Madibinon Bendisyon ed “Saray Walaan na Pakatebek”
“Saray walaan na pakatebek so onsinag a singa kasnag na liwang; tan saramay mangitarok na dakel ed inkatunong, singa saray bibitewen ed panaon ya andi-geter, ed ando lan ando.”—DANIEL 12:3.
1. Kayari na impaneskribe ed panaon na irap ed saray manangisugsog na bakal, diad anto so ontumbok ya angipaarapan na anghel ed imano to?
SAY propesiya na anghel ed si Daniel so angitarok ed sikatayo a manlapud komapat a siglo K.K.P. ya anggad Armagedon. Impanengneng to a si Miguel so mangitarok na deen ed dalin diad posibli lambengat a dalan: Diad paneral ed saray manangisugsog na bakal. Natan, kayari na ontan a makatantandan impanusisa ed awaran ya akauna, say anghel so angipasakbay na arum ed saray mayaman a bendisyon a panggagayagaan na saray totoo na Dios “ed unor a kabiangan na saray agew.”—Daniel 10:14.
Sakey a Panaon na Saray Kioli
2. Panon a saray arum ya inaatey so “naliing” legan “na unor a kabiangan na saray agew”?
2 Ibabaga na anghel ed si Daniel: “Tan dakel ed saramay naugip ed dabok na dalin so onliing, saraya so diad maandon bilay tan saraman so diad kibabaing tan diad maandon kadimla.” (Daniel 12:2) Mapatnag, “say unor a kabiangan na saray agew” so sakey a panaon na saray kioli, diad ibangon na saraman so “naugip ed dabok na dalin.” Sakey ed ontan ya inkaliing so ginmapo agnambayag kayari na impagmaliw nen Jesus ya Ari nen 1914. (Mateo 24:3) Onnengneng ed arapen ed satan a panaon, insulat nen apostol Pablo: “Sikatayo a manbibilay a makaliktar ed kiwawala na Katawan so agtayo unaan iraman so naugip ed patey . . . Saraman so inatey a mikasakey ed si Kristo so ombangon ya ununa.” (1 Tesalonica 4:15, 16; Apocalipsis 6:9-11) Mapatnag, sirin, agnambayag kayari na 1914 a si Jesus et pinaoli to ed maespiritun bilay ed katawenan iraman so wala “ed Israel na Dios” ya inatey lan matoor. (Galacia 6:16) Para ed sikara, say kaliing so diad “maandon bilay.”
3, 4. Panon a say sakey a grupo na matoor ya ariripen na Dios so nagmaliw ya ‘inatey’ nen 1918?
3 Balet saray salita na anghel so andi-duaruwan angisakup na sananey a kioli. Lapud diad ngalngalin 40 taon sakbay na 1914, et sakey a melag a grupo na saray Kristianos so mangipapasakbay a satan a taon so mananda ed anggaan na Panaon Hentil a singa impropesiya nen Jesus. (Lucas 21:24) Sarayan Kristianos so anginkorpora ed Zion’s Watch Tower Tract Society nen 1884, tan impalapag daray resulta na impansukimat da ed Biblia dia ed palapagan a tinawag na Zion’s Watch Tower and Herald of Christ’s P resence.
4 Nen 1914 et say katuaan na mensahe ra so dramatikon apekderan sanen tinmerak so inmunan guerra mundial, tan “saray ot-ot na kairapan” ya impasakbay nen Jesus so ginmapo. (Mateo 24:7, 8) Anggaman kuan, saray relihyoson kakabusol da so angusar ed saray kakebbiewan na bakal a mamasegsegang ed sikara ya anggad kaunoran, nen 1918, et say panagpulong a kimey da so tinmunda, tan saray manunan ariripen na Watch Tower Society so imprison agmakatunongan. Saya so anagdag na baleg a panggayaga ed arum a grupo. Sinumpal to met so propesiyan nikurit ed libro na Apocalipsis: “Tan nen asumpal da so panagtasi ra, say atap ya ayep a tinmatdang a nanlapud kaaralman so mibakal ed sikara tan taloen tora tan pateyen tora.”—Apocalipsis 11:7.
5, 6. Panon a saray eksperiensia na sayan grupo nen 1919 so mangiter na kasumpalan na propesiya a “dakel ed sarayan naugip ed dabok na dalin . . . so naliing”?
5 Unong ed propesiya, anggaman kuan, sikara so agmansiansian ‘inatey.’ “Tan kayari na talora tan kapalduan agew et say espiritu na bilay a nanlapud Dios so linmoob ed sikara tan sikara so tinmalindeg ed saray sali ra, tan baleg a takot so sinmabi ed saraman so akanengneng ed sikara. . . . Tan sikara so sinmegep ed tawen ed lurem, tan sikara so anengneng na kakabusol.” (Apocalipsis 11:11, 12; Ezequiel 37:1-14) Say inkioli ra so mapatnag a simboliko, lapud say literal a kioli ed maespiritun bilay ed tawen so agnanengneng na kakabusol da. Imbes, sikara so apaoli a nanlapud singa-inatey a kipapasen na agpakagalaw ed maligan kipapasen na magunaet a kimey diad sigpot a pakanengneng na saraman so nankanonotan ed anggaan da. Nen 1919 et saray manangilaman na Watch Tower Society so nibulos a nanlapud pangawan, say kimey na panagpulong so naorganisa lamet, tan say mundo so akanengneng ed gapowan na sankabalgan a kampanya diad panagtasi ed Panarian ed awaran.—Mateo 24:14.
6 Diad sayan simbolikon pantalos, ‘dakel ed saramay naugip ed dabok na dalin so aliing.’ Insan, ginmapo nen 1919, saman a melag, aliing ya ulop na saray Bible Students so ginmapon mananap tan manipon ed saray nakekeraan ed agagi nen Jesus ta pian say sigpot a bilang na 144,000 so natatakan. (Mateo 24:31; Apocalipsis 7:1-3) Unong a saray sinansakey so kinmiwas, indedika ra so inkasikara ed Dios diad panamegley nen Kristo tan nagmaliw iran membro na nanengneng a muyongan nen Jehova diad dalin. Diad impakaawat da ed libren langkap na masanton espiritu, sikara so niyabawag a matunong diad letnegan na pananisia ra ed dondon bagat nen Jesus tan sikara so atagibi a bilang ananak na Dios diad espiritual a dalan.—Roma 8:16; Galacia 2:17; 3:8.
7. Diad dakel ed saraya, panon a saya so mansumpal a kaliing “ed maandon bilay”?
7 Saramay nansiansian matoor ya anggad anggaan na mangaraldalin a bilay da so walaan na mabiskeg ya ilalo na pakaala ra ed pasen da ed tawen a kaiba nen Jesu-Kristo. (1 Corinto 15:50-53) Sirin, say espiritual ya inkaliing da so dia ed andi-anggaan a bilay. Legan a mabilay ni ed dalin, sagmaken da so kareenan ed limog dan dili anggaman manbibilay ed sakey a mundon manbabakal. (Roma 14:19) Balet lalo nin importante, panggagayagaan da so deen ed si Jehova a Dios a mismo, “say kareenan na Dios a talonaan to so amin a kanonotan.”—Filipos 4:7.
Kaliing “ed Kibabaing”
8, 9. Diad anton dalan a sayan espiritual a kaliing so magmaliw a “kibabaing tan diad maandon kadimla”?
8 Akin, sirin, a saray arum so “naliing . . . ed kibabaing tan diad maandon kadimla”? Say katuaan so aliwan amin na saramay mangawat ed imbitasyon a magmaliw a kabiangan na satan a klase na Panarian so mansiansian matoor. Inabuloyan na arum so pananisia ra ya onkapuy tan sinmaew iran nansungdo. (Hebreos 2:1) Pigara ni ingen so magmaliw ya apostata tan nakaukolan ya ekalen a manlapud Kristianon kongregasyon. (Mateo 13:41, 42) Saray ontan so dineskribe nen Jesus a bilang “satan a mauges ya aripen” a dusaen na Katawan “ed sankasakitan,” a sikara so ipabtang to ed saray mansimpisimpitan. “Ditan so kawalaan na pannangis tan say panngalatenget na ngipen.”—Mateo 24:48-51; Efeso 4:18; 5:6-8.
9 Agaylan makadesyang, so pangawat ed sankatageyan a pribilehyon niyopresi ed saray ag-ayadyarin totoo tan insan onsumpa ed satan! Diad saraman so onkiwas ed onian nengneng, imbaga nen apostol Pablo: “Agnayari no nipaakar ed amin na saraman so aliwawaan ya aminsan, tan akataway ed mangatatawen a libren langkap, tan sikara so nagmaliw a minanabang ed masanton espiritu, tan atawayan da so maabig a salita na Dios tan saray pakayari ed onsasabin sistema na bengabengatla, balet sikara so sinmian, pian sikara so papawilen lamet ed pagbabawi, lapud impasak da so Anak na Dios ed inkasikara tan imparungtal da ed lapag a kababaingan.” (Hebreos 6:4-6) Diad onia, say kaliing da so mansumpal a “kibabaing tan diad maandon kadimla.” Sikara so andian la na ilalo ed andi-anggaan a bilay.
“Mansinag a bilang Silesilew”
10. Siopa ra “so walaan na pakatebek,” tan panon so ‘isinag [da] a singa silesilew’?
10 Balet para ed saramay mansiansian matoor, ibabaga na propesiya: “Tan saray walaan na pakatebek so onsinag a singa kasnag na liwang; tan saramay mangitarok ed dakel diad inkatunong, singa saray bitewen ed panaon ya andi-geter, ed ando lan ando.” (Daniel 12:3) “Saray walaan na pakatebek” so malinlinew a saray matoor a nakekeraan a membro na alanaan a Kristianon kongregasyon, a sikara so ‘napno na suston pikakabat ed linawa to ed amin a kakabatan tan espiritual a pakatebek.’ Pinabiskeg nen Jehova, sikara so ‘mansungdon nagnap tan manangitepel a tekep na gayaga, a pisalamatan da so Ama ya angisaklang ed sikaran manepeg a para ed pinabang da ed tawir na saray sasantos ed liwawa.’ (Colosas 1:9, 11, 12) Nanlapulad 1919, anggaman say ‘kabilungetan a mismo so anakbong ed dalin, tan makapal a bilunget ed saray nasyon,’ sikara so “mansinag a singa silesilew ed limog na katooan. (Isaias 60:2; Filipos 2:15; Mateo 5:14-16) Sikara so “mansinag a masmasnag a singa say agew ed panarian na Ama ra.”—Mateo 13:43.
11. Diad anton dalan a “saray walaan na pakatebek” so apaneknekan a “saramay mangitatarok ed dakel diad inkatunong”?
11 Panon so pamaneknek dan “sikara so mangitarok ed dakel diad inkatunong”? (Daniel 12:3) Salamat ed matoor a panagtasi ra, saray unor ed espiritual ya Israel so atipon tan niyabawag a matunong a para ed bilay diad katawenan. Niarum ni, say baleg ya ulop na “arum a karnero” so pinmatnag, a mamapaarap ed liwawan nanlapud si Jehova ya insindag na ‘katooan nen Daniel.’ (Juan 10:16; Zacarias 8:23) Sarayan “arum a karnero” so sibubulos ya akiulop ed alanaan diad kimey da ed panangipulong ed “maong a balita.” (Mateo 24:14; Isaias 61:5, 6) Sikara, met, so mangagamil na pananisia ed niibong a dala nen Jesu-Kristo, ta pian sikara so niyabawag a matunong a panggayagaan so pikakaaro ed Dios. (Apocalipsis 7:9-15; ipareng so Santiago 2:23.) No sikara so mansiansian matoor ya anggad kasampotan, saray kangaranan da so mantultuloy a “naromog a nisulat ed libro.” Sirin, nayarin nailaloan da so pakaliktar ed sankadesyangan a panaon na irap ya ondapo ed saray nasyones.—Daniel 12:1; Mateo 24:13, 21, 22.
“Sikara So Onsinag . . . ed Ando lan Ando”
12, 13. (a) Panon a “saray walaan na pakatebek” so makayarin “onsinag . . . ed ando lan ando”? (b) Panon, ed sananey a dalan, a sikara so napaneknekan a “saramay mangitatarok ed dakel diad inkatunong”?
12 Imbaga na anghel ed si Daniel: “Saray walaan na pakatebek so onsinag a singa kasnag na liwang . . . singa saray bitewen ed panaon ya andi-geter, ed ando lan ando.” (Daniel 12:3) Panon so isindag na saray alanaan, anta balang sakey so diad kaunoran et ompatey? Unong ta sikara so mantultuloy ya “onsinag” ya anggan diad kayari na patey. Sikara so dedeskribien to ed mangatatawen a posisyon da, ibabaga nen Jesus ed sikatayo diad libro na Apocalipsis: “Say trono na Dios tan ed Kordero so wala ed syudad, tan saray ariripen to so mangisaklang ed sikato na sagradon lingkor; tan nanengneng da so lupa to tan say ngaran to so wala ed saray kamulingan da. Ontan met, anggapo la so labi, tan agda la nakaukolan so silewan nisay sikara so walaan na liwawa na agew, lapud si Jehova a Dios so mangisindag na liwawa ed sikara, tan sikara so manuley a bilang arari ed ando lan ando.”—Apocalipsis 22:3-5.
13 On, sarayan apaoli so manuley a bilang arari a singa bibitewen ed katawenan, “ed ando lan ando.” Say espiritual a kasnagan da so mangitarok na baleg iran bendisyon ed katooan. (Apocalipsis 14:13) Dedeskribien tora a bilang say “Balon Jerusalem,” kuan na libro na Apocalipsis: “Tan say syudad so agla mankaukolan ed agew nisay ed bulan ya onsinag ed sikato, lapud say gloria na Dios so nanliwawa ed sikato, tan say silew to et say Kordero. Tan saray nasyones so manakar ed panamegley na liwawa to, tan saray arari na dalin so mangitarok na gloria ra ed sikato.” (Apocalipsis 21:2, 9, 23, 24) Saray apaoli so ontulong diad pangiyaplika ed gungguna na dondon bagat “a para ed katambal na nasyones.” (Apocalipsis 22:2) Sano, diad panampot na Sanlibon Taon ya Uley, si Jesus tan saray 144,000 a katambayan ya arari tan saserdote so angipawil la ed saray matoor a totoo ed inkayadyari, sikara so peteg ya angitarok ed “dakel diad inkatunong.” Kayari na ultimon subok ed satan a panaon, say nipawil a katooan so manibukel na ayadyarin sosyedad na toon manbibilay ed paraison dalin a maando. (Apocalipsis 20:7-10; Salmo 37:29) Diad onia, say nanengneng iran resulta na mangatatawen a gloria na ‘katooan nen Daniel’ so magnayon met “ed panaon ya andi-geter, anggan ando lan ando.”
Sananey a Kioli
14. Say propesiya a “dakel ed saramay naugip ed dabok na dalin . . . et naliing” so onsabin mangisakup ed siopa ni?
14 Sirin, saray salita na anghel so mangiyakar ed sikatayo diad labas na panaon na ‘italindeg’ nen Miguel tan say agnaparengan a “panaon na irap” ya ompugta ed balon sistema na bengabengatla. Nagkalalo ni, saray bendisyon a niparalan ed panamegley na sarayan mansinag a “singa bibitewen” so agnigeter ed saraman so makaliktar ed “panaon na irap.” Si Jesus, legan a sikato so sakey a too ed dalin, kuanto: “Say oras so onsabi ya amin na saraman so wala ed pakanodnonotan a lubok so makadngel na boses to tan ompaway ira, saramay nanggawa na maong a bengatla et diad kioli ed bilay, saramay angagamil na mauges a bengatla et diad kioli ed kaukom.” (Juan 5:28, 29) Sarayan salita so mangituturo ed literal a kioli na inatey a katooan, tan andi-duaruwan sayan kioli, met, so ninatnat a kasumpalan na saray salita na anghel: “Dakel ed saramay naugip ed dabok na dalin . . . so naliing.”—Daniel 12:2.
15. Para ed saramay napaoli ed satan, panon a satan so mansumpal a kaliing “ed maandon bilay”?
15 Diad limog na saraman so apisakup ed sayan partikular a kaliing et si Daniel a mismo. Imbaga ed sikato na anghel: “No nipaakar ed inkasika, mamaarap ka ed anggaan; tan sika so manpainawa [naugip ed patey], balet sika so ontalindeg a para ed apag mo diad anggaan na saray agew.” (Daniel 12:13) Saramay singa si Daniel a napaoli ed satan tan saramay kinmiwas ed ministeryo nen Jesus tan saray agagi to ed tawen so napaoli ed atooan ya inkayadyari. Sano nilabas da so unor a subok, saray kangaranan da so permanentin nitatak ed libro na bilay. (Apocalipsis 20:5) Para ed sikara, met, say kaliing so “diad maandon bilay.”
16. Para ed siopa a say kaliing ed balon sistema na bengabengatla so napaneknekan a “maandon kadimla”?
16 Aliwan amin so onkiwas na ontan, anggaman kuan. Arum so andi-duaruwan manalin mangipawil ed saray gawan aneral ed kareenan na too ed abayaglan panaon. Saray ontan so matunong ya apasakbayan ed Biblia: “No nipaakar ed saray matakot tan saramay andian na pananisia tan saramay makapadimla ed karutakan da tan saray managpatey tan saray managlawan tan saramay managagamil na espiritismo tan managtalintao tan amin na saray matitila, say apag da so diad dayat a mandarlang ed apuy tan asupre. Saya et kabaliksan to so komaduan ipapatey.” (Apocalipsis 21:8) Sayan “komaduan ipapatey” so sakey a direktan panangukom nen Jehova a ditan et anggapo la so kioli. Satan so maando, andi-anggaan a pakalingwan. Saramay napaolin napaneknekan ya andian na panamabli so managmak ed sayan komaduan ipapatey; sirin, say kaliing da so “diad kibabaing tan diad maandon kadimla.”—Daniel 12:2.
“Say Tuan Pikakabat So Ondaak”
17. Panoy pikabat tayo a say andukey a propesiya nipaakar ed ari na baybay tan say ari na abalaten so manunan nikurit diad pankaabigan tayo natan?
17 Insan say anghel so animbawa ed si Daniel: “Tan no nipaakar ed sika, O Daniel, saray salita so gawaen mon maamot tan tatakan mo so libro, ya anggad panaon na anggaan. Dakerakel iray manpawilpawil, tan say tuan pikakabat so ondaak.” (Daniel 12:4) Sarayan salita so managyat ed imano tayo. Anggaman say propesiya na anghel nipaakar ed duaran arari so ginmapon nasumpal ed apalabas lan 2,300 taon, say pakatalos ed satan so nilukas a manuna legan “na panaon na anggaan,” nagkalautla nanlapulad 1919. Diad sarayan agew, “dakel so . . . manpawilpawil” ed Biblia, tan say tuan pikakabat so peteg a dinmaak. Natan so panaon na impangiter nen Jehova na pikakabat ed saray makatalos.
18. (a) Antoran manunan kabiangan na propesiya so nasusumpal natan odino nasumpal ni? (b) Anton asimbang ya awawey so iter na saya ed sikatayo?
18 Say katuaan a pigaran nengneng na propesiya so asumpal ed dakel lan siglos a linmabas so manserbin mamabiskeg na pananisia tayo ed saray kabiangan na propesiya a nagawa ni. (Josue 23:14) Say mundo natan so nipapanget ed biraan a bakal diad baetan na ari na baybay tan say ari na abalaten, a singa impasakbay nen Daniel. Nagkalalo ni, ipapasakbay na propesiya so mas nin maatap a panaon ed arapen. Sirin sikatayo so natulongan a mamemben na inkasimbang tayo tan paliisan so katangguyor ed panamegley na saray propaganda na anggan dinan ya ari. Saya so panaon na pamabiskeg na talek tayo ed si Jehova. Agbalot lilingwanan a si “Miguel . . . say baleg a prinsipe” so “akatalindeg” a nisesengeg ed saray totoo na Dios. Say mogmon seguradon kilalaban tayo et say ituek ed Panarian na Dios ed leksab nen Kristo Jesus.—Gawa 4:12; Filipos 2:9-11.
19. Anto so kakanaan na saray salita na anghel ed si Daniel diad balang sakey ed sikatayo?
19 Mansiansian maapit, sirin, ed “saray walaan na pakatebek,” a ‘mansisinag a singa kasnag na liwang.’ Mansiansian aktibo diad pankimey a para ed Panarian na Dios. (1 Corinto 15:58; Roma 15:5, 6) Paaralemen yo so aro ed katuaan na Salita na Dios, tan pablien a tuloy so kareenan a wala natan ed muyongan na Dios. (Salmo 119:165; Efeso 4:1-3; Filipos 2:1-5) Insan, sano si Miguel so ‘ontalindeg’ a manmekmek ed saray kakabusol nen Jehova, komon ta sikayo so makaliktar, a kaiba na amin a totoo na Dios a saray kangaranan da so “naromog a nisulat ed libro.”
Kasin naebatan yo?
◻ Diad anton dalan a wala so kaliing na “saray dakel a naugip ed dabok”?
◻ Panon a sayan ‘kaliing’ so mansumpal a “kibabaing”?
◻ Panon a “saray walaan na pakatebek” so onsinag a singa silesilew tan mangitarok ed dakel diad inkatunong?
◻ Anton arapen a kasumpalan so wala no nipaakar ed kaliing na ‘saraman so naugip ed dabok’?
◻ Panon so inkasumpal na Daniel 12:4?
[Litrato ed pahina 21]
Nanlapulad 1919 et saramay walaan na pakatebek so mangisisinag na manangiter-bilay a katuaan
[Credit Line]
NASA photo