Sakey a Puron Lenguahe Parad Amin a Nasyones

“Diad satan iter ko ed totoo so sakey a puron lenguahe, ta pian amin da so ontawag ed ngaran nen Jehova, ta pian manlingkor ira ed sikato a benebenek.”​—SOFONIAS 3:9.

1, 2. (a) Diad panumpal ed Sofonias 3:9, anto so gagawaen nen Jehova ed agew tayo? (b) Pian natalosan no panon a mangapekta ed sikatayo so propesiya nen Sofonias, anto iran tepet so nepeg a naebatan?

SUSUMPALEN nen Jehova a Dios so sakey a makapakelaw a kimey ed agew tayo. Pankakasakeyen ton amin a nasyones. Unong ya abayag to lan impasakbay ed Masanton Sulat to, gagawaen to diad panbangat ed sikara na sakey a balon lenguahe.​—Sofonias 3:9.

² Anton itan a lenguahe? Akin a nakakaukolan itan? Anto so kakaukolanen na panagaral ed satan ed sikatayon personal?

Say Langkap na Panagsalita

3. (a) Diad anton makapakelaw a langkap so inter ed si Adan? (b) Anto so lenguahen sasalitaen nen Adan?

³ Say abilidad a pantongtong ed panamegley na panagsalita so sakey a madibinon langkap a mangibiig ed katooan a manlapud amin a palsan ayayep. Say inmunan too, si Adan, so apalsa a tekep na kanonotan a makapannonot ya intelehenti. Sikato so naitdan na kolo-kolong, sakey a dila, tan bibi-bibil a nausar ed panagsalita, tan ontan met ed bokabularyo tan abilidad a mamawala na balo iran salita. Makatalos si Adan sano mitongtong si Jehova ed sikato, tan si Adan et naisalita toray ninonot to. (Genesis 1:28-30; 2:16, 17, 19-23) Mapatnag a say lenguahen inter ed si Adan et saman so naamtaan ed saginonor a bilang Hebreo. Diad ag-onkulang a manunan 1,757 a taon ed kiwawala na katooan et mapatnag a nantultuloy a sinalita na amin a katooan itan a lenguahe.​—Genesis 11:1.

4. Panon ya angapekta iray ebento ed agew nen Nimrod ed lenguahe na katooan?

⁴ Insan, ed saray agew nen Nimrod, ta pian amperen iray gunaet na marelmeng a totoo et winetwet nen Jehova so lenguahe na amin a walan angiyabuloy ed inkasikaran nipasakey ed pibiang ed pamaalagey na tore na Babel. (Genesis 11:3-9) Ompatnag ya inmunan inekal nen Jehova so amin a memorya ed komon a lenguahe ra tan insan inparungtal iray balon lenguahe ed kanonotan da. Aglabat lanoren na saya so balo iran bokabularyo noagta balo iran gramatika tan balo iran padron na pannonot. Manlapud saray lenguahe a pinawala ed Babel nen Jehova et kalkalnan linmesa iray arum ya anggad natan, unong ed saray akademya na lenguahe et taloran libon salsalita so sasalitaen ed interon dalin.

5. Panon tayon nadetermina no anto so lalanoren na “sakey a puron lenguahe”?

⁵ Diad saray totoo a mansasalita ed amin na sarayan lenguahe, kasin say “sakey a puron lenguahe” so mankaukolan ya ikaindan so sipor a pansasalita ra tan manaral na orihinal a lenguahen inter na Dios ed si Adan? Saray sirkumstansya a nanliktob ed impanpropesiya so ontulong ed pangebat ed satan a tepet.

Pankaukolan na sakey a Puron Lenguahe

6-8. (a) Anton relihyoson kipapasen so abayuboan ed Juda sakbay ya inter so propesiyan Sofonias 3:9? (b) Diad saray nasyones ed kaliber-liber na Juda, anton awawey so mapatnag?

⁶ Walan kapkapanuley nen Manasa ed panarian na Juda a tinumbokan nen Amon, a nanpaalagey na saray altar ed si Baal, ya angagamil na dibinasyon, tan angiyalibansa na espiritistikon ag-agamil. (2 Arari 21:1-6; 2 Awaran 33:21-23) Bilang nansumpalan, legan na uley na anak nen Amon tan kasublayan, si Josias, ya inggangan nen Jehova si propeta ton Sofonia a mamasakbay ed nagawan madibinon pangukom ed dalin.​—Sofonias 1:1, 2.

⁷ Anggaman kabat na saray taga-Juda a si Jehova so tuan Dios a manlapud dilin awaran da tan manlapud impuyan a Kasulatan, sikara so nangagamil na imoral a ritual ed panagdayew ed si Baal. Sikara so nandakmomo ed banwa tan ed bulan tan ed saray tugyop na bitewen, a direktan isusumlang ed ganggan na Dios. (Deuteronomio 4:19; 2 Arari 23:5) Manuna ed sayan amin, sikaray mibibiang ed porma na atugyop a pananisia, ya onkikiwas a kuanmono amin a relihyon so parapara, diad panamegley na saray pansamba ed namparan si Jehova tan ed ngaran na palson dios a Malcam. Say awawey da et “si Jehova so agmanggawa na maabig, tan sikato so agmanggawa na mauges.” (Sofonias 1:4-6, 12) No nipaakar ed saray nasyones ed liber na Juda, amin da so walaan na rekord ed isusumpa ed si Jehova tan totoo to, kanian sikara so milinya met ed nagawan madibinon hustisya ed sikara.​—Sofonias 2:4-15.

⁸ Nisesengeg ed ontan iran ebento ya impasakbay nen Jehova ya “iter [to] ed totoo so sakey a puron lenguahe, ta pian amin da so ontawag ed ngaran nen Jehova, ta pian manglinkor ira ed sikato a benebenek.” (Sofonias 3:9) Anto, sirin, so puron lenguahe?

9. (a) Akin a say puron lenguahe et aliwan Hebreo o simplen insulat a Salita na Dios? (b) Anto itan so puron lenguahe, tan panon a mangapekta itan ed saray bilay na saraman so mansasalita ed satan?

⁹ Kasin satan so Hebreon lenguahe? Andi; walaan la na ontan so totoo na Juda, balet saray bengatlan sasalitaen tan gagawaen da so mapatpatnag ya aliwan puro tan maptek ed mata nen Jehova. Tan say puron lenguahe so aliwa lambengat a nisulat a Salita na Dios. Walaan met la ra na satan. Balet no anto so kakaukolanen da so sakey a dugan pantalos ed katuaan nipaakar ed Dios tan saray gagala to, tan si Jehova lambengat so makapangitarok na satan diad panamegley na espiritu to. Sanen naaralan da so mansalita na satan a puron lenguahe, say pannonot da, say pansalita ra, say kondukta ra, so nisentron amin ed pamidbir na katuaan a si Jehova so tua lambengat a Dios. (Sofonias 2:3) Manmatalek ira ed sikato tan mansuportan nagnap ed inkasoberano to. Saya so walaan na nikadkaduman interes ed sikatayo natan. Akin?

Saraman so Naitdan na Puron Lenguahe

10. Legan na anton panaon a walan nasumpal so propesiya na Sofonias 3:9?

¹⁰ Ituturo so kasumpalan na propesiya ed partikular a peryodo na panaon, ikuan na Sofonias 3:9: “Diad satan iter ko ed totoo so sakey a puron lenguahe.” Kapigan itan? Onebat so bersikulo 8 a legan na panaon a si Jehova et ‘manipon na nasyones,’ sakbay a sikato so ‘mangikalbo ed sikara na maapuy a sanok to,’ a mangiter ed saray mauyamo na dalin na sakey a puron lenguahe.

11. (a) Anton duaran pansumpalan so Sofonias 3:9 sakbay na modernon panaon? (b) Panon a say kasumpalan natan et duma?

¹¹ Kaleganan na saray agew nen Ari Josias, sakbay ya inabuloyan nen Jehova iray Babilonian armada a mangukom, impulisay na dakel so palson panagdayew, imbes, nanlikor ed si Jehova. (2 Awaran 34:3-33) Aminsan ni, diad inmunan siglo K.P., sakbay na inkaderal na Jerusalem na saray Romano, nilibon totoo so akaral na katuaan nipaakar ed Dios tan ed gagala to tan akikasakey ed serbisyo to. Diad satan a panaon abalbaleg a tuloy so lenguahe na katuaan diad panamegley na bengabengatlan ginawa nen Jesu-Kristo ed pananumpal na gagala nen Jehova. Balet diad dilin agew tayo a nasusumpal so propesiya nen Sofonias ed sankagloboan ya eskala. Natutugyop la natan ya amin iray nasyones ed baleg ya agew na Dios a Makapanyarin-amin diad Armagedon. (Apocalipsis 16:14, 16) Satan a pananugyop so walan nagagawa nanlapulad inkiyanak na Panarian nen 1914. Tan legan na sayan parehon panaon a si Jehova so walan mangiiter ed totoo ed sankamundoan na sakey a puron lenguahe ed panumpal ed sayan propesiya. Say panaral ed ontan a lenguahe so makanakana ta saray makaliktar ed onsasabin baleg a kairapan et saray totoon walan angipasen a tua itan a puron lenguahe a lenguahe ra.​—Joel 2:32.

12. (a) Anto so pisiglaotan na pasingawey a nikurit ed Isaias 6 ed propesiyan mitukoyan ed puron lenguahe? (b) Akin a mankaukolan na tulong so alanaan a nakdaan no sikara so mantuloy a magmaliw ya abobonan nen Jehova ed saray lingkor da?

¹² Mitukoyan ed saya, sakbay na panaon na kayariy kasumpalan na Guerra Mundial I a si Jehova et ginmapon angilukas ed saray mata na pakatalos ed alanaan ya ariripen to ed makapakelaw a pasingawey a nirekord ed kapitulo 6 na Isaias. (Bersikulo 1-4) Idadanet na sayan pasingawey so kaimportantian na pakawala tayo na malinis iran bibil pian manlingkor ed si Jehova a siaabobon. Mangipanengeng, ed superlatibon pantalos, a si Jehova so masanto. Nepeg ya idalangirang met na saray ariripen to itan a kalidad. (1 Pedro 1:15, 16) Ingen nakakaukolan na alanaan a nakdaan so tulong ed sayan bengatla. Kaleganan na Guerra Mundial I, inabuloyan da so inkasikaran natilolan ed pibabali ed saray gawa-gawa na mundo. “Say takot ed si Jehova so puro,” o malinis, balet inabuloyan da so takot ed too tan ed atooan iran muyongan a mangapekta ed saray bibil da, a mampareen ed pangiyabawag da ed Salita na Dios ed baleg a laknab. (Salmo 19:9) Diad pidedeneng ed Kakristianoan, say nakdaan so alaokan ni na pigaran tradisyon tan ag-agamil to.

13, 14. (a) Panon ya impanengneng na nakdaan so dugan awawey, tan anton kundang so ginawa nen Jehova ed biang da? (b) Diad anton dalan ya inter nen Jehova ed nakdaan so sakey a puron lenguahe?

¹³ Amoria so kipapasen da, inkuan na nakdaan, ya unong ya imbaga nen Isaias: “Abagey ak la! Ta magmaong ak a nabalang, ta too ak a marutak so saray bibil, tan manayam ak ed pegley na baley a marutak iray bibil to; ta anengneng na matak so Ari, si Jehova na saray ejercito, a mismo!” (Isaias 6:5) Abidbir da a say kipapasen da so agnaabobonan. Agda sileletey ya impilit so aliwan kurso o anawet-ulon inkaindan so pangawat ed panamaat nen Jehova. Ag-ira akiulop ed klero sanen saraya so nankuwankuwanan ed salita lambengat ed Panarian na Dios tan insan nansuporta ed Liga na Nasyones a kuanmono satan so Panarian.

¹⁴ Lapud managbabawin awawey na saman a mauyamon nakdaan, si Jehova ed agkanepegan a panangasi to so nanlinis na saray bibil da. Ibabaga ed sikatayo na Isaias 6:6, 7: “Diad saman, tinmekyab so sakey a serafin ed siak, tan walaan na ngalab ed lima to a sinisipit to a nanlapud altar. Et diniwit to so sangik tan inkuanto: ‘Nia! Diniwit na saya iray bibil mo et say inkauges mo nakal tan say kasalanan mo apaandi.’” Say makalinis a mensahe a manlapud Salita na Dios so aneral a kuanmono apoy ed saray tradisyon tan bangat na totoo. Satan so nanpurga ed saray puso ra manlapud takot ed too tan sinalatan itan na seseg ed pangusar na saray bibil da na galang ed si Jehova. Kanian susumpalen nen Jehova so sipan to ya “iter ed totoo so sakey a puron lenguahe [diad literal, sakey a malinis a bibil], ta pian amin da so ontawag ed ngaran nen Jehova.”​—Sofonias 3:9.

15. Panon a say ebat na nakdaan et mitunosan ed katunongan ya inter nen Jehova so puron lenguahe?

¹⁵ Kanian sanen say klasen Isaias ed modernon panaon et ginmapon akadngel ed onkekerew a boses nen Jehova, a nikurit ed Isaias 6:8: “Siopa so ibakik, tan siopa so miulop ed sikatayo?” magayaga iran inmebat: “Wadia ak! Ibaki moak.” Agmainomay parad amin da ya onggapo ed publikon ministeryo, balet labay dan nausar na Dios a bilang totoo parad ngaran to. Say espiritu to so mamabiskeg ed sikara. Dinmaak so bilang da.

16. (a) Anton ag-iilalaoan iran resulta a say panagpulong na nakdaan et nanbunga? (b) Panon a say baleg ya ulop so mangiter na paneknek a sikara met natan so mansasalita na puron lenguahe?

¹⁶ Diad dugan panaon pinmatnag a say panagpulong da so manbubunga na agiilalon iran resulta. Diad panamegley da, si Jehova so ontutulong ed sananey a grupon manaral ed puron lenguahe. (Isaias 55:5) Saraya so agminabang ed ilalo ed mangatatawen a bilay, balet inkuenta ra itan a pribilehyo so pagmaliw a kaiba na nakdaan a mananawir na Panarian tan manlikor a benebenek dingan da a bilang mangiyabawag na Panarian na Dios. Maaligwas, saraya so pinmaway a nanlapud “amin a nasyones tan tribo tan totoo tan pansasalita” ya anggad tugyopen la natan so “sakey a baleg ya ulop” a manbilang na nilaksalaksa. Say pansasalita ya ompaway a manlapud saray sangi ra so agnengneng a mangipatnag ed sikara ed antokaman a manapag-apag iran elemento na dalin. Agda iteteen so ilalo ra ed siopaman a too odino antokaman ya atooan ya organisasyon. Imbes, “sikara so nantultuloy a nananggis a tekep na mabiskeg a boses, a mankuan: ‘Utang mi so kilalaban ed Dios tayo, a manyurong ed trono, tan ed Kordero.’”​—Apocalipsis 7:9, 10.

No Anto so Kakaukolan na Panaral na say Lenguahe ed Sikatayo

17. Akin ya importanten naaralan so puron lenguahen maong tan onaligwas ed abilidad a mangusar ed satan?

¹⁷ Panon man karukey a wala tayo ed organisasyon nen Jehova, wala ni so lalon papaaligwasen tayo ed pikakabat tayo ed puron lenguahe tan say abilidad tayon mangusar ed satan a maong. Importantin panggunaetan a gawaen itan. Akin? Lapud saya so pakanengnengan na panangaro tayo ed katuaan.

18, 19. (a) Nanlapulad gapo, akin ya importantin bayuboan so mabiskeg a panangaro ed katuaan? (b) Akin ya importanti a mantuloy a mansiansia ed satan ya aro?

¹⁸ Diad gapo, ontan ya aro so makatulong ed pangilukas na nonot tan puso na too pian sikato so makatalos ed kasulatan a niparungtal ed sikato; a mamakiwas ed sikaton onapit ed si Jehova tan mangapresya ed organisasyon To. Sirin, say panangaro ed katuaan so sakey a tombok ed iyarawi a manlapud palson relihyon. Arum et mankuan a walaan na interes ed mensahe na Biblia balet agpeteg ya interamentin mangikaindan ed saray konekta ed palson relihyon tan ed maabuloy a dalan na bilay. Akin ya andi? Unong a nisalaysay ed 2 Tesalonica 2:10, agda “awaten so panangaro na katuaan pian sikara so niliktar.” Agaylan makana a walaan tayo na ontan a panangaro!

¹⁹ Bektan nasayakop tayo so katuaan, say pamasiansia tayo ed satan ya aro so manunan bengatla ed espiritual ya iyaaligwas. Sinononot ya isiglaot nen Jehova so katuaan a bilang “lenguahe.” Sano naaralan na sakey a too so balon lenguahe, sikato so kaukolan a mankulin manggunaet a manparakel na bokabularyo to, mangibesngaw ed saray salitan dugaruga, manaral na detalyadon gramatika, tan arum nira. Say panangaro ed balon lenguahe tan ed totoon mansasalita ed satan so makatulong ed sikaton mantuloy ya onaligwas. Nayarin sikato so makapansalita kayari na pigaran bulan, balet mankaukolan na dakel a taotaon na panggunaet pian mansalita a singa sakey a sipor. Satan a mipadparan nengneng a gunaet so nakakaukolan pian magmaliw ya onsiano ed puron lenguahe.

20. (a) Anto so manggawa ed puron lenguahe a peteg a puro? (b) Akin a baleg a panasikaso so nakakaukolan ed biang na balang sakey ed sikatayo?

²⁰ Nagkalautlan naimano a satan a lenguahen inter na Dios ed ariripen to so puro. Saya so tua, aliwan lapud pan-gramatikan kipaalagey, noagta lapud satan so mangiter na ebidensya na moral tan espiritual a kalinisan. Anggapo so kundang ed sayan lenguahe parad panagtila, panamalikdo, o sakey a dilan manludlurey. (Sofonias 3:13; Efeso 4:25) Say pansasalita ra so nepeg met a mangidalangirang ed atagey iran estandarte nen Jehova nipaakar ed seksual ya imoralidad. (Efeso 5:3, 4) Ipatnag met na Kasulatan ed sikatayo ya amin a mikonekta ed Babilonia a Baleg, say imperyo na palson relihyon ed mundo, so marutak. (Apocalipsis 18:2-4) Say retrato na saray dirios to so atawag a “makapabaing iran idolo.” (Jeremias 50:2) Sirin, matukotukoy, a saraman so nanaral na puron lenguahe so nepeg a mangipulisay ed pisikal iran pikokonekta ed palson relihyon, mangikaindan ed bangabangat to, onarawi a manlapud saray selebrasyon to, tan ekalen ed pansasalita ra iray balikas a mangiparungtal na mauges a pannonot. Nilikud ed saya, diad Apocalipsis 16:13-16, naipaimano ed sikatayo a say propaganda ed panugyop na nasyones ya onsusumpa ed Panarian na Dios so marutak met, ta aselepan na saray demonyo. Kanian kaukolan tayon onalerto ya agmangyabuloy ed antokaman ed sarayan marutak a bengatlan mandutak ed panagsalita tayo.

21. Anto so walad puron lenguahe a niyarum ed saray salitan sasalitaen?

²¹ No anto so aaralen tayo et tatawagen a lenguahe, tan ontanlan matukotukoy, balet agkabaliksan na satan a saraman so mansalita ed satan so manaral lambengat no panon so pangibalikas a kaslakan ed totoo nen Jehova. Say tono na boses, itsura na lupa, tan saray andawes so importanti met. Saraya so nayarin mangipatnag na saray mensahe ya agsarag na salsalita lambengat. Lawas dan ipanengneng no anto so peteg a wala ed loob tayo. Ipatnag da no kasin walan binagot tayo so imun, pansesepakan, tan sanok, ya amin itan et gawa na makasalanan a laman. Sano sibubulos a mangimaneho so espiritu na Dios ed kabibilay tayo, ompatnag so bunga na espiritu ed dalan na pitontong tayo ed arum.​—Galacia 5:19-23; Efeso 4:31, 32.

22. Sano naaralan tayo so puron lenguahen maong, panon ton apektaen so panggawa tayo na saray desisyon?

²² Siopaman a walan nanaral na balon lenguahe so makaamta a peteg ya andukey so pakasabi sano naromog na sakey a sikaton mismo so petepeteg a mannononot ed balon lenguahe, imbes a mangipapatalos a manlapud sipor a pansasalita to. Kanian, ontan met, a sano manaral tayo na katuaan, panggunaetan ya iyaplika ed saray bilay tayo, tan maparanay ya inabang itan ed arum, kalkalnan naromog tayo so inkasikatayon mannononot ed saray termino na katuaan. Agtayo ando lan andon mangikukumpara na dati ed balo tan mipupuligesgesan a manpili. Anggan ed ankekelag iran bengatla, saray prinsipyo na Biblia so nanonotan a mangitarok na nakakaukolan a panangiwanwan.​—Uliran 4:1-12.

23. Antokaman so sipor a pansasalita ra, anto so mangipanengneng a saray Tasi nen Jehova ed sankadalinan et mansalita na puron lenguahe?

²³ Tuan peteg a walara so nilibon lenguahen nauusar na katooan, balet say puron lenguahe so nibalikas ed sarayan amin. Nankakasakey, sankadalinan, saray Tasi nen Jehova so manguusar a maong ed puron lenguahe legan a manlingkor iran benebenek ed mapublikon panagtasi a mangitarok na galang ed si Jehova, say maaron Dios tayo.

Tepetepet ed Panrepaso

◻ Anto so intekep ed langkap na panagsalita?

◻ Anto so puron lenguahe?

◻ Diad siopa a say Sofonias 3:9 et walan asumpal?

◻ Panon tayon makapangiter na paneknek a petepeteg tayon inaro so puron lenguahe?