Panamayubo na Maridios a Takot
“Ontakot ka ed Jehova, tan onarawi ka ed mauges.”—ULIRAN 3:7.
1. Para’d siopa a nisulat so Uliran?
SAY libro na Biblia ya Uliran so daakan ed espiritual a simbawa. Diad gapo intarok nen Jehova iyan giyan-libro pian bangatan so tipikon nasyon ton Israel. Natan, saya so mangitatarok na makabat iran balikas para’d masanton Kristianon nasyon to, “ya asabian da so kasumpalan na saya’n panaon.”—1 Corinto 10:11; Uliran 1:1-5; 1 Pedro 2:9.
2. Akin a say pasakbay ed Uliran 3:7 so nipanpanaon a tuloy natan?
2 No ilukas tayo ed Uliran 3:7, nabasa tayo: “Agka komon makabat dia ed saray dili a matam; ontakot ka ed Jehova, tan onarawi ka ed mauges.” Nanlapulad panaon na saray inmunan ateng tayo, sanen sinagyat na Uleg si Eva ed sipan a ‘naamtaan [da] so maong tan mauges,’ say kakabatan labat na too so sinmaew a mangebat ed saray pankaukolan na totoo. (Genesis 3:4, 5; 1 Corinto 3:19, 20) Anggapo niy panaon ed awaran a saya so lalon mapatpatnag nen say koma-20 siglo—diad “kaunoran iran agew” sano say katooan, a manaani ed saray bunga na ateistikon kanonotan ed ebolusyon, so babakbaken na rasismo, karawalan, tan amin a nengneng na imoralidad. (2 Timoteo 3:1-5, 13; 2 Pedro 3:3, 4) Saya so ‘balon mundon ag-inkauksoy’ ya agbalot naiuksoy na NU nisay kabiangan na saray relihyon na mundo.
3. Antoran nagawgawa so nipropesiya ed agew tayo?
3 papakabat ed sikatayo na mapropetikon Salita’y Dios a saray demonikon puersa so oonla “ed saray arari na amin a mundo, pian tiponen da ra ya ipaaran ed bakal na baleg ya agew na Dios, a Makapanyarin amin . . . ed pasen a dia ed Hebreo mangaran na Armagedon.” (Apocalipsis 16:14-16) Asingger la sano sarayan arari, odino manuley, so naliktob na takot a manlalapud si Jehova. Satan so mipadpara ed kebbiew ya asagmak na saray Cananeo sanen sinmabi si Josue tan saray Israelita pian idapo so panangukom ed sikara. (Josue 2:9-11) Balet natan say sakey ya ireretrato nen Josue, si Kristo Jesus—ya “ARI NA SARAY ARARI, TAN KATAWAN NA SARAY KAKATAWAN”—so ‘manugat ed naciones et sikara so uleyan to ed sakey a tayokor a balat-yang’ bilang balikas na “sanok na Dios a Makapanyarin amin.”—Apocalipsis 19:15, 16.
4, 5. Siopara so nilaban, tan akin?
4 Siopa so nilaban ed satan a panaon? Saramay niliktar, aliwan saramay tinalagnaw na takot, noagta amin na saramay amayubo na mabunigas a takot ed si Jehova. Imbes a magmaliw a makabat ed dilin mata ra, saraya so ‘inmarawi ed mauges.’ Lapud mapaabeba ra, ipapaslep da ed kanonotan da so maabig, ta pian say mauges so agmagmaliw a kabiangan na kanonotan da. Papablien da so mabunigas a panagrespeto ed Soberanon Katawan a Jehova, say “Okom na amin a dalin,” a ngalngali la onkiwas a maneral ed amin a nimedmer ed kaugsan, a singa ed impaneral to ed mauges iran taga Sodoma. (Genesis 18:25) On, para’d dilin totoo na Dios, say “takot ed si Jehova so sobol na bilay, pian say sakey makaarawi ed saray kalot na patey.”—Uliran 14:27.
5 Diad sayan agew na madibinon panangukom, amin a mangidedeboto na inkasikara ed si Jehova a natatakot ompan agmakapaliket ed sikato so makamoria ed katuaan a piguratibon nibaga diad Uliran 3:8: “Sikato [say takot ed si Jehova] naani kasil ed puseg mo, tan utek ed saray pukel mo.”
Panamagalang ed si Jehova
6. Anto so nepeg a mamakiwas ed sikatayon ontalineng ed Uliran 3:9?
6 Say maapresyan takot tayo ed si Jehova, tekep na aralem a panangaro ed sikato, so nepeg a mamakiwas ed sikatayon tumboken so Uliran 3:9: “Igalang mo si Jehova a pati kayarian mo, tan pati saray manunaan a bunga na amin a munat mo.” Sikatayo so ag napipilitan a mangigalang ed si Jehova tekep na saray iyaapay tayo. Saraya so nepeg a boluntaryo, unong a nipanengneng a 12 a danay a manlapud Exodo 35:29 ya anggad Deuteronomio 23:23 nipaakar ed saray panagbagat ed kadaanan ya Israel. Sarayan inmunan bunga ed si Jehova so nepeg a sankaabigan a langkap a niyapay tayo, bilang panamidbir ed kamaongan tan maaron-kaabigan a pangagayagaan tayo ed lima to. (Salmo 23:6) Nepeg ya ipatnag da so desisyon tayo a ‘[mantultuloy] . . . ya anapen ya onona so panarian, tan say inkatonong to.’ (Mateo 6:33) Tan anto so resulta na panamagalang ed si Jehova tekep na ankabli iran kayarian tayo? “Dia ed ontan saray kamalir mo napano ed inkadaakan, tan saray alakan mo manlepuas ira ed balo ya alak.”—Uliran 3:10.
7. Antoran ununan bunga so nepeg ya iyapay tayo ed si Jehova, tan anto so magmaliw a resulta?
7 Say manunan paraan a si Jehova so mamebendisyon ed sikatayo et diad espiritual a dalan. (Malaquias 3:10) Kanian, saray ununan bungan iyaapay tayo ed sikato so nepeg a manuna diad espiritual a paraan. Nepeg tayon usaren so panaon, biskeg, tan pakayari tayo ed panggawa na linawa to. Saya so pinagkatagano tayo, a singa met ed si Jesus a satan a kimey so nagmaliw a manamabiskeg a “tagano” to. (Juan 4:34, NW) Napano iray espiritual a simpenan tayo, tan say gayaga tayo, ya isisimbolo na balon alak, so onlepwa. Ontan met, legan a simamatalek ya ipipikasi tayo so supisienten materyal a tagano ed inagew-agew, sikatayo so mantultuloy a sibubunlok a mangiter manlapud saray kayarian tayo diad panuporta ed sankamundoan a kimey ed Panarian. (Mateo 6:11) Amin a walad sikatayo, pati say materyal a kaykayarian, so nanlapu ed maaron mangatatawen ya Ama tayo. Sikatoy mangikalbo na dakel nin bendisyon, unong ed laknab a panguusar tayo ed ankablin bengabengatla diad kidayewan to.—Uliran 11:4; 1 Corinto 4:7.
Saray Panamaat na Aro
8, 9. Panon so nepeg a panmoria tayo ed panamaat tan disiplina?
8 Diad saray Uli 3 bersikulo 11 tan 12 na Uliran kapitulo 3 et sasalitaen to lamet so maliket a siglaotan na ama tan anak a niwawala ed maridios iran pamilya tan ontan met a niwala ed baetan nen Jehova tan inadaron espiritual ya ananak to ed dalin. Nabasa tayo: “Ana’ ko, agmo modmoraen so pananusa nen Jehova; agka met onsawa ed panamaat to. Ta say aroen nen Jehova baaten to, singa sakey ya ama a manliket ed anak.” Saray totoo ed mundo so agmalabay ed panamaat. Nepeg ya awaten itan na saray totoo nen Jehova. Sarayan salita so inaon nen apostol Pablo manlapud Uliran, a nankuan: “Ana’ko, ag mo mormoraen so panusa na Katawan [Jehova, NW], tan ag ka met onkapuy no simbawaen to ka; ta say Katawan [Jehova, NW] dusaen to so aroen to . . . Tua ya angapo so pananusa natan a singa sengeg na liket, no ag ingen kaermenan. Balet kayari to mangiter na bunga a mareen na katonongan ed saray nailwamla lapu ed sikato.”—Hebreos 12:5, 6, 11.
9 On, say panamaat tan disiplina so nakakaukolan a kabiangan na panangipasal ed balang sakey ed sikatayo, balanglan satan so naawat tayo manlapud saray ateng, diad panamegley na Kristianon kongregasyon, odino legan a dadalepdepen tayo iray Kasulatan diad personal a panagaral tayo. Diad italineng ed disiplina et nalalanor so bilay tan ipapatey, a singa ibabaga met na Uliran 4:1, 13: “Denglen yo, ana’ ko ra, so panangibangat na sakey ya ama, tan imatleken yo ya amtaen so pakatalos. Benbenan mo a malet so panangibangat; sikato so agmo yabuloy ya onla; sikato so unoren mo; ta sikato so bilay mo.”
Say Sankabalgan a Liket
10, 11. Antoray pigaran nengneng na makapaliket iran salita ed Uliran 3:13-18?
10 Agaylan marakep iran balikas so ontumbok, on ‘saray makapalikliket a salsalita, tan salsalita a matua’! (Eclesiastes 12:10) Sarayan apuyanan a salita nen Solomon so manedeskribe ed tuan liket. Saratan a salita so kaukolan ya isulat tayo ed kapusoan tayo. Nabasa tayo:
11 “Mapalar so too a makaromog na kakabatan, tan say too a makagamor na pakatalos. Ta say pakagamor ed sikato magmaong nen say pakagamor ed pilak, tan say pinabangan ed sikato magmaong nen say dalisay a balitok. Sikato so mamabli nen saray rubi, tan angapo ed saray bengatla a napanpilalekan mo so makapipara ed sikato. Say karukey na saray agew wala ed kawanan a lima to; dia ed kawigi a lima to wala so saray kayamanan tan dayew. Saray dalan to sikara so dalan a makapaliket, tan amin iray basbas to sikara so deen. Sikato so sakey a kiew na bilay ed saray ompeket ed sikato, tan mapalar so balang sakey a mamemben ed sikato.”—Uliran 3:13-18.
12. Panon a say kakabatan tan pakatebek so mangungguna ed sikatayo?
12 Kakabatan—agaylan mabetbet iyan nasasalambit ed libro na Uliran, 46 a danay ed ami-amin! “Say takot ed si Jehova sikato so sengeg na kakabatan.” Saya so maridios, praktikal a kakabatan a nibase’d pikakabat ed Salita’y Dios a manggawa ed totoo to a manbaroy a liktar ed saray mapeligron bagyo a mampapasnok ed loob na mundo nen Satanas. (Uliran 9:10) Say pakatebek, a sinaglawin 19 a danay ed Uliran, so kaiba na kakabatan, ya ontutulong ed sikatayon manalona ed saray taktika nen Satanas. Diad panggawa to ed saray masilib a gawa to, say baleg a Kabusol so walaan na nilibon taon lan eskperiensia. Balet walaan itayo na bengatlan nagkalalo nen say eksperiensia bilang sakey a managbangat—say maridios a pakatebek, say abilidad ed pangibiig na maptek manlapud mauges tan say panpili ed dugan dalan a laen. Saya so ibabangat ed sikatayo nen Jehova diad panamegley na Salita to.—Uliran 2:10-13; Efeso 6:11.
13. Anto so makasalimbeng ed sikatayo legan na saray mairap a panaon ed ekonomiya, tan panon?
13 Say pakawewetwet ed ekonomiya ed mundo natan so sakey a manangiyabawag ed pakakasumpal na propesiya ed Ezequiel 7:19: “Ibantak da naani so pilak da ed saray polong, tan say balitok da singa naani marutak a bengatla; say pilak da tan say balitok da agda naani nayarian ya ilaban ira ed agew na sanok nen Jehova.” Amin a materyal a kayamanan ed dalin so agnipara ed manangilaban a pakayari na kakabatan tan pakatebek. Aminsan et imbaga nen makabat ya Arin Solomon: “Say kakabatan sikato so sakey a sakorong, singa met say kuarta sakey a sakorong, balet say katageyan na pikakabat sikato, a say kakabatan kawaloen to so bilay na walaan ed sikato.” (Eclesiastes 7:12) Talagan maliket ya amin so manaakar natan ed saray basbas nen Jehova ed kareenan tan diad kakabatan et pipilien da so “karukey na saray agew,” say bilay ya andi-anggaan a langkap na Dios ed amin a mangaagamil na pananisia ed dondon bagat nen Jesus!—Uliran 3:16; Juan 3:16; 17:3.
Panamayubo na Tuan Kakabatan
14. Diad antoran paraan ya ipapanengneng nen Jehova so alimbawa na kakabatan?
14 Matukotukoy a sikatayon totoo, a pinalsa ed indengan na Dios, so manbanikel ed pamayubo na kakabatan tan pakatebek, kalidades ya ipapanengneng a mismo nen Jehova diad panggagawa na makapakelkelaw iran gawa na palsa to. “Si Jehova ed panamegley na kakabatan inpaalagey to so dalin; ed panamegley na pakatalos inletneg to so saray tawen.” (Uliran 3:19, 20) Sikato so amalsa na mabilay iran pinalsa, aliwan diad panamegley na mistikon agnisalaysay a process na ebolusyon, noagta diad panamegley na direktan panamalsa, a kada sakey so “nanparpara so nengneng da” tan para’d makabat a gagala. (Genesis 1:25) Sanen diad kaunoran et apalsa so too a walaan na intelehensya tan saray abilidad a nagkalalo nen saray niwala’d ayayep, say sayaksak na saray anghelikon anak na Dios so inmaniweng tan manan-aniweng ed katawenan. (Ipareng so Job 38:1, 4, 7.) Say makatebek a pakatalos nen Jehova, say kakabatan to, tan say aro to so malinew a nanengneng ed amin a pinalsa to ed dalin.—Salmo 104:24.
15. (a) Akin ya agmagenap so pamayubo lambengat na kakabatan? (b) Anton panagmatalek so nepeg ya iliing ed sikatayo na Uliran 3:25, 26?
15 Say kaukolan tayo et aliwa lambengat ed pamayubo ed saray kalidad nen Jehova a kakabatan tan pakatebek noagta ontan met say pamenben a malet ed saratan, ya agbalot papaulyanan so panaral tayo na Salita to. Sikatayoy sisimbawaen to: “Ana’ ko, ag ira komon onarawi ed saray matam. Yatol mo so aralem a kakabatan tan kalakal, dia ed ontan sikara naani bilay ed kamarerwam, tan palabo ed tenger mo.” (Uliran 3:21, 22) Diad ontan et sikatayo so makapanakar ed kaligenan tan deen na kanonotan, anggan legay panaon na singa-matakew ya iyaasingger na agew na “biglan kaderal” a nagawa ed mundo nen Satanas. (1 Tesalonica 5:2, 3) Diad panaon na baleg a kairapan a mismo, “agka antakot ed bigla a takot, angan ed kabagbag na marelmeng, sano sikato so onsabi. Ta si Jehova sikato naani panmatalkan mo, tan yagel to so salim a manlapu ed kaerel to.”—Uliran 3:23-26.
Aro ed Panggawa na Maong
16. Anton kiwas so nakakaukolan ed saray Kristiano niyarum ed seseg ed ministeryo?
16 Saraya so agew a pangipanengneng na seseg ed panagpulong na maong a balita na Panarian pian onkanan pantasi ed amin a nasyon. Balet sayan panagtasin kimey so kaukolan ya atekepan na arum a Kristianon aktibidad, a singa say dedeskribien na Uliran 3:27, 28: “Agmo abalaen so maong ed saray kanepegan to, sano wala ed pakayari na limam so pangawa. Agmo ikuan ed kaabay mo, Onlaka, tan ompawil ka, tan nabuas mangiter ak; sano wala ed siak ed abay mo.” (Ipareng so Santiago 2:14-17.) Lapud malaknab a kabiangan na mundo so walad inkaduka tan okol, wala so baleg a pankaukolan a tulongan tayoray kaparan too, nagkalautla ed espiritual ya agagi tayo. Panon so inkiwas na saray Tasi nen Jehova?
17-19. (a) Anton apuraan a pankaukolan so adampot nen 1993, tan anto so ebat? (b) Anto so mangipapanengneng a saray walad kapeligroan ya agagi tayo so “lalo ni nen saray mananalo”?
17 Alaen pa so sakey ya alimbawa: Nen imbeneg a taon, sakey ya apuraan a tawag na tulong so nanlapud datin Yugoslavia. Say impanaagi ed kabangibang iran bansa so kinmiwas ed makapakelkelaw a paraan. Legan na ambetel a tuloy iran bulan na panaon na betel, nagmaliw a posibili so inlusot ed panlalabanan a pasen na pigaran convoy a panulong, a walaan na kargan kaplesan iran palapagan, makapal a kawekawes, tagano, tan medisina para’d mankakaukolan a Tastasi. Aminsan et saray agagi so kinmerew na permiso diad ketegan pian makapangiloob na 15 tonelada na suplay a tulong, balet sanen naawat da so permit, saman so para’d 30 tonelada! Saray Tasi nen Jehova ed Austria so angidispatsan tampol na talora nin trak. Ami-amin et 25 a tonelada so sinmabi ed ginetman destinasyon da. Agaylay liket na saray agagi sanen naawat darayan daakan ya espiritual tan materyal a probisyon!
18 Panon so inkiwas na saramay akaawat ed saraman? Asasakbay ed sayan taon, insulat na sakey a matatken: “Saray agagi ed Sarajevo so makapansusungdo tan mabunigas, tan say sankaimportantian et sikami so mabiskeg ed espiritual anggad natan pian nasungdoan iyan ambagel a bakal. Say situasyon so talagan mairap a tuloy nipaakar ed tagano. Komon ta bendisyonan tan balesan kayo nen Jehova ed saray sagpot a ginawa yo para’d sikami. Saray pakauley so walaan na nikadkaduman respeto para’d saray Tasi nen Jehova lapud uliran na panagbilay da tan panagrespeto da ed saray pakauley. Sikami met so misadsalamat ed espiritual a taganon impatulor yo ed sikami.”—Ipareng so Salmo 145:18.
19 Sarayan walad kapeligroan ya agagi so angipanengneng met na apresasyon, diad maseet a ministeryo ra ed lawak. Dakel a kakaabay so inmasingger ed sikara pian paiyaralan na Biblia ed saray ayaman da. Diad syudad na Tuzla, no iner ya angipatulor na limaran toneladan tulong a tagano, 40 manangipalapag so angireport na 25 ya oras so kada sakey bilang promedyo ed serbisyon bulan, diad maabig a pananuporta na siameran payunir na say kongregasyon. Sikaray walaan na makatantandan bilang na 243 ya inmatendi ed Memorial na impatey nen Jesus. Sarayan pinablin agagi so peteg a “lalo ni nen saray mananalo ed panamegley na saman so angaro ed sikatayo.”—Roma 8:37.
20. Anton ‘nanparpara’ so agawa ed datin Sobyet Union?
20 Say inkamabunlok a nipatnag ed baleg iran convoy a tulong a tagano tan makapal a kawes ya impawit ed datin Sobyet Union so pinaraan na maseseg ya agagi diman. Alimbawa, diad Moscow say bilang na inmatendi ed Memorial ed sayan taon so 7,549, no ipareng ed 3,500 nen katantaon. Diad satan met a panaon, saray kongregasyon ed satan a syudad so dinmaak manlapud 12 ya anggad 16. Diad interon Sobyet Union (puera so Baltic States), say indaak ed bilang na saray kongregasyon so 14 a porsiento, diad saray manangipalapag na Panarian so 25 porsiento, tan diad saray payunir so 74 a porsiento. Agaylan espiritu na inkaseseg tan dilin-panagsakripisyo! Ipapanonot na satan ed sikatayo so “pamparpara” nen inmunan siglo. Saray Kristiano a walaan na espiritual tan materyal a kaykayarian so angiter na daakan a langkap ed saramay andian ed agtanton apaboran a paspasen, manwarin say seseg na sarayan duruka so angitarok na gayaga tan panamaseseg ed saramay angiter.—2 Corinto 8:14.
Gulaen so Mauges!
21. Panon ya ipapanengneng so pandumaan na saray makabat tan saray makulangkulang ed pansara iran salita na Uliran kapitulo 3?
21 Say komatlon kapitulo na Uliran so mangipaparungtal na saray mantutumbokan a pandurumaan, tan sinampotan ed sayan simbawa: “Agmo nonoten so mauges a sumpa ed kaabay mo, no nengnengnengen mo a manayam a matalek ed abay mo. Agka mikolkol ed too ya andi sengeg, no angapo so mauges a ginawa to ed sika. Agmo sibletan so too a mapasoot, tan agmo pilien so angan anto ed saray dalan to. Ta say marumsis sikato so sakey a kadimla nen Jehova; balet say pikakaaro to wala ed maptek. Say ayew nen Jehova wala ed abung na marelmeng; balet bendicionan to so panayaman na saray maptek. Petepeteg a sikato ludlureyen to so saray managludlurey; balet mangiiter na palabo ed mapaabeba. Say makabat tawiren to so gloria; balet say baing sikato so kitageyan na saray maatiw.”—Uliran 3:29-35.
22. Panon tayon napaliisan a napibilang ed saray makulangkulang? (b) Anto so gugulaen na saray makabat, tan anto so babayuboan da, tekep na anton tumang?
22 Panon tayon napaliisan so napibilang ed saray makulangkulang? Nepeg tayon aralen a gulaen so mauges, on, dimlaen so didimlaen nen Jehova—amin a masilib a basbas na sayan marawal, makasalanan-ed-dala a mundo. (Nengnengen met so Uliran 6:16-19.) Diad kasuniyan, nepeg tayon bayuboan no anto so maong—kaptekan, inkatunong, tan kaumildian—ta pian diad inkamapaabeba tan ed takot ed si Jehova et nagamoran tayo so “kayamanan, tan dayew, tan bilay.” (Uliran 22:4) Saya so magmaliw a tumang para’d amin tayon matoor a mangiyaaplika ed simbawan: “Manmatalek ka ed Jehova ed amin a pusom.”
Anto so Komentom?
◻ Panon ya onaaplika natan so tekston pinagkatema na sayan aaralen?
◻ Panon tayon nagalang si Jehova?
◻ Akin ya agtayo nepeg a leglemewen so disiplina?
◻ Iner so pakaromogan na sankabalgan a liket?
◻ Panon tayon naaro so maabig tan nagula so mauges?
[Litrato ed pahina 18]
Saramay mangiyaapay na sankaabigan dan bagat ed si Jehova so nabendisyonan na daakan