Panagpaalagey a Para ed Maandon Arapen
“Kada abung so walaan na managpaalagey, say Managpaalagey ed amin a bengatla et say Dios.”—HEBREOS 3:4, Weymouth.
1, 2. (a) Siopa so nandesinyo na biong, tan panon so inkadetalyado na saray instruksion a niiter? (b) Akin a makana a sikatayo natan so ontulok, a singa ginawa nen Noe?
DIAD 4,400 taon lan linmabas ingganggan nen Jehova si Noe a mangipaalagey na biong a para ed kipreserba na bilay. Balet ag-impudir na Dios ed si Noe so pangipaalagey na basta anggan anton nengneng ya onletaw. Noag ingen ta inikdan to na saray espesipikon instruksion no nipaakar ed saray materyales, inkagawa, karukey, kalapar, kaatagey, bentilasyon, tan saray inkagawa to ed loob tan paway. “Tan ginawa nen Noe so unong ed amin ya ingganggan na Dios ed sikato. Ontan so ginawa to.”—Genesis 6:13-16, 22.
2 Agaylan maabig ya ehemplo a para ed modernon-agew a tastasi nen Jehova! Singa si Noe, nimatalek ed sikatayo so manangiliktar-bilay a kimey balet diad sayan panaon et onnenengneng ed kilalaban na ‘minilmilyon a manbibilay la natan a nayarin agla ompatey.’ Agaylan importante a sikatayo so matulok, a singa si Noe! Agaylan maganat a tumboken tayo so padron na Sakey a babaleg nen si Noe, si Jesu-Kristo, diad panlingkor a bilang ‘managpulong na inkatunong’!—2 Pedro 2:5.
Espiritual a Kimey na Panagpaalagey
3. (a) Anto so pansumpalan na pampaalagey diad saray balikas nen Jesus? (b) Akin a say panagpulong nen Jesus so panagpaalagey na pananisia?
3 Sikato la natan so 1,956 taon nanlapud impamakelaw nen Jesus ed Galilea diad sayan deklarasyon: “Magbabawi kayo, sikayon totoo, lapud say panarian na katawenan so inmasingger la.” Impareng to so siopaman ya anulok ed saray balikas tan nampaalagey ditan diad “sakey a toon makabat, ya angipaalagey na abung to ed tapew na baton-dampay.” Satan a pananisia na too so mabiskeg, agnatenyeg, agnagalaw. Sikato so agnageba. Say impanpulong nen Jesus so panangipaalagey ed pananisia. Sinabi to so kapusoan na totoo, unong a saman so duma ed saray mansimpisimpitan a Judion relihyoson papangulo. Saray kabanyakan a totoo so nikelawan diad nengneng na panagbangat nen Jesus. Anggan saray sundalon mangerel ed sikato so anempet a kalimalima, a kuan da: “Anggapo nin balot so sananey a toon nansalita na singa onia.”—Mateo 4:17; 7:24, 25, 28; Juan 7:46.
4. (a) Panon so impanpaalagey nen Jesus a para ed arapen? (b) Anton manunan panagpaalagey so agawa nen Pentecostes na 33 K.P.?
4 Si Jesus so mangipapaalagey na para ed arapen. Tinipon toray kakimeyan to, a singa si Pedro, a tinawag met na Cepas, a kabaliksan to so “sakey a bato.” Diad sayan babangatan, imbaga nen Jesus: “Sika si Pedro, tan diad tapew na sayan baton-dampay et ipaalagey ko so kongregasyon ko.” Sinmabi panaon a si Pedro so nagmaliw a sakey ed saray dakel a “baton mabilay” a nipaalagey ed si Jesus, say “panukong a baton letnegan” na kongregasyon. Saman a kongregasyon so niletneg nen Pentecostes na 33 K.P. sanen say apaolin Jesus, diad nikawanan na Dios ed tawen, et inkalbo to so masanton espiritu ed saray manaalagar a babangatan.—Mateo 16:18; 1 Pedro 2:4-6; Gawa 2:2-4, 32, 33.
5. Antoran modernon-agew a nagagawa so asaglawin tuloy ed Kristianon kongregasyon?
5 Natan, say Kristianon kongregasyon so pirmin alanor diad kasumpalan na saray gagala nen Jehova. Sikato so panaon na “apocalipsis,” odino “panangiparungtal,” sano “saray bengatlan magano lan nagawa” so nipaparungtal ed saray “ariripen” na Dios ed dalin. (Apocalipsis 1:1-3, Ref. Bi., paimanod’leksab) Sikato so panaon sano sarayan ariripen so ‘mangipulong ed maong a balita na Panarian na Dios ed amin a dalin ya onkanan pantasi,’ sakbay ya idapo to so panangukom ed marelmeng a sistema nen Satanas. Sikato so panaon diad pangibiig na Ari, si Jesu-Kristo, a nitrono la natan ed katawenan, ed saray maamo, malakarneron totoo a manlapud saray nampaawet, malakanding a totoon agmalabay ed satan a Panarian, tan pian sarayan “karnero” so tiponen to ed kongregasyon na espiritual iran “agagi” to sakbay ya ondapo so “baleg a kairapan.”—Mateo 24:14, 21; 25:31-40.
6. Anto natan so “biong,” tan panon so nayarin pakaliktar tayo?
6 Anto so modernon-agew a biong na kililiktar? Sikato so espiritual a kipapasen a kawalaan na saray Tasi nen Jehova nanlapulad 1919, say espiritual a paraiso. Singa saray membro na pamilya nen Noe, say nakdaan na alanaan iran Kristianos tan saray kakaiba ra so nepeg a mansiansian manayam ed dalem to, mankimey a situtulok, sigpot-puso, diad panumpal ed baleg a proyekton espiritual a ginagala nen Jehova. Sayan proyekto et “say panipon ed amin a bengatla lamet ed si Kristo, saray bengatla ed katawenan [ginmapo nen 33 K.P. ed saray mamaarap-ed-tawen ya alanaan] tan saray bengatla ed dalin [ginmapon naimano nanlapulad 1935 diad internasyonal a “baleg ya ulop” a nidestinon para ed andi-anggaan a bilay ed dalin].”—Efeso 1:10; Apocalipsis 7:9, 14.
‘Panagpaalagey tan Panagtanem’
7. Anton nankaduan kimey so mankukurang natan, tan panon so nayarin pibiang tayo diad liket a singa alikna nen Noe tan si Jeremias?
7 Ingganggan nen Jehova so nakdaan na alanaan iran Kristianos ed dalin, unong a singa ginawa to ed si propeta Jeremias, “a sikato so nipasen ed saray nasyones tan diad saray panarian, ta pian mamagot tan mangigeba tan maneral tan mamigar, a manpaalagey tan mantanem.” Sirin nankaduan kimey so mankukurang la natan: (1) panangipalapag ed panangukom nen Jehova a sumpad marelmeng a sistema na mundo nen Satanas tan (2) panangipaalagey tan panangiletneg na sakey a sosyedad na dilin totoo na Dios a para ed kipreserda. (Jeremias 1:10; 24:6, 7; Isaias 26:20, 21) Agaylan liket na saray nakdaan na alanaan tan say ombabaleg ya ulop na kakaiba ra legan a sikara so mibibiang ed sayan kimey natan! Sikato so nengneng na liket ya asagmak nen makulin Noe tan say pamilya to diad agew da.
8. (a) Anton indaak ed manangipalapag so naimano diad linmabas a 22 taon? (b) Diad inengneng ed pahina 20-3 na Enero 1, 1986 a paway na The Watchtower, antoray arum a bansan akapanggayaga ed matalunggaring ya indaak legan na 1985?
8 Kasin saray minilyon so makaliktar ed agew nen Jehova? Wala so maabig ya ilalo ed satan, unong ya ipanengneng na 1985 Service Year Report of Jehovah’s Witnesses. Saray detalye ed sayan report so nanengneng ed pahina 20-3 na Enero 1, 1986 a paway na The Watchtower. Makapasagyat ya imanoen so makapakelaw ya indaak ed pantok a bilang na saray komikimey ed lawak. Saya natan so binmaleg ed dagup na 3,024,131 managpulong na Panarian. Inmunan adampot so 1,000,000 nen 1963, 2,000,000 nen 1974, tan natan masulok a 3,000,000 nen 1985. Diad saraman a 22 taon, wala so 200-porsienton indaak. Agaylan sikatayo so misalsalamat ed si Jehova a, diad panamegley na espiritu to, et pinabulaslas toray bengatla!—Zacarias 4:6; 1 Corinto 3:6.
9. (a) Akin a say indaak na payunir so lalon makatantanda? (b) Anto so nirekomenda ed amin a makapangilugar ed satan, tan akin?
9 Lalon matalona legan na saraman a taon et say indaak na sigpot-panaon a manangiyabawag ed Panarian. Anggaman ed onlelelen kairapan na bilay ed sankamundoan, say bilang na sayan maseseg a grupo na saray “payunirs” so binmulaslas a manlapud binulan a promedio na 38,573 nen 1963 ed 322,821 nen 1985—737-porsienton indaak! Anto so ipanengneng na saya? Ipanengneng to a sakey a marlang ya espiritu na dilin-panagsakripisyo so wala ed limog na saray totoo na Dios, a mitukoyan ed saray salita nen Jesus ed Lucas 9:23. Gendagendat, say maalwar a panagplano tan panagsakripisyo so nakaukolan pian nagawa so aligwas na kimey ed panagpayunir. Balet saray tumang so abalbaleg.—Roma 12:1, 2; Malaquias 3:10.
10. (a) Saray manangipalapag ed kongregasyon so nakomendaan ed anto? (b) Anton taloran balon pantok na kimey so naimano dia, tan anto so ipanengneng da?
10 Saray minilyon a manangipalapag ed kongregasyon so mibabakal met a sumpad saray irap ya indapo nen Satanas tan say mundo to ed sikara. Balet sikara, met, so mangiyaapay ed Dios na “bagat na panangidayew” da. (Hebreos 13:15; Roma 10:9, 10) Saratan ya oras, balanglan dakel o daiset, ya inreport yon matoor a manangipalapag a kada bulan so nagmaliw a kabiangan na balon pantok na 590,540,205 oras ed lawak na kimeyan nen 1985. Saya so 16.8-porsienton indaak ed samay 1984! Saray balon pantok na 224,725,918 panagpawil tan 2,379,146 panangiyaral na Biblia ed saray interesadon totoo so mangipanengneng a saray manangiyabawag na Panarian ed amin a pasen so manbabanikel diad pagmaliw a maong iran managbangat tan ontan met a maseseg iran managpulong.—Mateo 28:19, 20.
Panagpaalagey a para ed Tuan Kareenan tan Kaligenan
11. Panon so kiyaabawag na tuan ilalo ed kareenan tan kaligenan, tan diad anton kalaknab?
11 Diad saginonor na 1985, inyabawag na Nasyones Unidas so 1986 a bilang Internasyonal a Taon na Kareenan. Diad agano niran panaon, say NU so mangibabaga na malaem nipaakar ed kareenan tan kaligenan. Balet sakey a lalon importantin proklamasyon, say nipaakar ed Makasulatan ya ilalo ed kareenan tan kaligenan, so binmisbiskeg a tuloy legan na 1985 unong a saray Tasi nen Jehova so angipalima ed lawak a mundo na 38,805,561 Biblia, libro, tan pulyeto, tan ontan met 300,545,609 magasin, tan akapangipalima na 1,719,930 suskripsion ed The Watchtower tan Awake! Diad panamegley na inimprintan pahina tan diad panamegley na insangin salita, say niletneg a Panarian na peteg a “Prinsipe na Kareenan” so angawat na sankabalgan a panagtasi. Peteg, “diad idaak na gobierno to tan say kareenan so agmangangga.”—Isaias 9:6, 7, King James Version.
12. Say ilalaknab so nansumpal ed anton baleg a pankaukolan, tan panon a saray totoo nen Jehova so nankakasakey diad panalin pangabet ed satan a pankaukolan?
12 Say abalbaleg ya imbulaslas ed lawak so nankaukolan na imbaleg diad pananuporta ed muyongan. Legan na 1985 say bilang na saray kongregasyon na Tastasi nen Jehova ed sankamundoan so dinmakel a manlapud 47,869 ya anggad 49,716. Saya so nankaukolan na nilasus iran balon pasen na pantitiponan. Agaylan maabig a, diad dakel iran pasen, saray Tasi so abendisyonan ed saray sagpot dan mamaalagey na Kingdom Hall! Inerman a kawalaan na pankaukolan, saray sinansakey tan kongregasyon so andi-siblet ya anuporta ed programa na panagpaalagey, ta pian say “panamano” so nagawa ed limog na sankamundoan ya impanaagi.—2 Corinto 8:14, 15.
13. Panon so nayarin pakatulong na saray sinansakey diad saray proyekton panagpaalagey ed Kingdom Hall?
13 Diad saray bansan maapabor so kipapasen da, saray sangan opisina na Watch Tower Society so tinmulong met ed saray proyekton Kingdom Hall. Diad Estados Unidos tan diad Canada, dakel a totoo so ontutulong diad espesyal a Kingdom Hall Fund, ya angiter na saray pautang diad dinmakel a panagpaalagey na Kingdom Hall. Saray arum so angiter na biskeg da tan abilidad, ta pian anggan saray maples a nipaalagey iran Kingdom Hall so tinmalindeg legan na sakey a sampot-simba. Diad pankimey ed ontan iran proyekto a “sigpot-kamarerwa ed si Jehova,” nagawaan na saray Tasi to so impasen na minumundon totoo ya imposibli.—Colosas 3:23.
14. Panon so impakaabet ed saray pankaukolan diad Assembly Hall?
14 Diad dakel iran bansa, say kakulangan na pasilidad a magenap ed mamidua-ed-sakey-taon ya asamblea sirkito na saray Tasi nen Jehova so angipresenta na baleg a problema. Lamet, saray Tasi so magayagan angabet ed angat diad panamegley na saray programa na panagpaalagey, diad parehon espiritu ya impanengneng na saray ariripen na Dios nen inmuna ran panaon. Alimbawa, sanen kinaukolan so pananap ed saray materyal diad pangipaalagey ed tabernakulo, say ulop na Israel so nankakasakey a tinmalineng ed ganggan na Dios: “Mangiter kayo na tulong ya onkana ed si Jehova. Balang sakey a mabulos-impanpuso so mangiyakar na onkana ed si Jehova.” Saman ya ulop so akapawala na dakel nen say nakaukolan, tan say kimey so asumpal a maples ed sikara.—Exodo 35:5-19; 36:7.
15. (a) Anton ilalaknab so nagagawa diad saray sanga na Watch Tower Society? (b) Panon so kasusumpal na kimey?
15 Legan a say pankaukolan ed saray Biblia tan say niletneg-ed-Biblian palapagan so ondadaak, dakel ed saray 94 sangasanga na Watch Tower ed sankamundoan so amalaknab ed pasilidad da. Saray imprintaan ed Brooklyn tan Watchtower Farms so siansia nin sikara so sankabalgan, balet saray 36 a sanga na Sosyedad so mangaasikaso natan ed saray dilin panagprinta ra ed magasin, tan 6 sanga so maniimprinta met tan manggagawa na libro. Diad saraya, say Alemanya, Italya, tan Hapon so manggagawa na Biblia. Say balon pabrika ed Selters, Alemanya, so mankikimey a malaknab. Diad Ebina, Hapon, say panagpaalagey so nagagawa ed anemiran-gradon pabrika tan waloran-gradon kasuldongan na Bethel Home a mamarawes ed sananey a 280 komikimey. A singa saray totoo nen Jehova so anuporta ed templo nen Solomon “diad sigpot-puso,” ontan met natan a saray totoo na Dios ed nanduruman dalin so manggagawa na “boluntaryon panangiyapay ed si Jehova,” tan iyaarum to so bendisyon to ta pian say kimey so nasumpal.—1 Awaran 22:14, 15; 29:7, 9; nengnengen so Ref. Bi., paimanod’leksab.
16. Akin a sayan kaaruman a panagpaalagey tan panangorganisa so nakakaukolan?
16 Kasin amin na sayan panagpaalagey tan panangorganisa so peteg a nakaukolan? Peteg, no “say matoor tan makabat ya aripen” so mantultuloy diad panangitarya na espiritual a “tagano ed manepeg a panaon.” Say ontan a tagano so nakaukolan diad italubo na “sankaabungan na Dios” tan diad sankagloboan a panagpulong ed 200 lenguahe. (Mateo 24:45; Efeso 2:19; 4:15, 16) Saray totoo nen Jehova a mismo so angiter ed saray abilidad da diad impamawala ed multilanguage electronic phototypesetting system (MEPS), a natan et niiter ed 26 sangasanga na Watch Tower. Saya so nanggawan posibli ed nankakasakey a sankagloboan a kurang na panagprintan offset tan akatulong diad inkipalapag na mensahe na Panarian a bansag ed dakel iran pasen na dalin.—Ipareng so Isaias 52:7-9.
17. Anton pankaukolan so linmesa ed hedkuarter diad Brooklyn, tan panon so kakaasikaso na saya?
17 Ompatnag ya anggapo so anggaan na modernon-agew ya ilalaknab na muyongan nen Jehova. Anggan natan, say pamilya na Bethel ed Brooklyn, Nueva York, a hedkuarter na Sosyedad so binmaleg ed kalaknab a pinano to so amin a walan akomodasyon. No linawa nen Jehova, say baleg a bilding a mankarga na kaaruman nin sanlibon komikimey ed Bethel so nayarin nipaalagey ed dalin na Sosyedad diad Columbia Heights. Balet no saya so agnagawa, manalagar itayo ed malaknab a panangidirihe nen Jehova diad pamaakaran. Saray pikakasi tan matoor a suporta na sankamundoan ya impanaagi nipaakar ed amin na sayan ilalaknab so peteg a naapresya.—Ipareng so Gawa 21:14; 2 Tesalonica 3:1.
18. Akin a walaray dakel a proyekto ed panagpaalagey natan, anta asingger la so Armagedon?
18 ‘Balet akin,’ nayarin itepet na sakey, ‘a wala so ontan lan karakel na saray proyekton panagpalaknab anta sikatayo so akatalindeg ya arap-arapan la ed Armagedon?’ Say ebat et say muyongan nen Jehova so ‘agmansara’ diad isabi na Armagedon. Satan so ‘pansara’ lambengat na muyongan nen Satanas. Say muyongan nen Jehova so mangipapaalagey a para ed maandon arapen. Balanglan saray ginaway-toon paalagey so makatalindeg ed Armagedon, kabat tayo a say muyongan nen Jehova so makaliktar tan satan so usaren nen Jehova tan saraman so matoor a manusuporta ed sikato, a mangipaalagey na maandon kareenan tan kaligenan diad maglorian mangaraldalin a Paraison insipan na Dios.—Apocalipsis 7:9, 14-17; 21:1, 4, 5.
Panagpaalagey a Tekep na Gagala
19. Anton angat so nanengneng diad report nen 1985 ed Memoryal?
19 Si Noe so nampaalagey a tekep na gagala, tan nepeg ya ontan itayo met. Sakey ya agawaan ed 1985 Service Year Report so mangiter na malaem a taganon isipen. Makapakelkelaw a tuloy so inmatendin 7,792,109 diad Memorial ya impatey nen Jesus nen Abril 4, 1985—indaak na 375,135 nen samay dagup nen 1984. Peteg a makapakelaw! Balet say bilang so nankarga na sakey ya angat. Diad pantok na 3,024,131 manangipalapag a mibibiang ed kimey na Panarian, wala so masulok a 4,000,000 nin arum a mililimog ed sikatayo, diad sakey a kalaknab, ya agni mangipapaalagey nipaakar ed arapen diad pibibiang ed Kristianon ministeryo. Panon so pakatulong tayo ed sikara?
20. Anton maganat a pankaukolan so wadtan a mangabet ed angat, tan panon so nayarin panggawa tayo ed satan diad praktikal a dalan?
20 Maslak ed saray interesadon totoo so kabat tayon personal. Nayarin sikara so membro na pamilya, totoon kokonduktaan tayo na panangiyaral ed Biblia, suskritor ed saray magasin tayo, odino diad arum. Arum so nagmaliw ya interesado nanlapulad samay unor a Memoryal. Kasin nagawaan tayo natan so nikaduman sagpot diad panagano ed saraya, ya ipaalagey ira diad panamegley na panagaral ed Biblia, ta pian komon et sikara so makaromog na salimbeng diad oksuyan nen Jehova ya “anggad saray gonigon so onlabas”? (Salmo 57:1) Say “baleg a kairapan” so gawa na panangalangon nen Jehova, a lalon makabaliksan tan sigsigpot nen say Delap ed agew nen Noe. Kaliktan tayo so mangipaalagey ed sarayan interesado diad manangiter-bilay iran katuaan, ta pian sikara so “ontawag ed ngaran nen Jehova” tan ag-ira nitakos. (Mateo 24:21, 22, 39; Sofonias 2:3; 3:8, 9) Iyaral tayo so Salita na Dios ed sikara, ya usaren so libron You Can Live Forever in Paradise on Earth odino arum a makapaalagey-pananisian literatura na Biblia.
21. Panon so pampaalagey na pananisian singa si Noe diad inkasikatayo tan diad arum?
21 Si Jehovan Dios so Katawan a Managpaalagey tan Abalbaleg a Manangitarya ed katooan. (Salmo 127:1; 145:16; Eclesiastes 3:10-13) Sikato so angidirihe ed si Noe no nipaakar ed desinyo tan diad impangipaalagey ed biong. Diad mabulos a pitutulongan nen Babaleg a Noe, si Jesu-Kristo, inyuksoy to so panondon ed matulok a katooan diad kasalanan tan patey. Diad panamegley na sayan Anak et impaalagey to met so modernon-agew a “biong,” say mabulaslas a paraison espiritual a ditan so nayarin pakaromogan na saray lalaki tan bibii na pananisia na kilalaban, tekep na panilalo ed bilay ya andi-anggaan. (Mateo 20:26-28; Juan 3:16; 17:3) Komon ta tulongan tayo so dakel nin arum a mangipaalagey na pananisia tan mamabiskeg na taker na inkamaapit ed si Jehova tan diad Anak to. Komon ta sikara so tulongan tayon mangaro ed inkatunong tan gulaen so karelmengan. (Hebreos 1:9) Sirin, tekep na pananisian singa si Noe, nayarian tayon itultuloy so pampaalagey a mankakasakey a para ed maandon arapen.—1 Timoteo 4:15, 16.
ARUM IRAN TEPET ED PANREPASO—
◻ Panon so impanpaalagey nen Jesus nipaakar ed arapen?
◻ Anto so naromog yon matalona diad 1985 report?
◻ Akin a saray teokratikon programa na panagpaalagey so nakaukolan?
◻ Panon a nayarin amin tayo so mangipaalagey a tekep na gagala?
[Kahon ed pahina 10]
Sakey a kongregasyon diad sakey a bansa ed Aprika a saray kimey nen Jehova et insebel so walaan na 95 manangipalapag, amin da so mibibiang ed kimey a kada bulan. Sikara so nanpromedio na 130 diad saray miting da balet 160 diad saray paliwawa ed publiko. Walaan ira na taloran regular payunir tan waloran auxiliary payunir ed agano ni. Diad anem bulan labat a linmabas, 21 manangipalapag so ginmapo ed lawak na kimeyan.
[Kahon ed pahina 11]
Waloran bansa so angireport ed pantok na masulok a 100,000 manangipalapag nen 1985
E.U.A. 723,220
Brazil 177,904
Mexico 173,037
Italya 127,526
Nigeria 121,729
Alemanya 115,604
Britanya 103,522
Hapon 103,117