a balo a canta, tan say galang to a manlapu ed sampot na dalin; sikayo ya onlepsag ed dayat, tan saray amin a wala ed sikato, saray polpolo, tan saray manaayam ed sikara.”—Nengnengen met so Salmo 96:1; 98:1.
11. Antoran panonot so inter nen apostol Pablo no nipaakar ed panagkanta?
11 Amta nen apostol Pablo a say panagkanta so mamaliket ed sikatayo, kanian sikatayo so amiduan pinanonotan to nipaakar ed saya. Nabasa tayo ed Efeso 5:18, 19: “No ag ingen napano kayo komon na Espiritu; a mansasalita so sakey tan sakey ed sikayo na saray salmo tan saray himno tan kankancion a nipaakar ed espiritu, ya mankankanta tan irayrayew yo ed saray kapusoan yo so Katawan [Jehova, NW].” Tan diad Colosas 3:16, nabasa tayo: “Manayam komon so salita nen Cristo ed sikayo a sankayamanan ed amin a kakabatan. Bangatan tan bilinen so sakey tan sakey ed saray salmo tan himno, tan saray kanta a maespiritu, kankantaen a katekep na gracia ed kapusoan yo a nipaakar ed Dios.”
12. Antoray alimbawa na saray kanta tayo ya ontutulong ed sikatayo a manbangat tan mangipanonot ed balang sinansakey?
12 Imanoen a diad kada pankanawnawa et naulit-ulit a tinukoy nen Pablo so panagkanta, sanen sasaglawien to ‘iray salmo tan saray himno tan espiritual a kankancion, a mankankanta ed saray kapusoan.’ Ontan met, say ununan-salita to ed saray taga Colosas a diad panamegley na saya et sikatayo so nayarin “bangatan tan bilinen so sakey tan sakey.” Tan satan so peteg a gagawaen tayo, a singa nanengneng a mismo ed saray titulo na saray kanta tayo—“All Creation, Praise Jehovah!” (numero 5), “Be Steadfast, Unmovable!” (numero 10), “Be Joyful for the Kingdom Hope!” (numero 16), “Fear them Not!” (numero 27), “Laud Jehovah Our God!” (numero 100), diad pangiter labat na pigaran alimbawa.
13. Panon a say “matoor tan makabat ya aripen” so angipanengneng na kaimportantian ed panagkanta bilang kabiangan na panagdayew tayo?
13 Mitunosan ed sarayan ganggan, “say matoor tan makabat ya aripen” so angiyuksoy a saray pandoroypo tayo—saray miting ed kongregasyon, sirkiton asamblea, saray agew na espesyal ya asamblea, distrito iran kumbension tan internasyonal iran kumbension—so lulukasan tan sasampotan ed pankanta na saray kanta nipaakar ed Panarian. (Mateo 24:45) Niyarum ed saya, niyeskedyul iray kanta a kantaen ed arum niran panaon legan na sarayan pandoroypo. Lapud saray miting tayo so gendagendat ya igagapo ed pankanta na sakey a kanta nipaakar ed Panarian, agta manepeg lambengat a panggunaetan tayon onsabi ed suston oras, masakbay a tuloy pian makapibiang ed satan a kabiangan na panagdayew tayo? Tan lapud saray miting so sasampotan na panagkanta, agta nepeg a sikatayo so mansiansia angga ed pansaran kanta tan pikakasin isusublay a tampol?
14. Antoray walan alimbawa tayo ed saray matukoy a kanta a napipili ed saray programa tayo?
14 Saray kanta ed saray miting tayo so maalwar a pinili pian mitunosan ed programa. Alimbawa, diad “Madibinon Panangibangat” a Distriton Kumbension nen 1993, say kanta numero 191, “Make the Truth Your Own,” a mamapaseseg ed Kristianos a mibakal sumpad Satanas, ed mundo, tan ed makasalanan a laman, so tampol a tinumbokan na taloran paliwawa a misiglaotan ed sarayan kabusol. Ontan met, say kanta numero 164, “Children—Precious Gifts From God,” a napno na panonot para’d atateng, so tinumbokan a tampol na taloran paliwawa ya angipabitar ed saray obligasyon na atateng diad panangipasal ed saray anak da. Say kanta numero 70, “Be Like Jeremiah,” so manuna ed serye na saray paliwawan nibased saray propesiya nen Jeremias. Tan kayari na sakey a manaalawatan a paliwawa na nanduruman aspekto na ministeryo ed Panarian et sinmublay met so kanta numero 156, “I Want To,” kantan nipaarap ed panaglingkor. Mipadparan alwar so aagamilen diad panpili na saray kanta para ed Panagaral na Panag-Bantayan, Tipon ed Panagserbi, tan Eskuelaan ed Teokratikon Ministeryo. Kanian sano saray mamatatken so mangiter na mapublikon paliwawa tan saglawien da so kantan usaren diad pangilukas na programa, nepeg dan pilien so kantan mitukoyan ed tema na paliwawa ra.
15. Panon a napalaknab na tserman ed miting so apresasyon para’d kanta a kantaen?
15 Diad pangiyanunsyo ed kantan usaren, nayarin napalaknab na tserman so apresasyon para’d kanta diad panaglawi ed paulo odino tema na kanta. Sikatayo’y agmankakanta na saray numero noagta saray Makasulatan a tema. Ontan met, natulongan so kongregasyon a nagkalalon mangapresya ed kanta no say kasulatan a nipabitar ed silong na paulo so salambiten. No ontan, nayarin matukoy met so panaglawi na pigaran bengatlan misiglaotan ed satan, ta pian nalikna na amin so espiritu na kanta.
Mangipanengneng na Apresasyon ed Kaabigan nen Jehova diad Pankanta
16. Panon tayon nalimbos ed espiritu na saray kanta tayo?
16 Lapud saray liriko na saray kanta tayo nipaakar ed Panarian so napno na kabaliksan, kaukolan ya akapuntirya iray kanonotan tayo ed saray salita legan a kakantaen tayora. Labay tayon nalimbos na espiritu ed kada kanta. Say arum, a singa samay nipaakar ed aro, sakey a bunga na espiritu so impapuso. (Galacia 5:22) Saraya so kakantaen tayo tekep na sigla tan petang. Say arum so magayaga, tan panggunaetan tayon kantaen iratan a maliket a tuloy. Say arum met so mapuersan panmartsan kanta, tan saraya so nepeg a kantaen tekep na entusiasmo tan mabiskeg a talek. Diad Eskuelaan na Teokratikon Ministeryo tayo, sikatayo so nasisimbawan mangipatnag na petang tan liknaan ontan met ed entusiasmo ed saray presentasyon tayo. Say pangipatnag na petang, liknaan, tan entusiasmo sano kakantaen iray kanta tayo so nagkalalon importanti.
17. (a) Anton panamaat so initer ed saray agmatoor ya Israelita ya agtayo labay a niyaplika ed panagkanta tayo? (b) Antoray resulta sano seryosoen tayo so panonot a lugan na saray kanta tayo?
17 No kantaen tayoray kanta tayo nipaakar ed Panarian a say isip tayo et walad arum a bengatla, ya agsigpot ya aapresyaen so kabaliksan na saray salita, agta sikatayo so magmaliw a singa saramay agmatoor ya Israelita a binaat lapud, legan a papagalangan da so Dios diad saray bibil da, saray puso ra so arawin tuloy met ed sikato? (Mateo 15:8) Agtayo labay itan a panangondenan onaplika ed paraan na panagkanta tayo ed saray kanta nipaakar ed Panarian, agta ontan? Diad panamegley na pankanta a mangipanengneng na apresasyon tayo ed saray kanta nipaakar ed Panarian, agtayo lambengat nasagyat so inkasikatayo noagta pati saray kaabay tayo’d yurongan diad Kingdom Hall, ontan met iray kalangweran. On, no ipapuso tayon kantaen iray gunggunan manlalapud saray kanta diad saray Kingdom Hall tayo, saya so magmaliw a mabiskeg a panamabiskeg pian magmaliw a maseseg ed ministeryo tan naarawian iray patit na gawan-mauges.
18. Anto so epekto na impankanta ed saray kanta nipaakar ed Panarian ed sakey a bii?
18 Naulit-ulit, saray taga-paway so mandinayew ed panagkanta tayo na saray kanta nipaakar ed Panarian. Aminsan et onia so impalapag na Say Panag-Bantayan: “A say panagkanta tayo so nayarin onkanan paraan pian nawalaan iray totoo na pikakat ed si Jehova a Dios so ipanengneng na eskperiensia na abaustismoan a bii nen 1973 a ‘Madibinon Impanbiktorya’ ya Asamblea, ed Yankee Stadium, syudad na Nueva York. Sikato’y inmunan dinmalaw ed lokal a Kingdom Hall a bukbukor to tan inatendian to so duaran miting. Legan a mankakanta so kongregasyon . . . ‘Keep Your Eyes on the Prize!,’ sikato so mandinayew a tuloy ed saray salita tan ed paraan na impankanta ed saraman, a deniside ton labay to so napibilang. Kayari to et inasinggeran to so sakey ed saray Tasi tan kinmerew a paiyaralan na Biblia, tan [sikato so] nantultuloy ya inmaligwas anggad nagmaliw a sakey a Kristianon tasi nen Jehova.”
19. Anton kaunoran a panamaseseg so niiiter no nipaakar ed sigpot-puson panagkanta ed saray kanta tayo nipaakar ed Panarian?
19 Kaslakan ed saray miting tayo et dagdaiset lambengat iray pankanawnawa a nibalikas na saray dumerengel iray liknaan tan apresasyon da. Balet sikatayon amin so makapangibalikas na liknaan tayo nipaakar ed kaabigan nen Jehova diad impapuson pibiang ed pankanta na saray kanta na Panarian. Nilikud ed saya, sano sikatayo so mantitipon, agta sikatayo so maliket? Kanian sikatayo so makaliknan labay tayo so mankanta! (Santiago 5:13) On, no panon ya aapresyaen tayo so kaabigan nen Jehova tan say agkanepegan a panangasi to, sikatayo so sigpot-kamarerwan mankanta na panamagalang ed sikato.
Panon Yon Ebatan?
◻ Anto so duaran manunan rason ed panangigalang ed si Jehova?
◻ Diad antoran nanduruman paraan a nigalang tayo si Jehova?
◻ Anto so sakey ed saray sankarakpan a paraan a nigalang tayo si Jehova?
◻ Antoray niwalan Makasulatan ya alimbawa ed sikatayo diad panangigalang ed si Jehova diad kanta?
◻ Panon tayon makapanggawa na inkahustisya diad pankanta tayo na saray kanta nipaakar ed Panarian?
[Kahon ed pahina 11]
Pangayagaan Iraman a Kanta!
Ompapatnag a say arum et samet a naiirapan ed panaral na dakel ed saray balon kanta. Anggaman ontan, dakel a kongregasyon so andian na problema ed panagkanta na maslak ed sarayan kanta. Angangko ta samet a sagpot so nakaukolan pian naaral so singa diad inmuna et agkabisado. Bektan nikabisado iratan a kanta, mabetbet a lalon aapresyaen na kongregasyon iratan nen say saray agmankakaukolan na sagpot pian aralen. Diad ontan et amin ed kongregasyon so makapankantan sitatalek. On, napangayagaan da iratan a kanta!
[Kahon ed pahina 12]
Mankanta na Saray Kanta Nipaakar ed Panarian Diad Saray Sosyal a Pandoroypo
Say panagkanta tayo ed saray kanta nipaakar ed Panarian so aglambengat gagawaen ed Kingdom Hall. Si Pablo tan si Silas so nankanta na saray panangigalang ed si Jehova legan a walad pangawan. (Gawa 16:25) Tan inkuan nen babangatan a Santiago: “Wala ta so siopaman a naliliketan? Mankanta na saray panangigalang ed Dios.” (Santiago 5:13, NW, paimanod-leksab) Diad saray sosyal a pandoroypo amin so maliket. Kanian akin ya agmankanta na saray kanta nipaakar ed Panarian? Saya so nagkalautlan makapasagyat no say panagkanta so babansagan na piano odino gitara. Ontan met, wadtan iray piano tape na saray kanta tayo nipaakar ed Panarian; dakel a pamilya na Tasi so walaan na album na sarayan tape. Saraya so aglambengat onkakanan maong ed pamabansag ed saray panagkanta noagta marakep met a background music.
[Litrato ed pahina 8, 9]
Kayari inkiliktar ed Ambalangan Dayat, imbalikas na Israel so gayaga ra ed kanta
[Litrato ed pahina 10]
Say magayagan kanta so sakey a kabiangan na Kristianon panagdayew natan