Kasin Importanti No Panon so Panagdayew Yo?

SAY melag a baley na Aprika so singa palbaan lapud alay petang no kapegleyay agew. Manlapud kabangibang a baryo et narengel so tanol na tambol, kansionan, tan magayagan panagtipak. Balet saya so aliwan sakey a sosyal a panligliwaan. Onia so abangonan a panagdayew na saray Aprikano. Anggaman ontan, saray tanol so mimamatsa ed ingal na saray boses a manlalapud kabangibang a simbaan na saray karismatiko. Nagagawa diman so mamilagro “iran panagtambal” tan pansasalita na nanduruman lenguahe na saray managdayew ya ag-ontundan manliliket. Diad biek a sampot na baley et wadman so sakey nin nengneng na panagdayew. Say makbaw a boses na sakey a muezzin a manatawag ed kapara iran Muslim ed pikakasi.

On, say relihyoson debosyon ed nambabangil a nengneng so naimano ed dakel a syudad tan baley ed Aprika. Diad loob na saray kapolian, saray Aprikano so kontento lan ontumbok ed dili ran relihyoso iran abangonan. Balet sinmabi iray misionero na Kakristianoan, a tinumbokan daray armada na nanduruman bansa ed Europa, tan siruruksan analin “gawaen-a-Kristiano” so amin​—pati saray personal a ngaran da.

Say nansumpalan? Sakey a nengneng na relihyon a pinansasamok na abangonan iran sisiaen ya Aprikano tan agagamil tekep na nanlapud arum a bansa iran relihyoson pananisia. Anggad sayan agew dakel a “Kristiano” iran managdayew so manguusar na abangonan iran galing tan anting-anting. Siansian, aliwan tuloy so pangilalaman na saray misionero na Kakristianoan ed tuan Inkakristiano, tan sikaray amatawir na embel na linawa. Diad baleg a kabiangan et sikaray responsabli ed sarado’d-kanonotan ya awawey nipaakar ed Biblia a wala ed limog na pigaran Aprikanon nasyon natan.

Anggaman kuan, dakel a pormay “Inkakristiano” so malaknab nin aagamilen. Diad agano niran taon et nagkalautlan binmantog iray karismatikon relihyoson grupo; dinmaak iray iglesian mantatambal diad panamegley na pananisia. Insalaysay na sakey a kolumnista ed peryodiko so panasagyat na sarayan iglesia diad impakaimano a ‘say ideya na Aprikano ed relihyon so manunan utilitarian. Diad pakaamta na Aprikano, say relihyon so kaukolan a mamawala na direktan materyal ya inkapnek ed bilay na too. Kanian, diad Aprikano a manisian say espiritual a media so kapilitan ed ngalngali amin a bengatla, say modus operandi na espiritual [odino panagtambal diad pananisia] iran iglesia so mitunosan ed kekerewen na paraan na kabibilay to.’ Balet, makapaermen, dakel ya iglesian karismatiko so malinew ya inletneg pian mamawala na kuarta.

Natan et wala lay masulok ya 6,000 a relihyoson sekta ed Aprika. Nayarin liknaen mo ya amin na mamebenben ed sarayan relihyon tan sekta so walaan na tombok ed kilalaban. Balet say importantin tepet et, Anto so liknaan na Dios?

Kasin Makapaliket ed Dios so Anggan Anton Relihyon?

Maseguro, sikatayo so agpaulyanan na say Manamalsa na talba ya andiay panangidirehi ed sayan bengatla. (Amos 3:7; Gawa 17:26, 27) Tan magenagenap so ebidensya a naromog so madibinon panangiwanwan ed Biblia. Andi, say Biblia so aliwan libro na saray amputi, a singa tawag ed saya na pigara. Diad tua, anggapoy too​—andeket man odino amputi—​so napagalangan nipaakar ed saya. ‘Amin a Sulat so inpuyan na Dios,’ kuan na 2 Timoteo 3:16. Say inkapeteg, simpli iran bangat ed Biblia, say inkadaan to, say intalona to anggaman ed maruksa iran panangataki’d saya, say susto iran propesiya to tan say agnaparaan a sankagloboan a sirkulasyon to​—saraya so malinew a paneknek ed madibinon inka-autor to.

Anto so ibabangat na satan a libro ed sikatayo? Manuna, ibabaga na saya ed sikatayo a wala labat so saksakey a “tua’n Dios.” (Juan 17:3) No ontan, panon a wala so katuaan ed amin a relihyon? Agta saray relihyoson grupo so mansusumlangan ed balang sinansakey no nipaakar ed no siopa tan ed no anto so Dios? Sinaglawi na managsulat na Biblia a si Santiago so “puro tan tuan relihyon.” (Santiago 1:27, Today’s English Version) No walay pankaukolan ed pamidbir na tuan relihyon, peteg a wala met so palson relihyon. Sumlangen na saya so ideya ya amin a relihyon so nanduruma labat a dalan ya iyaasingger ed Dios.

Saray Estandarte na Manamalsa ed Panagdayew

Anto ta so suston paraan na panagdayew ed Dios? Ibabangat na Biblia ed sikatayo a say tuan panagdayew so manlalapud suston pikakabat. Aminsan et imbaga na baleg a propeta a si Jesu-Kristo ed sakey a biin Samaritana: “Sikayo igalang yo so agyo amta.” (Juan 4:22) Kasin saya so tua met ed sika? Kasin nibangat la ed sika a say Makapanyarin-amin a Dios et walaan na personal a ngaran, a Jehova? (Salmo 83:18) Kasin amtam no antoray gagala to nipaakar ed too tan ed dalin? (Mateo 6:9, 10; Efeso 1:9, 10; 3:11) Kasin mangiyoopresi so relihyon mo ed sika na realistikon ilalo na magmaong ya arapen? Tan no ipasen mo so inkasika a sakey a Kristiano, kasin nisalaysay mo so pananisiam manlapud Kasulatan, odino kasin saraya so nipatawir lambengat ed sika ya andiay panagsuri?

No naimanom a kulang ka na suston pikakabat, nagamoran mo itan diad panamegley na panagaral ed Salita na Dios, say Biblia. Ilaloan nen Jehova a Dios a saray tuan managdayew to et nakabisado da no antoy ibabangat na satan a Sagradon Libro. Nagkalalo ni ed satan, ilaloan ton iyaplika ra itan ed bilay da. Say awawey tayo so nepeg a mipara ed imbaga na salmista: “Say salitam sikato so sakey a silewan ya onkana ed saray salisalik, tan sakey a liwawa ya onkana ed basbas ko.” (Salmo 119:105) Diad anton kalaknab a tinulongan ka na relihyon mo pian naamtaan tan natalosan so Biblia?

Say sakey nin importantin kabiangan na tuan panagdayew et say pananisia ed si Jesu-Kristo, ya aliwa lambengat bilang sakey a baleg a propeta noagta bilang bugbugtong ya Anak na Dios. Malinew ya iyaabawag na Kasulatan a si Jesus so “Manunan Ahente na bilay.” (Gawa 3:15, NW; 4:12) Dakel so mankuan a walaay pananisia ed si Jesus, balet kaunongay inkatua na pananisia ra? Say tuan pananisia ed Kristo so mankakaukolan na katutulok ed saray bilin to. Impaseseg iya na Dios a mismo sanen inkuanto: “Saya sikato so inadarok ya Anak; sikato so denglen yo.” (Marcos 9:7) Kanian panbabanikelan na saray tuan managdayew a manakar no posibli tekep na alwar ed saray bakat nen Jesus. (1 Pedro 2:21) Say sakey a paraan a gagawaen da iya et diad pibibiang ed mapublikon panagpulong ya inggapo to. (Mateo 4:17; 10:5-7) Kasin papasesegen ka na relihyon mo a nawalaan na personal a pibibiang ed sayan kimey?

Say aro met so kakaukolanen na tuan panagdayew. Nadedeskribe si Jehova a Dios bilang say mismon pinagka-uliran na aro, tan imbaga nen Jesus ed saray patumbok a sikaray nabidbir diad aro ya impanengneng da ed limog da. (Juan 13:34, 35; 1 Juan 4:8) No kunsideraen so dakel a minilyon a totoo natan a mankuan a Kristianos, agta say mundo so nitalem lan tuloy ed aro? Balet, say katuaan to et say mundo tayo so apaneknekan a lugar ya anggapoy anggan samet ya aro. Saray bakal so angetel na minilyon a bilay ed sayan siglo tayo lambengat. Mantutultuloy so idaraak na krimen tan karawalan. Kanian tepetan mo so inkasika, ‘No amin so kabiangan na relihyon ko, kasin say mundo so magmaliw a pasen a napno na panangaro?’

Kaunoran, ipapanengneng na Biblia a saray tuan managdayew so nepeg a mansiansian biig ed mundon agto kabkabat so Dios. Sanen imbiig na Dios so kadaanan a nasyon na Israel pian magmaliw a manamemben na puron panagdayew, pinasakbayan toray totoo to a paliisan so maapit a pililimog ed mauges iran nasyon a walad kaliberliber da. (Deuteronomio 7:1-6) Diad Juan 17:16, si Kristo so angibaga met nipaakar ed saray patumbok to: “Ag ira taga mundo, salanti onong ya ag ak taga mundo.” Saray tuan managdayew ed Dios so agkabiangan na pulitika, imoralidad, maagum a komersyo, odino antokaman iran pilosopiya a manleglemew ed Dios. (Juan 18:36; 1 Juan 2:15-17) Uunoren da so ganggan a walad Roma 12:2: “Ag kayo miabobon onong ed sayan mundo.” Kasin satan so ipapaseseg na say relihyon mon gawaen?

Nagamoran so Tulong

On, talagan importanti ed Dios so paraan na panagdayew yo. Para’d sikato, wala lambengat so sakey a tuan relihyon. (Efeso 4:4-6) Say antikey ya impaningbat tayo so anaglawi ed pigaran manuna iran punto ed bangat na Biblia. Akin ya agpanbanikelan ya aralen so dakel ni?

Antokaman so binalegan yon relihyon, natulongan kayo na saray Tasi nen Jehova nipaakar ed sayan pamaakaran. Sikaray kabkabat ed sankagloboan lapud impasyan edukasyonal a kimey da ed Biblia. Sikaray nitalagan ontulong ed totoo ed amin a rasa tan nanlapuan a relihyon pian makagamor na mas aralem a pakatalos ed Biblia. (Uliran 2:1-6) Sikaray mangipapalapag na literatura ed Biblia a sinukimat a maong.a Diad tua, sikara ni ingen so onlad ayaman yo ya andiay bayar pian personal a bangatan da kayo nipaakar ed Biblia. Minilyon a totoo ed sankamundoan so diad kaplesan et nagugunggunaan ed sayan edukasyonal a programa ed Biblia. Akin ya agmo gawaen iya ed inkasika? Peteg, importantin gawaen mo iya lapud talagan importanti no panon so panagdayew mo.

[Paimano ed leksab]

[Litrato ed pahina 5]

Ontanlan lingo so impangilaman na saray misionero na Kakristianoan ed tuan Inkakristiano

[Litrato ed pahina 5]

Dakel ya iglesian karismatiko so manamawalay kuartan negosyo

[Litrato ed pahina 6]

Say pananisia ed si Jesus so sakey a makanan kabiangan na tuan panagdayew

[Litrato ed pahina 7]

Saray Tasi nen Jehova so ontutulong ed minilyon pian makagamor na suston pikakabat diad panamegley na saray libren panangiyaral na Biblia ed ayaman