“Yakar so Amin a Kakaplo ed Kamalir”

“Salien yo ak natan ed saya, . . . no siak agko naani lukasan ed sikayo so saray pinto na tawen.”​—MALAQUIAS 3:10.

1. (a) Diad komaliman siglo K.K.P., anton imbitasyon so inter nen Jehova ed totoo to? (b) Diad inmunan siglo K.P., anto so nansumpalan ed insabi nen Jehova ed templo parad panangukom?

DIAD komaliman siglo K.K.P., saray Israelita so agnanmatoor ed si Jehova. Insiblet daray kakaplo tan angitarok na makapuy iran ayayep ed templo bilang yaapay. Anggaman kuan, insipan nen Jehova a no sikaray mangiyakar ed interon kakaplo ed kamalir, iyibong to ed sikaray bendisyon ya anggad anggapo lay pankaliktan. (Malaquias 3:8-10) Ngalngalin 500 taon ed saginonor, si Jehova ya inlaman nen Jesus, bilang say mensahero To ed sipanan, so sinmabi ed templo diad Jerusalem pian mangukom. (Malaquias 3:1) Say Israel bilang sakey a nasyon so aromog a mankaliktan, balet saramay sinansakey a pinmawil ed si Jehova so mayamyaman ya abendisyonan. (Malaquias 3:7) Sikaray nilanaan pian magmaliw ya espiritual ya ananak nen Jehova, sakey a balon palsa, “say Israel na Dios.”​—Galacia 6:16; Roma 3:25, 26.

2. Kapigan awalaan na komaduan kasumpalan so Malaquias 3:1-10, tan anto so pangiimbitaan ed sikatayon gawaen mitunosan ed saya?

² Ngalngali 1,900 taon kayari na saya, nen 1914, si Jesus so nitrono bilang Ari ed mangatatawen a Panarian na Dios, tan say madibinon impuyan iran salita ed Malaquias 3:1-10 so walaan na komaduan kasumpalan. Mitukoyan ed sayan makapasagyat ya ebento, saray Kristiano natan so iimbitaan a mangiyakar ed interon kakaplo ed loob na kamalir. No gawaen tayo so ontan, sikatayo met so mangayaga ed saray bendisyon anggad anggapo lay pankaliktan.

3. Siopa so mensaheron mangipaparaan na dalan ed arap nen Jehova (a) diad inmunan siglo? (b) sakbay na inmunan guerra mundial?

³ Nipaakar ed isasabi to ed templo, inkuan nen Jehova: “Nia, ibakik so igagangan ko, et sikato iparaan to naani so dalan ed arap ko.” (Malaquias 3:1) Bilang kasumpalan na saya ed inmunan-siglo, sinmabi si Juan a Managbautismo ed Israel a mangipupulong ed panagbabawi ed saray kasalanan. (Marcos 1:2, 3) Kasin wala so panangiparaan a kimey a mitunosan ed komaduan isasabi nen Jehova ed templo to? On. Diad saray dekada sakbay na inmunan guerra mundial, saray Estudyante na Biblia so pinmatnag ed eksena na mundo a mangibabangat na puron doktrina na Biblia tan mangiwawalwal ed managpabanday ed Dios iran tila, a singa say Trinidad tan impiernon apuy iran doktrina. Impasakbay da met so isabi na anggaan na Saray Panaon na Hentil nen 1914. Dakel so kinmiwas ed sarayan manangakbibit na liwaway katuaan.​—Salmo 43:3; Mateo 5:14, 16.

4. Anton tepet so nepeg a resolbien legan na agew na Katawan?

⁴ Say taon 1914 so ginmapo ed tatawagey Biblia ya “agew na Katawan.” (Apocalipsis 1:10) Makatantanda iran ebento so nepeg a nagawa legan na satan ya agew, a pati say panangipabidbir ed “matoor tan makabat ya aripen” tan say katuro to ed “amin a wala ed sikato [say Katawan].” (Mateo 24:45-47) Nen 1914, nilibo ed saray iglesia so mangibabagan Kristiano ra. Dinan a grupo so bidbiren na Katawan, si Jesu-Kristo, bilang say matoor tan makabat ya aripen to? Satan a tepet so aresolbi sanen sinmabi si Jehova ed templo.

Isasabi ed Espiritual a Templo

5, 6. (a) Diad anton templo so sinabian nen Jehova parad panangukom? (b) Anton panangukom so inawat na Kakristianoan manlapud si Jehova?

⁵ Anggaman ontan, dinan a templo so sinabian to? Malinew ya aliwan diad sakey a literal a templo ed Jerusalem. Say kaunoran ed saraman a templo so aderal nen 70 K.P. Anggaman ontan, peteg a si Jehova so walaan na babaleg a templon angiyanino ed satan diad Jerusalem. Sinalita nen Pablo iyan babaleg a templo tan impanengneng ton peteg ya engranden tuloy itan, a walaan itan na masanton pasen ed tawen tan sakey a saban dia ed dalin. (Hebreos 9:11, 12, 24; 10:19, 20) Diad sayan baleg ya espiritual a templo a sinmabi si Jehova parad panangukom a kimey.​—Ipareng so Apocalipsis 11:1; 15:8.

⁶ Kapigan agawa iya? Unong ed dakel ya ebidensyan wala, nen 1918.a Anto so resulta? No nipaakar ed Kakristianoan, anengneng nen Jehova so sakey ya organisasyon a saray lima to so atedteran na dala, sakey ya abulok a relihyoson sistema a sikatoy akibalangkantis a mismo ed sayan mundo, a miaalyansa ed mayaman tan mamapairap ed duka, a mangibabangat na pagano iran doktrina imbes ya agamilen so puron panagdayew. (Santiago 1:27; 4:4) Diad panamegley nen Malaquias, angipasakbay si Jehova: “Masiglat ak naani a tasi a sumpa ed saray maanito, tan sumpa ed saray mikakalogoran, tan sumpa ed saray matila a mansamba, tan sumpa ed saray manangapos ed saray miopopa ed saray upa ra, ed balo a bii, tan ed saray ulila.” (Malaquias 3:5) Ginawa na Kakristianoan iyan amin tan mas mauges. Nen 1919 malinew ya anengneng a sikatoy kinondena nen Jehova ed kadederal pati ed arum a kabiangan na Babilonia a Baleg, say sankamundoan a simbaan na palson relihyon. Nanlapulad saman, say tawag so nipaarap ed saray maptek-impanpuso: “Ompaway kayo ed sikato, baley ko.”​—Apocalipsis 18:1, 4.

7. Siopa so binidbir nen Jesus bilang matoor tan makabat ya aripen to?

⁷ Siopa, sirin, so matoor tan makabat ya aripen? Diad inmunan siglo, ginmapo itan ed melag a grupo a kinmiwas ed panagtasin kimey nen Juan a Managbautismo tan si Jesus, say mensahero na sipanan. Diad siglo tayo, satan et say daiset a nilibon kinmiwas ed panangiparaan a kimey na saray Estudyante na Biblia legan na saray taon a mamapaarap anggad 1914. Saraya so nansungdo ed mairap iran subok legan na inmunan guerra mundial, balet indemostra ran say kapusoan da et walad si Jehova.

Sakey a Panaglinis a Kimey

8, 9. Nen 1918, diad antoran dalan a kaukolan na matoor tan makabat ya aripen so panaglinis, tan anton sipan so ginawa nen Jehova nipaakar ed saya?

⁸ Anggaman ontan, sayan grupo so mankaukolan met na panaglinis. Arum ya angidapag na inkasikara diad saratan so nagmaliw a kakabusol na pananisia tan nepeg a napagit. (Filipos 3:18) Arum so agmabulos a manakbat na saray responsabilidad a nalalanor ed panaglingkor ed si Jehova tan niagos. (Hebreos 2:1) Nilikud ed satan, walaray Binababilonian ag-agamil a natitilak a kaukolan a naekal. No nipaakar ed inkaorganisa nepeg met a nalinisan so matoor tan makabat ya aripen. Sakey a manepeg a talindeg ed neutralidad ed sayan mundo so nepeg ya aralen tan iyaplika. Tan legan a say mundo so lalon nabubulok, nakakaukolan a sikaray mipuligesgesan pian ekalen ed saray kongregasyon so inkadutak ed moral tan espiritual.​—Ipareng so Judas 3, 4.

⁹ On, nakakaukolan so panaglinis, balet siaaron insipan nen Jehova so nipaakar ed nitronon Jesus: “Sikato onyorong naani a singa say manlinis tan mangogol na pilak, et gogolan to naani so saray anak nen Levi, et linisan to ra naani a singa say balitok tan say pilak; et sikara manbagat ira naani ed Jehova na saray bagat ed inkatunong.” (Malaquias 3:3) Nanlapulad 1918, a susumpalen nen Jehova so sipan to tan lilinisan to so totoo to diad panamegley na sayan mensahero na sipanan.

10. Anton nengneng na yaapay so intarok na totoo na Dios, tan anton imbitasyon so iiter nen Jehova ed sikara?

¹⁰ Say alanaan iran agagi nen Kristo tan say baleg ya ulop ya akiulop ed sikara diad saginonor diad serbisyo’d si Jehova so agunggunaan ya amin manlapud ikikiwas nen Jehova bilang managlinis tan bilang managgogol na pilak. (Apocalipsis 7:9, 14, 15) Bilang sakey ya organisasyon sikaray sinmabi, tan siansian onsabi, ya ipaparungtal so regalon yaapay diad inkatunong. Tan say yaapay da so “makapaliket ed Jehova, a singa ed saray agew ya inmuna, tan singa saray taon ya abayag la.” (Malaquias 3:4) Diad saraya a mapropetikon angimbita si Jehova: “Yakar yo dia so amin a kakaplo ed kamalir, pian wala komon so tagano ed abung ko, tan salien yo ak natan ed saya, kuan nen Jehova na ejercito, no siak agko naani lukasan ed sikayo so saray pinto na tawen, et ikalbok naani ed sikayo so sakey a bendicion, ya angapo naani so pasen a makasarag a mangawat ed sikato.”​—Malaquias 3:10.

Saray Yaapay tan Kakaplo

11. Akin a saray yaapay unong ed sistema na Mosaikon Ganggan so agla kakaukolanen?

¹¹ Diad agew nen Malaquias intarok na totoo na Dios iray literal a yaapay tan kakaplo, a singa say bukel, bunga, tan ayayep. Anggan ed agew nen Jesus, angitarok iray matoor ya Israelita na literal iran yaapay ed templo. Anggaman ontan, kayari impatey nen Jesus amin na satan so anguman. Say Ganggan so inekal, a pati say ganggan ed pangiparungtal na espesipikon materyal iran yaapay tan kakaplo. (Efeso 2:15) Sinumpal nen Jesus so mapropetikon tipo na saray yaapay ed silong na Ganggan. (Efeso 5:2; Hebreos 10:1, 2, 10) Sirin, diad anton dalan a saray Kristiano so makapangitarok na saray yaapay tan kakaplo?

12. Anton nengneng na espiritual iran yaapay tan bagbagat so gagawaen na Kristianos?

¹² Parad sikara, saray yaapay so matalona diad espiritual a nengneng. (Ipareng so Filipos 2:17; 2 Timoteo 4:6.) Alimbawa, sinalita nen Pablo so panagpulong a kimey bilang sakey ya yaapay sanen inkuanto: “Lapu ed sikato sirin mangisaklang itayo ed Dios a naynay na bagat a panangidayew, salanti, say bunga na saray bibil mangiwakawak na ngaran to.” Impanengneng to so sananey ya espiritual a nengneng na bagat sanen insimbawa ton: “Ag yo lingoanan so panaggawa na maabig tan say pannanabang: ta say Dios napaliket a maong ed sarayan bagat.” (Hebreos 13:15, 16) Sano pasesegen na atateng iray anak da ya onloob ed payunir a serbisyo, nibaga ya iyaapay da ra ed si Jehova, a singa impangiyapay nen Jepte ed marikit to bilang “yapay . . . a bagat a poolan” ed Dios, ya angiter ed sikato na impanbiktorya.​—Uko-ukom 11:30, 31, 39.

13. Akin a saray Kristiano so agnakaukolan a mangiter na literal a kakaplo ed nalmoan da?

¹³ Anggaman ontan, anto so nipaakar ed saray kakaplo? Kasin saray Kristiano so obligadon mangibiig na kakaplo ed materyal a nalmoan (income) da tan iter itan ed organisasyon nen Jehova, a mipara ed gagawaen na arum iran relihyon na Kakristianoan? Andi, agnakaukolan itan. Anggapo so kasulatan a mangibabagan say ontan a totontonen et parad Kristianos. Sanen si Pablo so angolekta na saray kontribusyon parad saray mankaukolan ed Judea, agto sinaglawi so espisipikon porsienton nepeg ya iter. Imbes, inkuanto: “Balang sakey gawaen to komon so ginetma to ed puso to; aliwa a dia ed kaermenan odino dia ed pasootan; ta say Dios aroen to so sililiket a mangiter.” (2 Corinto 9:7) Diad impansalita nipaakar ed saramay wala ed nikadkaduma iran ministeryo, impanengneng nen Pablo ya anggaman arum et magenap a sinuportaan na boluntaryo iran kontribusyon, sikato so akaparaan a mankimey tan manuporta ed inkasikato. (Gawa 18:3, 4; 1 Corinto 9:13-15) Anggapo so niasain iran kakaplo parad sayan gagala.

14. (a) Akin a say pangitarok na sakey a kakaplo et agmangirerepresenta ed pangiter tayo na amin a kayarian tayo ed si Jehova? (b) Anto so irerepresenta na kakaplo?

¹⁴ Malinew, parad saray Kristiano say kakaplo so mangisisimbolo, odino mangirerepresenta, na sakey a bengatla. Lapud satan et kakaplo tan say numeron samplora so mabetbet a mangisisimbolo ed mangaraldalin ya inkakumpleto diad Biblia, kasin say kakaplo so mangisimbolo ed pangiter tayo na amin a kayarian tayo ed si Jehova? Andi. Sano idedika tayo so inkasikatayo ed si Jehova tan isimbolo iya diad bautismo ed danum, satan so pangiter tayo ed sikato na amin a wala ed sikatayo. Nanlapulad dedikasyon tayo, anggapo so wala ed sikatayon agkayarian nen Jehova. Anggaman ontan, aabuloyan nen Jehova iray sinansakey ya usaren iray kayarian da. Kanian say kakaplo et irepresenta to so kabiangan na wala ed sikatayon itarok tayo ed si Jehova, odino usaren ed serbisyo nen Jehova, bilang panangipatnag na aro tayo ed sikato tan panamidbir tayo ed katuaan a kayarian to itayo. Say modernon-agew a kakaplo et agto kabaliksan so basta sakey a kakaplo. Diad arum a kipapasen et mas daiset. Parad arum satan so mas dakel. Mangitarok so balang indibidual no anto so ginetma na puso ton itarok tan unong ya iyabuloy na saray sirkumstansya to.

15, 16. Anto so nisasakup ed espiritual a kakaplo tayo?

¹⁵ Anto so nisasakup ed sayan espiritual a kakaplo? Sakey a bengatla et iiter tayo ed si Jehova so panaon tan biskeg tayo. Say panaon ya uusaren tayo ed saray miting, diad iyaatendi ed saray asamblea tan kumbension, diad lawak a serbisyo, amin na saya so bengatlan iiter ed si Jehova​—kabiangan na kakaplo tayo. Say panaon tan biskeg ya uusaren tayo ed ibibisita ed mansasakit tan itutulong ed arum​—saraya so kabiangan met na kakaplo tayo. Say itulong ed panangipaalagey na saray Kingdom Hall tan pibibiang ed kimey na panagmintina tan panaglinis na hall so kabiangan met.

¹⁶ Isasakup met na kakaplo tayo so pinansyal iran kontribusyon tayo. Lapud ekstraordinaryon indaak ed organisasyon nen Jehova diad agano niran taon, ondaraak iray pinansyal ya obligasyon. Nakakaukolan iray balon Kingdom Hall, a pati saray balon pasilidad ed sanga tan balo iran Assembly Hall, pati ed panag-asikaso ed saramay nipaalagey la. Say pangobre ed saray gastos na saramay angiyabuloy ed inkasikara parad espesyal a lingkor​—so mabetbet a mangagaway baleg iran personal a panagsakripisyo pian nagawaan itan​—​so manugyop met na balbaleg ya angat. Nen 1991 say agastos so masulok a 40 milyon dolyar ed pananuporta lambengat ed saray misionero, managbiahen manangasikaso, espesyal payunir, amin et nitarya diad panamegley na boluntaryo iran kontribusyon.

17. Anto labat so nepeg tayon iter bilang espiritual a kakaplo tayo?

¹⁷ Anto so nepeg tayon iter bilang espiritual a kakaplo tayo? Ag-igegeter nen Jehova so sakey a porsiento. Anggaman kuan, say liknaan na dedikasyon, puron panangaro ed si Jehova tan saray agagi, ontan met ed liknaan na inkaganatan ed pakamorian walaray bilay a nepeg ya isalba, so mamaseseg ed sikatayon mangitarok ed interon espiritual a kakaplo tayo. Liknaen tayon nakakaukolan a lingkoran si Jehova ed sankalaknaban no nayari. No geteran tayo odino mangiter a napipilitan ed inkasikatayo odino ed kaykayarian tayo, saya so mipadpara ed panagtakew ed Dios tayo.​—Ipareng so Lucas 21:1-4.

Abendisyonan Ya Anggad Anggapo Lay Kaliktanen

18, 19. Panon a saray totoo nen Jehova so nabebendisyonan diad pangitatarok na interon kakaplo ra?

¹⁸ Nanlapulad 1919, onkikiwas iray totoo nen Jehova a sibubunlok tekep na panaon, biskeg, tan pinansyal iran kayarian da ed saray pankaukolan ed panagpulong a kimey. Peteg a sikaray angitarok na interon kakaplo ed loob na kamalir. Bilang nansumpalan, susumpalen nen Jehova so sipan to tan inyibong to so bendisyon ya anggad anggapo lay kaliktanen. Nanenengneng iya ed biglabiglan imbaleg na bilang da. Manlapud pigaran libo iran alanaan a manlilingkor ed si Jehova sanen sikato so sinmabi ed templo to nen 1918, sikaray ombabaleg ya anggad natan, say alanaan a pati kakaiba ra, say arum a karnero, a manbilang na masulok ya apatiran laksa diad 211 nanduruman daldalin. (Isaias 60:22) Saraya so nabebendisyonan met na mantutultuloy ya ibabaleg ed pakatalos ed katuaan. Say mapropetikon salita so nagkalalon nipapaseguro ed sikara. Say talek da ed kasumpalan na saray gagala nen Jehova so masekder a tuloy a nileletneg. (2 Pedro 1:19) Sikaray peteg a totoon “imbangat nen Jehova.”​—Isaias 54:13.

¹⁹ Diad panamegley nen Malaquias, impasakbay nen Jehova so kaaruman a bendisyon: “Saman la saray tinmakot ed Jehova nansasalita ra ed sakey tan sakey; et si Jehova tinmalineng, tan dinmengel, et sakey a libro a pakanodnonotan so sinulatan ed arap to, nipaakar ed saray tinmakot ed Jehova, tan saray nannonot ed ngaran to.” (Malaquias 3:16) Diad amin na saray organisasyon a mangibabagan Kristiano, saray Tasi nen Jehova lambengat so namparan mannononot ed ngaran to tan mangidadayew ed satan diad limog na nasyones. (Salmo 34:3) Agaylan maliket ira a napaseguroan a tatandaan nen Jehova so katooran da!

20, 21. (a) Anton abenditon siglaotan so pangagayagaan na tuan Kristianos? (b) No nipaakar ed Inkakristiano, anton panangibiig so napapalinew?

²⁰ Say alanaan a nakdaan so nikadkaduman totoo nen Jehova, tan say baleg ya ulop, a mililimog ed sikara, so miani ed sikara na saray bendisyon na puron panagdayew. (Zacarias 8:23) Diad panamegley nen Malaquias, isisipan nen Jehova: “Et sikara naani so kien ko, kuan nen Jehova na saray ejercito, salanti dili a kayarian ko, dia ed agew a gawaen ko; et imasakit kora naani, singa sakey a too imasakit to so dili ya anak to a laki a manlinkor ed sikato.” (Malaquias 3:17) Agaylan bendisyon a si Jehova so walaan na ontan a matamoy a panangikuenta ed sikara!

²¹ Peteg, lalon nipapatnag so pandumaan na tua tan palson Kristianos. Unong a pambabanikelan na totoo nen Jehova a tumboken iray estandarte to, say Kakristianoan so ompapalalon onlelereg ed lunek na inkarutak na sayan mundo. Peteg a saray salita nen Jehova so napapaneknekan a tua: “Dia ed ontan ompawil kayo naani tan mangibiig kayo naani na matunong tan marelmeng, say manlinkor ed Dios tan say ag manlinkor ed sikato.”​—Malaquias 3:18.

22. Antoran bendisyon so napanmatalkan tayon pangayagaan no sikatayo so mantultuloy a mangitarok na interon kakaplo?

²² Asingger la ya onsabi so agew na pikukuentaan parad palson Kristianos. “Nia, say agew onsabi, sikato so mamool a singa apuy na palbaan; et saray amin a manpangta, tan saray amin a mangawa na mauges sikara naani dayami; et say agew ya onsabi poolan to ra naani, kuan nen Jehova na saray ejercito.” (Malaquias 4:1) Kabat na totoo nen Jehova a sikato so manalimbeng ed sikara diad satan a panaon, unong a sinalimbengan to so espiritual a nasyon to nen 70 K.P. (Malaquias 4:2) Agayla so gayaga ra a nawalaan na ontan a panamaseguro! Sirin, anggad isabi na satan a panaon balang sakey komon ed sikatayo so mangipanengneng na panamabli tan panangaro tayo ed si Jehova diad pangitarok na interon kakaplo ed loob na kamalir. Insan makapanmatalek tayo ya itultuloy to itayon bendisyonan anggad anggapo lay kaliktanen.

[Paimano ed leksab]

Kasin Nisalaysay Yo?

◻ Diad moderno iran panaon, kapigan so insabi nen Jehova ed templo a kaibay mensahero to ed sipanan?

◻ Siopa so matoor tan makabat ya aripen, tan anton panaglinis so kaukolan da kayari 1918?

◻ Anton nengneng na espiritual iran yaapay so itatarok na tuan Kristianos ed si Jehova?

◻ Anto so kakaplo ya angimbitaan ed saray Kristiano ya itarok da ed kamalir?

◻ Antoran bendisyon so pangagayagaan na totoo na Dios diad pangitarok na espiritual iran kakaplo?

[Litrato ed pahina 21]

Ilalaktip na espiritual iran kakaplo tayo so pangiyapay ed biskeg tan kaykayarian tayo a mangipaalagey na saray Kingdom Hall

[Litrato ed pahina 22]

Lapud panamendisyon nen Jehova ed totoo to, nakakaukolan so dakel a panagpaalagey, a pati saray Kingdom Hall tan Assembly Hall