Manasingger so Engranden Milenyo

“Siak so akanengneng na saray trono, tan walaray akayurong ed sikara, tan niiter ed sikara so pakayariy panangukom. On, anengneng koray kamarerwa na saramay pinatey ed wasay lapud impantasi ra ed Jesus tan impansalita ra nipaakar ed Dios, tan saraman so agnandayew ed maatap ya ayep nisay diad talintao to tan saraman so ag-angawat na tanda ed kamulingan da tan ed kalimaan da. Tan sikara so abilay tan nanuley bilang arari a kaiba nen Kristo ed sanlibon taon.” “Tan punasen [na Dios] so amin a lua ed kamataan [na katooan], tan anggapo la so patey, nisay pannangis nisay pandageyem nisay ot-ot. Saray gendat a bengatla so naandi la.”​—Apocalipsis 20:4; 21:4.

SIRIN ipapasakbay na Biblia so manasingger ya engranden milenyo​—say Sanlibon Taon ya Uley nen Jesu-Kristo tan say ulop na mangatatawen ya arari. Anganko ta walay liknaan yon mangipulisay ed sayan propesiya bilang sakey lambengat a bungay-isip, sakey a kugip. Anggaman kuan, wala so malaem a rason diad panmoriam ed sayan Milenyo a singa onsabin petepeteg!

Nisengeg ed sakey a bengatla, say panaral ed Biblia so mangiparungtal ed sikayo ya akisiglaotan ed apalabas lan anemiran milenyo ed awaran na too diad nikadkaduman napanmatalkan a dalan. Niarum ni, say Biblia so sakey a libro na propesiya, tan say baleg a bilang na saray pasakbay to, odino propesiya, so asumpal la ed amin a detalye.a Diad satan a kipapasen, akin a say Biblia so agnapanmatalkan diad pamasakbay ed manasingger a Milenyon uley nen Kristo? Nayarin onkelaw ka, anggaman ontan, no anto so ibabaga ed sikatayo na Biblia nipaakar ed satan a peryodo na panaon. Anton gagala so lingkoran to? Tan ed nikabiig ya interes ed sika, panon ton lanoren so bilay mo?

Abalang a Tawir

Ipapanengneng na Biblia a say Sanlibon Taon ya Uley nen Kristo so dalan to diad pangipasa ed sankablian a tawir ed “ananak” to. Ingen anton tawir? Tan anton “ananak”? Say tawir so nayarin naukeran a bengatlan iyawat ed anak na sakey diad ipatey to. Sanen nansumpal a matunganga ed Dios so inmunan ateng tayon Adan, abalang to ed inkasikato tan ed amin ya ilalak to​—so interon rasa na katooan​—​say kanepegan ed andi-anggaan a bilay diad mangaraldalin a paraiso. Sirin impasa nen Adan so tawir na kasalanan, ipapatey, tan sinagem ed saray ilalak to.​—Genesis 3:1-19; Roma 5:12.

Si Jesus so linma ed dalin ed laman pian ipawil to ed katooan so tawir ya abalang nen Adan. Saya so ginawa to diad panamegley na impansiansia ton matoor ed si Jehova a Dios, a sibubulos ya insaklang to so bilay to a nisesengeg ed katooan. (Juan 3:16) Diad impambilay ton ayadyari, andi-kasalanan a bilay, agamoran nen Jesus so kanepegan ed andi-anggaan ya ayadyarin bilay ed Paraiso diad dalin​—say mismon bengatlan abalang nen Adan. Anggaman kuan, agbalot inagamil nen Jesus itan a kanepegan; nisay satan so abalang to sanen sikatoy inatey tan apaoli ed bilay diad tawen. Sarag to sirin ya usaren itan a sankablian a tawir diad pangipasa ed “ananak” to.​—Roma 5:18, 19.

Saray Mananawir​—“Ananak” nen Kristo

Diad Isaias 9:6 mapropetikon tinawag si Jesus a “Maandon Ama.” Sikato so nagmaliw a Maandon Ama na arondon a mundo na katooan, diad posisyon a mangipasa na tawir ed sarayan arondon, odino tinagibin ananak. (Mateo 20:28; nengnengen met so Salmo 37:18, 29.) Saya so malinlinew a nipanengneng ed sipan to: “Galidia, sikayoran benendito nen Amak, tawiren yo so panarian a niparaan ed sikayo a nanlapud inkiletneg na mundo.” Kuanto ni: “Maliket iray mauyamo, lapud tawiren da so dalin.”​—Mateo 5:5; 25:34.

Pian say dalin so manepeg a tawir, anggaman ontan, saray kipapasen so nepeg a sigpot a nasalatan​—nitarok ed inkayadyari! Nepeg a sikato so magmaliw a sakey a mundon panuleyan na deen tan pantutunosan ed limog na amin a palsa na Dios. (Isaias 11:6-9) Amin a pakasuysuyan na atooan ya ag-inkayadyari so nakaukolan a naandi, pati say patey. (1 Corinto 15:25, 26) Kabaliksan na saya a saray inaatey, a kabiangan na arondon a katooan, so nakaukolan a napaoli. Diad onia lambengat a sikara so nawalaan na pankanawnawan magmaliw a mananawir nen Kristo!​—Juan 5:28, 29.

Sirin, say Sanlibon Taon ya Uley nen Kristo so maliket a panaon a say katooan so mankalkalnan “nabulos a manlapud panangaripen na kabubulok” tan makarateng ed inkayadyari. (Roma 8:21) Makapainteres, anggan saray minumundon lapuan so mamidbir ed saya a bilang gagala na milenyo. Ipaliwawa na Webster’s Ninth New Collegiate Dictionary (1985 ya edisyon) so “milenyo” a bilang “panaon na baleg a liket odino atooan ya inkayadyari.”

Talunggaringan To So Uley nen Solomon

Sayan maglorian Milenyo so nayarin ipareng ed mareen tan maaligwas ya 40-taon ya uley nen Arin Solomon ed kadaanan ya Israel. (1 Arari 4:24, 25, 29) Sanen binisita na reyna na Sheba si Arin Solomon, inkuanto: “Apaneknekan a tua so salita a nadngelan ko ed dilin dalin ko nipaakar ed saray gawam tan nipaakar ed kakabatan mo. Tan siak so ag-anisia ed saray salita anggad siak so sinmabi pian nanengneng a mismo na saray matak; et, nia! Agnibaga so kapaldua ed siak. Tinalunggaringan mo so kakabatan tan aligwas ed saray bengatlan nadngel a tinalineng ko. Mapalar iray lalakim; mapalar irayan ariripen mo a manalalagey a naynay ed arap mo, onderengel ed kakabatan mo!”​—1 Arari 10:6-8.

No say deen, aligwas, tan kakabatan na mangaraldalin ya 40-taon ya uley nen Arin Solomon so manalunggaring, doblian ton masulok, iray baleg ya iilaloan na reyna na Sheba, sirin say Sanlibon Taon ya Uley na babaleg a mangatatawen ya Arin Solomon, so peteg a talonaan to so imahinasyon na too! Diad saray salitan mismo nen Jesus, sikato so “bengatlan babaleg nen si Solomon.” (Mateo 12:42) Salien ya iretrato so mabunigas a tuloy, maaligwas, mareen, matunong, tan maliket iran kipapasen ed dalin a sarag mon naisip, tan agmo nasarag a natebek so anggan melanting ya itatarya na Milenyo nen Kristo.

Kasin Mibansag ed Komatlon Milenyo?

Ipanengneng na saray nagagawa ed mundo nanlapulad 1914 a sikatayo so manbibilay “ed konklusyon na sistema na bengabengatla.” Inkuan ni nen Jesus a say kailalakan a nisiglaot ed sarayan nipasakbay a nagawgawa so “agla napaso anggad kagawa na amin na sarayan bengatla.” Kasin kabaliksan na saya, sirin, a say Milenyon Uley nen Kristo so mibansag ed komatlon milenyo?​—Mateo 24:3-21, 34.

Pinasakbayan nen Jesus iray babangatan to ya agmanpalbeng. Inkuan to: “Agnipabtang ed sikayo so pikabat ed saray panaon odino saray panpanaon ya impasen na Ama ed dili ton pakauley.” (Gawa 1:7) Tan nipaakar ed eksakton “agew tan oras” sano sarayan bengatla so nagawa, imbaga nen Jesus a say Ama to lambengat, si Jehova a Dios, so makaamta. (Mateo 24:36) Sirin, say Biblia so agmanusuporta ed anggan dinan ed saray ondaraak a bilang natan na manangipasingayew-​desyang iran propeta tan pakurang a mangituro ed isabi na pegley-labi na Balon Taon, 1999, bilang anggaan na mundo.

Anggaman ontan, sayan kaplesan a nagagawa ed mundo so malinlinew a mangipanengneng a say panaon na anggaan na sayan ambilunget, marelmeng a sistema na bengabengatla so “onsabi la” tan say Milenyo nen Kristo so “inmasingger la.” (Roma 13:12) Imbes a manpalbeng ed eksakton agew tan oras ed isabi na saya, sikato la so panaon natan a pangala na pikakabat ed saray nakakaukolan na Dios para ed kililiktar. (Juan 17:3) Diad onia et naaralan yo no panon so pagmaliw a kabiangan na saraman so pangibagaan nen Jesus na: “Galidia, sikayoran benendito nen Amak, tawiren yo so panarian ya imparaan ed sikayo nanlapud inkiletneg na mundo.” (Mateo 25:34) Saray Tasi nen Jehova so mabulos tan masarag ya ontulong ed sikayo pian magmaliw a kaiba na saramay mangayaga ed saray bendisyon na onsasabin engranden Milenyo.b

[Saray paimano ed leksab]

[Blurb ed pahina 6]

“Galidia, sikayoran benendito nen Amak, tawiren yo so panarian ya imparaan ed sikayo nanlapud inkiletneg na mundo”