Tepetepet Malapud Managbasa

Diad 1 Pedro 2:9, tatawagen na King James Version so alanaan a Kristianos bilang “sakey a pinilin kailalakan.” Nepeg kasin apektaen na saya so panmoria tayo ed impangusar nen Jesus ed “kailalakan” a nirekord diad Mateo 24:34?

Say salitan “kailalakan” so ompapatnag ed impangipatalos ed namparan bersikulo ed pigaran bersyon. Unong ed King James Version, insulat nen apostol Pedro: “Balet sikayo so sakey a pinilin kailalakan, sakey a maarin inkasaserdote, sakey a masanton nasyon, sakey a nikaduman totoo; a nepeg yon ipanengneng iray panangidayew ed sikato ya anawag ed sikayo manlapud kabilungetan a mamaarap ed makapakelkelaw a liwawa to.” Tan impasakbay nen Jesus: “Tua kuan ko ed sikayo, sayan kailalakan so ag-onlabas ed antokaman a paraan anggad kagawa na amin na sarayan bengatla.”​—1 Pedro 2:9; Mateo 24:34.

Diad inmunan bersikulo, inusar nen apostol Pedro so Griegon salitan geʹnos, bangta diad teksto ed balikas nen Jesus et naromog tayo so ge·ne·aʹ. Nayarin ompatnag a manpadpara irayan duaran Griegon salita, tan nisiglaot ira ed saksakey a lamot; ingen, saratan so nandumaan a salita, tan nandumaan so kabaliksan da. Ibabaga na New World Translation of the Holy Scriptures​—With References diad paimano’d-leksab ed 1 Pedro 2:9: “‘Race.’ Gr., geʹnos; miduma ed ge·ne·aʹ, ‘kailalakan,’ a singa ed Mat 24:34.” Naromog so mipetekan a paimano’d-leksab ed Mateo 24:34.

Unong ya ipapanengneng na saratan a paimano’d-leksab, say geʹnos so matukotukoy ya impatalos ed Ingles a salitan “race,” unong a kaslakan a naromog ed Ingles iran patalos. Diad 1 Pedro 2:9, inyaplika nen Pedro so propesiya a naromog ed Isaias 61:6 ed alanaan a Kristianos a walaan na mangatatawen ya ilalo. Saraya so inala manlapud dakel a nasyon tan tribu, balet say nasyonalidad da so agla makabaliksan sano saray alanaan a Kristiano et magmaliw la a kabiangan na nasyon na espiritual ya Israel. (Roma 10:12; Galacia 3:28, 29; 6:16; Apocalipsis 5:9, 10) Diad espiritual a pantalos, impabidbir ira nen Pedro bilang magmamaliw a nikaduman grupo​—“sakey a pinilin rasa, sakey a maharlikan inkasaserdote, sakey a masanton nasyon, sakey a baley parad espisyal a kayarian.”

Balet diad Griegon teksto ed saray salita nen Jesus a naromog diad Mateo 24:34, naromog tayo so salitan ge·ne·aʹ. Malaknab a binidbir a say tutukoyen nen Jesus et aliwan ed antokaman a “rasa” na totoo, noagta ed totoon manbibilay ed sakey a panat na panaon.

Ngalngalin sanlasus taon lay apalabas, pinalinew iya nen Charles T. Russell, inmunan presidente na Watch Tower Society, diad impangisulat to: “Anggaman saray salitan ‘kailalakan’ tan ‘rasa’ so nibagan nanlapud parehon lamot odino lapuan, balet ag-ira pareho; tan diad Makasulatan a panangusar say duaran salita so mandumaan a tuloy. . . . Diad taloran nandumaan a rekord na sayan propesiya, say Katawan tayo so napagalangan ed impangusar na sigpot a duman Griegon salita (genea) ya agmankabaliksan na rasa, balet walaan na parehon kabaliksan ed salita tayon Pangasinan a kailalakan. Arum a pakakausaran na sayan Griegon salita (genea) so mamapaneknek a satan so ag-uusaren ya ontukoy ed kabaliksan na rasa, noagta diad panutukoy ed totoo a manbibilay a mankakapanaonan.”​—The Day of Vengeance, pahina 602-3.

Agano nin tuloy, oniay inkuan na A Handbook on the Gospel of Matthew (1988), a ginagalan parad saray managpatalos na Biblia: “[Say New International Version] so literal a mangipapatalos ed sayan kailalakan balet tutumbokan na paimano’d-leksab ya, ‘Odino rasa.’ Tan panisiaan na sakey ya eskolar ed New Testament a ‘say tutukoyen nen Mateo et aliwa lambengat a say inmunan kailalakan kayari nen Jesus noagta amin a kailalakan na Judaismo ya angipulisay ed sikato.’ Anggaman ontan, anggapo so linguistikon ebidensya a manuporta ed dinanman ed sarayan konklusyon, tan saratan so nepeg ya ibaliwala bilang getmaen pian napaliisan so malinew a kabaliksan. Diad orihinal a kipapasen to, ontutukoy lambengat itan ed saray kapanaonan nen Jesus.”

Unong ya asingbat ed pahina 10 ya anggad 15, kinondena nen Jesus so kailalakan na Judios ed panaon to, saray kapanaonan to ya angipulisay ed sikato. (Lucas 9:41; 11:32; 17:25) Mabetbet ton inusar iray adjective a singa say “marelmeng tan mikakaluguran,” “andiay-pananisia tan pikewet,” tan “mikakaluguran tan makasalanan” diad panideskribe ed satan a kailalakan. (Mateo 12:39; 17:17; Marcos 8:38) Diad unor a pankanawnawa sanen inusar nen Jesus so “kailalakan,” sikato so walad Palandey na Olibo a kaiba toray apatiran apostol. (Marcos 13:3) Saraman a lalaki, ya agni alanaan na espiritu nisay kabiangan na Kristianon kongregasyon, so maseguron ag-anibukel ed sakey a “kailalakan” odino sakey a rasa na totoo. Anggaman ontan, sikaray mikabisadon tuloy ed impangusar nen Jesus ed terminon “kailalakan” diad panutukoy to ed saray kapanaonan to. Kanian makatunongan labat a natalosan da so walad kanonotan to sanen sinalambit to so “sayan kailalakan” ed unor a pankanawnawa.a Si apostol Pedro, a wadman, nanlapulad saman so amaseseg ed saray Judio: “Nisalba kayo manlapud sayan pikelkel a kailalakan.”​—Gawa 2:40.

Mabetbet min ipapalapag so ebidensya a dakel ed saray impasakbay nen Jesus ed sayan parehon diskurso (a singa saray bakal, yegyeg, tan eras) so asumpal ed panaon diad baetan na impangibaga to ed propesiya tan ed kaderal na Jerusalem nen 70 K.P. Dakel so asumpal, balet aliwan amin. Alimbawa, anggapo so ebidensya a kayarin nilusob na saray Romano so Jerusalem (66-70 K.P.) et pinmatnag so “say tanda na Anak na too,” a sengengan na impamekpek na “amin a tribu ed dalin” ed inkasikara. (Mateo 24:30) No ontan, satan a kasumpalan ed baetan na 33 K.P. tan 70 K.P. so ununan kasumpalan lambengat, aliwan sigpot odino malaknab a kasumpalan a tutukoyen met nen Jesus.

Insulat nen G. A. Williamson, diad introduksyon ed patalos to ed impalapag nen Josephus a The Jewish War: “Ibabaga nen Mateo a saray babangatan so tinmepet [ed si Jesus] na nankaduan tepet​—nipaakar ed kadederal na Templo tan nipaakar ed mismon pinal ya isasabi To—​tan inikdan To ra na nankaduan ebat, a diad ununan kabiangan et sankalinewan ya angipasakbay ed nagawgawa a sigpot a deniskribe nen Josephus.”

On, diad ununan kasumpalan, “sayan kailalakan” so mapatpatnag a mankabaliksan a singa met ed arum a panaon​—say walan kailalakan ed saman na agmananisian Judios. Satan a “kailalakan” so ag-onlabas ya agda naeksperiensia so impasakbay nen Jesus. Singa ed inkomento nen Williamson, sayan propesiya so apaneknekan a tua ed inlabas na saray dekada ya anggad inkaderal na Jerusalem, a singa ed impaneskribe nen Josephus a sakey ya akaimaton a manag-awaran.

Diad komadua odino babaleg a kasumpalan, “sayan kailalakan” so makatunongan met ya ontutukoy labat ed mankapanaonan a totoo. Unong a papaneknekan na artikulo ya onggapo ed pahina 16, agtayo ikuan a si Jesus so manutukoy ed sakey a nigeter a bilang na saray taon a manibukel ed sakey a “kailalakan.”

Diad kasuniyan to, duaran manunan bengatla so nibaga nipaakar ed dinanman a panaon ya isusuheri na “kailalakan.” (1) Sakey a kailalakan na totoon agnayarin ipasen bilang sakey a panaon a walaan na nigetar a bilang na saray taon, a singa ed panmoria ed panaon a walaay nigeter a bilang na saray taon (dekada odino siglo). (2) Saray totoo na sakey a kailalakan a manbibilay ed loob na sakey a kagkanepegan a tikey na panaon, ya aliwan andukey.

Kanian, sanen nadngel na saray apostol so tutukoyen nen Jesus a “sayan kailalakan,” anto kasi naisip da? Bangta sikatayon makakatalos ed kasumpalan, so makakatebek a say inkaderal na Jerusalem ed “baleg a kairapan” so agawa kayari na 37 a taon, saray apostol a makakarengel ed si Jesus so agmakaamta ed satan. Imbes, say impanalambit to na “kailalakan” so mangipasabi ed sikara, na aliwan ideya na andukey a panaon, noagta saray totoon manbibilay ed relatibon limitadon panat na panaon. Satan so tua met ed kipapasen tayo. Agaylan matukoy, sirin, iray tinmumbok a salita nen Jesus: “Nipaakar ed satan ya agew tan oras et anggapoy siopaman a mikabat, anggan saray anghel ed katawenan nisay say Anak, noagta say Ama lambengat. . . . Lapud saya et paneknekan yo met so inkasikayo ya akaparaan, lapud diad oras ya agyo iisipen, say Anak na too so onsabi.”​—Mateo 24:36, 44.

[Saray paimano ed leksab]