Apocalipsis​—Kapigan?

SIKATO so ngalngalin singa pambabasa ed sankabaloan a peryodiko​—bakabakal, yegyegyeg, salot, sakit, eras, krimen, tan takot! Amin na sarayan nagagawa tan dakel ni so propesiya ed Biblia. Ituturo ra so panaon a pambibilayan tayon amin a bilang “saray kaunoran ya agew.” Kabaliksan na saya so panaon a mangipaarap ed mabitar tan nisipan ya apocalipsis. Panon so pakapanseguro yo ed saya?

Natatasian yo so kasusumpal na saray propesiya na Biblia natan. “Nepeg yon arapen so katuaan,” kuan na Biblia, “say unor a panaon na sayan mundo et sakey a panaon na gonigon. Saray totoo so agmangaro na antokaman noag say kuarta tan say laman dan dili; sikara so mapaatagey, mapasirayew, tan mauges; ya anggapo so respeto ra ed atateng, anggapoy pisasalamat, aliwan maridios, anggapoy aro ra ed nianakan; sikara so . . . sankaili ed amin a kaabigan, . . . maaro ed lamalaman da. Sikara so totoon mangisasandi na liket ed Dios, totoon mangipipreserba na akinpaway ya indengan na relihyon, balet akaalagey a mangitatapat ed kapetegan to.” (2 Timoteo 3:1-5, The New English Bible) Agta sarayan mismon kipapasen so nanenengneng yo ed anggan iner?

Dakel a mabilay natan, angangko et anggan sikayo, so makanonot ed panaon sanen saray kipapasen aliwan singa inkauges a singa natan. Saray totoo so lalon makonsidera ed balang sinansakey. Saray ugugaw so lalon marespeto ed saray atateng da tan diad matatatken. Saray lalaki, bibii, tan ugugaw so ag-antakot a manakar ed kalsada, anggan diad labi. Balet saray panaon so manguuman a maples. Anggano arum ed sarayan kipapasen so singa kasmak ed lugar yo, peteg a say posibilidad na bakal nuklar​—nisengeg ed inkasebeg na too ed pakagegemtan na pakayari​—so mangaapekta ed sikatayon amin.

On, unong a singa say Dios ed panamegley na Salita to, say Biblia, so malinlinew ya angipropesiya “ed unor a panaon na sayan mundo,” ontan, met, ya intarya to so impormasyon nipaakar ed panaon na apocalipsis, sano si Jesus so onsabi a mangidapo na panangukom.

Mas Maapit nen Say Iisipen na Dakel

“Saray balon bengatla so ipasakbay ko natan,” kuan na Dios. “Sakbay na kipatnag da et ibagak ira ed sikayo.” (Isaias 42:9, The Jerusalem Bible) On, indatak to ed sikatayo diad Biblia iray manunan ebento a nagawa sakbay a tuloy na apocalipsis.

Alimbawa, sinalita nen Jesus so sakey a mensahen ipaknol ed sankamundoan tan satan so insiglaot to ed apocalipsis. Inkuanto: “Sayan maong a balita na panarian so nipulong ed amin ya atooan a dalin ya onkanan pantasi ed amin a nasyones; tan insan onsabi so anggaan.” (Mateo 24:14) Satan ya “anggaan” so mangisasakup ed apocalipsis. Natan, saray Tasi nen Jehova so manguusar na nilasus milyon ya oras ed sakey taon a maseseg diad panangiyabawag ed satan a mensahe ed kabkaabungan tan diad anggan anton arum a paraan ed masulok a 200 daldalin ed sankagloboan!

Intawag to so mabitar a kasimbangan diad kagunggunaan na saray patumbok to, impareng nen Jesus so panaon a mangitonton ed apocalipsis diad panaon sakbay na Delap ed agew nen Noe. Diad panaon nen Noe saray totoo so nigalegalet ed panangan tan panag-inum tan panliliket ya “agda inimano” so mensahe nen Noe nipaakar ed mabitar ya onsasabin kadederal. Sikara so angibaliwala ed saray pasakbay to.​—Mateo 24:37-39.

Agaylan maapit so agew tayo a misimbangan ed saray kipapasen sakbay na Delap! Saray totoo so okupadon tuloy ed saray inagew-agew a kurang da ed bilay ya agda iimanoen iray pasakbay tan pamatnagan ed onsasabin apocalipsis.

Siansia, say apocalipsis so mas asingger nen say iisipen na dakel. Nipaakar ed tanda na kaunoran iran agew, inyabawag nen Jesus a “sayan kapolian so aglan balot napaso ya anggad amin na sarayan bengatla so nagawa.” (Mateo 24:34) Diad dinan a kapolian so sasalitaen nen Jesus?

Say Kapolian na 1914

Tutukoyen to “so relatibon mareen tan maaligwas a panaon na Victoria ed Gran Britanya,” inkuan nen datin Primo Ministron Harold Macmillan ya impasen ton ‘say mundo a nianakan to’ so sakey a “lalon onabig lan onabig.” Balet “bigla, ag-inilaloan, sakey a kabuasan nen 1914 et say interon bengatla so angangga.” Satan so tinawag to na anggaan na “100 taon na deen tan aligwas,” anonotan nen Macmillan no panon a say Guerra Mundial I et tinandaan to “so anggaan na sakey a panaon” tan say “gapo na gutgutan a siansia nin nagagawa.” Dakel nin arum, ilautla ed saraman so nambilay nen 1914 tan siansia nin mabilay, so mikabat ed saya a tua.

On, a singa intawag na sayan magasin ed imano na saray bumabasa to ed saray linmabas a taon, say pamatnagan so mangituturo ed kapolian na 1914 a bilang say kapolian a sinalita nen Jesus.a Sirin, “sayan kapolian so aglan balot napaso ya anggad amin na sarayan bengatla so nagawa [a pati say apocalipsis].”

Anggamano masulok lan 70 taon so linmabas nanlapulad 1914, wala niran siansia so sinansakey ed kaliberliber a nambilay ed satan a panaon. Unong ed The American Legion Magazine a para ed Disyembre 1984, diad Estados Unidos et wala so 272,000 a beterano nen Guerra Mundial I a mabilay ni, tan satan so mipara ed arum a daldalin. Anggaman kuan, say bilang so mandaiset a maples. Sirin panon kabayag ni ya anggad unor a beterano na Guerra Mundial I so manmartsa ed awaran?

Manwarin sayan estatista so nayarin mangitawag na imano ed unor iran oras na kapolian nen 1914, panon so inkaespesipiko tayo nipaakar ed eksakton panaon na apocalipsis?

“Sakey a Matakew ed Labi”

Ipapasakbay na Biblia: “No nipaakar ed panpanaon tan saray panaon, . . . sikayon mismo et kabat yon maong a say agew nen Jehova so onsabin petepeteg a singa sakey a matakew ed labi.” (1 Tesalonica 5:1, 2) Kasin makatunongan ya ilaloan yo so matakew a mangipawit na telegrama diad pangiyabawag to ed no kapigan so ipaplano ton pantulisan ed abung yo?

Matukotukoy, sirin, sikatayo so sisimbawaen nen Jesus nipaakar ed eksakton oras: “Mantultuloy a manbantay, mansiansian aliing, ta agyo kabat no kapigan so aturon panaon.” (Marcos 13:32-37) Anggaman kuan, naimano a dineskribe nen Jesus iray nanduruman nagawgawa a mangituturo ed kapolian na 1914. Tan dedeskribien na Biblia so arapen iran nagawa a mananda ed mapatnag lan isabi na apocalipsis. Anto so nayarin ilaloan tayo?

Pangumanan na Saray Nagawgawa

Inkuan nen apostol Pablo: “Kapiganman ya ibabaga ra: ‘Kareenan tan kaligenan!’ insan biglan kadederal so tampol ya ondapo ed sikara a singa pasakit na sakey a biin malukon; tan sikara so agbalot makaliktar.” (1 Tesalonica 5:3) Sirin legan a sikatayo so mamapaarap ed kasampotan na sarayan “kaunoran ya agew,” nailaloan tayo so manunan imano a niiter ed “Kareenan tan kaligenan!” diad kasumpalan na saray salita nen Pablo. Insan anto?

Ipapanengneng na saray propesiya na Biblia a say relihyon ed mundo ya adeskribin “Babilonia a Baleg,” so biglan atakien na saray mangaraldalin a mapulitikon pakayari tan onsabi ed biglan anggaan to! (Apocalipsis 17:5, 16; 18:10, 17) Saya so mananda ed gapowan na “baleg a kairapan ya agni agawa nanlapulad gapo na mundo ya anggad natan.” (Mateo 24:21) Balet panon so pangapekta na saya ed saraman so ‘nansiansian aliing’ tan manbabantay ed apocalipsis?

Saray tuan Kristianos so makapanmatalek a sikara so iliktar nen Jehova. (2 Pedro 2:9) On, kapiganman a kabat da si Jehova a Dios tan sikato so lingkoran dan andi-siblet, sikara so andian na sengegan na itakot sano say Dios tan si Kristo so ondateng a mibakal ed bakal na Armagedon.​—Apocalipsis 11:17, 18; 16:14, 16.

Ontumbok, say apocalipsis so mangipaarap ed kipuera nen Satanas a Diablo tan saray agnanengneng a puersa to a manlapud katooan. (Apocalipsis 20:2, 3) On, say sanok ya onsasabi so onlampas ni ed kalinisan na dalin ed saray totoon agmalabay a manlingkor ed Dios. Anggan saray marelmeng ya espiritun mangiimpluensya ed mundo natan ed kaliberliber tayo so naekal. (2 Tesalonica 1:6-9) Kabaliksan na saya so andi-anggaan a bendisyon ed saray niliktar ed apocalipsis.

Apocalipsis​—Mangipaarap ed Paraiso

Nipaakar ed saray manaayam ed dalin, say libro na Puyan (Say Apocalipsis, Douay) so mangibabaga ed sikatayo a say Dios “so mamunas ed amin a lua ed kamataan da. Anggapo la so patey odino pannangis odino pandageyem odino ot-ot, lapud saray daan ya oksuyan na saray bengatla [so] linmabas la.” (Apocalipsis 21:4, New International Version) Imbes a maudiem a pansumpalan na apocalipsis, ipaparungtal na Biblia a say too so makayarin manbilay na ando lan ando ed paraiso diad dalin.​—Salmo 37:9-11, 29.

Paraiso? Andi-anggaan a bilay ed dalin? Isipan pa, ayadyarin mabunigas, maliket a katooan a manlapud amin a rasa so manggayaga ed bilay diad inkatunong! ‘Panon ya onia so pansumpalan na apocalipsis?’ nayarin itepet yo. Inter na Dios so salita. Sikato so nagawa a singa ed kipapasen na impilimog na Dios ed Israel, ya “anggapo so sakey a sipan a sinmaew ed amin daray maong a sipan a ginawa nen Jehova . . . ; amin da so tinmua.”​—Josue 21:45.

Sirin, nipaakar ed eksakton agew tan oras na apocalipsis anggapo so mikabat, noagta say ebidensya so mangipapanengneng a sikatayo la so manbibilay ed panaon na apocalipsis. Sano satan so ombetag, komon ta sikatayo so naromog ya aliing tan “manbabantay.” Lapud “say mundo so napaso tan ontan met ed saray pilalek to, balet say manggawa ed linawa na Dios so mansiansia lawas.”​—Marcos 13:33, 37; 1 Juan 2:17; Mateo 24:36.

[Paimano ed Leksab]