Manbilay na Asimbang, Simplin Bilay
“Mantultuloy a mapeget a manbantay a say panakar yo so aliwan singa agmakabat noagta singa makabat a totoo . . . lapud saray agew so marelmeng.”—EFESO 5:15, 16.
1, 2. Anto so peteg ya angat natan, tan ed anto so nayarin kiparengan na satan?
SAKEY ya angat so pangipireg ed saray uunaen, simbangen iray responsabilidad, tan ideboto so panaon tan biskeg diad saray importantin kipaakaran na bilay ed makatunongan a dalan. Sakey met ya angat so ipaliis ed saray inkalablabas tan pansiansiaen so kaligenan ed mental tan emosyonal.—Efeso 5:17; 1 Timoteo 4:8; 1 Pedro 1:13.
2 Sayan angat so nayarin nipareng ed saman so arapen na sakey a manggetman manakar ed maimpis ya alambre ed tagey. Say kabalang na inkasimbang so mansumpal a desyang ed sikato. Miulibay, say kabalang na espiritual ya inkasimbang so mansumpal a makadesyang ed sikatayo. Say sakey a toon manakar ed atagey ya alambre so peteg ya agto pabelatan so inkasikato ed dakel iran bengatla. Awiten to lambengat iray nakakaukolan. Ta pian napansiansia so espiritual ya inkasimbang tayo, sirin, nakaukolan tayo so manbilay na simpli, ag-apabelatan a bilay.—Hebreos 12:1, 2.
3. Anto so nepeg a gawaen tayo ta pian manbilay na simplin bilay?
3 No sikatayo so mangipakurang na simplin bilay, nepeg ya ilanor tayo so inkasikatayo lambengat ed saray bengatlan nakakaukolan diad pamasiansia na makatunongan a kabibilay. Niduma ed nepeg ya anapen na saray babangatan to—Panarian na Dios tan say inkatunong To—sinalita nen Jesu-Kristo “iray bengatlan magunaet ya aanapen na saray nasyones.” (Mateo 6:32, 33) Kanian sikatayo so sinimbawa nen Jesus ya agmantipon na dakel ed sarayan bengatla. Akin? Lapud nayarin gutguten da so bilay tayo tan ibalang da itayo. (Lucas 12:16-21; 18:25) Saya so maabig a simbawa, anggaman sikatayo so mayaman odino pobre, di-aral odino andi.
No Akin ya Ontanlan Importante Natan
4. Akin a say pambilay na asimbang, simplin bilay so makanakana natan?
4 Say pambilay na asimbang, simplin bilay so nagkalautlan importante natan lapud si Satanas tan saray dedemonyos to so nipisok ed dalin tan manggetman mamabelat ed sikatayo tan isuawi ra so imano tayo a manlapud serbisyo ed Dios. (Apocalipsis 12:7-12, 17) Kanian, lawas lalon aplikado so ganggan na Biblia: “Mantultuloy a mapeget a manbantay a say panakar yo so aliwan singa agmakabat noagta singa makabat a totoo, ya anamoten yo so pankanawnawan panaon, lapud saray agew so marelmeng.” (Efeso 5:15, 16) On, sikatayo so manbibilay ed marelmeng a mundo nen Satanas, aliwan diad balon mundo na Dios. Sirin, agtayo nitepel so magmaliw ya agmananginenen.—2 Corinto 4:4; 2 Pedro 3:7, 13.
5. Panon a saray ariripen na Dios ed kadaanan a panaon so angiletneg ed sikatayo na maabig ya ehemplo?
5 Saray ariripen na Dios a nambilay ed sayan inuleyan-na-mundo na Diablo ed kadaanan a panaon so angiletneg ed sikatayo na maabig ya ehemplo. Sikara “so lapag ya angiyabawag a sikara so sankaili tan temporaryon manaayam ed dalin.” Sirin, inanap da so “magmaong a pasen, salanti, sakey a kayarian na tawen.” (Hebreos 11:13-16) Say katutulok da et diad mangatatawen a Panarian na Dios, anggan singa nepeg ed sikatayo. Nisengeg ed sayan rason, tinawag nen apostol Pedro iray Kristianos a “sankaili tan temporaryon manaayam.” (1 Pedro 2:11; Filipos 3:20) Diad tua, imbaga nen Jesus a saray tuan patumbok to “so aliwan kabiangan na mundo.” Kabaliksan na saya, a singa imbaga nen apostol Pablo, a saray Kristianos so nepeg ya ‘agmangusar ed mundo a nagnap.’—Juan 17:16; 1 Corinto 7:31.
6. (a) Anto so nakaukolan tayon nonoten, tan diad anto so nayarin kiparengan na kipapasen yo? (b) Anton pasakbay ya ehemplo so nepeg ya imanoen tayon amin?
6 Sirin nakaukolan a nonoten tayon naynay a sayan mundon kayarian nen Satanas so mapeligron teritorya a panayaman. Say sakey a lingon kundang so mankabaliksan na desyang. (1 Juan 5:19; 1 Pedro 5:8) Say kipapasen tayo so nayarin nipareng ed saman so sakey a toon manaakar ed pegley na sakey ya uman pinasekan na saray bomba. Isisita to so manamasakbay ya ehemplo ed saray Kristianos, imbaga nen apostol Pablo iray Israelitas ya akaparaan lan onloob ed Insipan a Dalin. Dakel so akabalang na espiritual ya inkasimbang da, lapud inkalanlanor ed imoralidad, tan sikara so inyan na Dios ed patey. “Sirin,” insulat nen Pablo, “komon ta saman so manisip a sikato so akaalagey so manalwar a sikato so [makabalang na espiritual ya inkasimbang to tan] natumba.”—1 Corinto 10:12.
No Akin a Satan So Sakey a Salimbeng
7. Anton dilin-panangusisa so makabat a gawaen tayo?
7 Say pambilay na asimbang, simplin bilay so manalimbeng ed sikayo lapud ipalugar to ed sikayo so malaem a panaon tan biskeg a para ed saray espiritual a bengatla. Sirin makabat a tepetan mo so inkasika: Kasin gagawaen kon simpli so bilay ko, odino gagawaen kon kumplikado? Antoran bengatla so peteg ya ununa ed bilay ko? Ikuan na arum a sikara so walaan na samet a panaon diad panaral ed Biblia odino pibiang ed lawak na ministeryo. Balet anto so rason? Anganko, say insaew dan pangipakurang na asimbang, simplin bilay. Akin ya ag-ipareng so karakel na panaon ya uusaren yo ed panligliwaan, a singa say panagbantay ed telebisyon, diad panaon ya uusaren yo diad panlingkor ed si Jehova ed sakey a nengneng na Kristianon kimey odino sananey? Kasin say panguusar yo ed panaon so asimbang? Say pamasimpli yo ed bilay yo so mangipalugar ed sikayo na panaon a para ed saray lalon importantin bengatla, a mangisasakup diad pibiang ed babaleg a kalaknab ed lawas-importantin espiritual a panagani.—Filipos 1:9, 10; Mateo 9:37.
8. Panon so pangimano na sakey ed bilin nen Jesus a pananap ya ununa ed Panarian, tan anto so mangiyilustra ed kaimportantian na iyabante?
8 Diad tua, say espiritual a kimey yo so sakey a sukat no kasin sikayo so manbibilay na asimbang, simplin bilay. Saray Kristianos a mangiimano ed simbawa nen Jesus a mananap ya ununa ed Panarian na Dios so onaabante ed maabig a kurang diad maparanay a panagaral ed Biblia, iyaatendi ed miting, tan lawak na ministeryo. Say ontan ya iyaabante so peteg a salimbeng a sumpad katumba. Nayarin ipareng diad ikabayo ed sakey a bisikleta. Saraman so manalin manimbang na sakey a bisikleta a tinmantan et nayarin itunda to la so mangapresya ed kaimportantian na iyabante. Miulibay, anggad sikayo so onaabante ed maabig a kurang diad telek na espiritual a kimey, sikayo so nasalimbengan a manlapud kabalang na inkasimbang yo tan katumba.—Filipos 3:16.
9. (a) Anto so sakey a maabig a panonot ed amin tayo? (b) Sano nonoten so sakey a proyekto, antoran tepet so nayarin itepet tayo ed inkasikatayo?
9 Ingen, wala so pankaukolan na pagmaliw a sililiing, diad pannodnonot a say pamalemew ed inkasikatayo ed saray bengatla so mangipalugar na malaem a panaon ed panagaral, diad panagparaan ed miting, tan diad pananulong ed arum. “Kapiganman a siak so natukson manaliw na bengatlan agko nakaukolan, odino mangala ed trabahon agko nakaukolan,” so kuan na sakey a Kristianon negosyante, “itundak so inkasiak diad panonot a mamasiansian simpli. No maminsan et nakaukolan kon pepeen so inkasiak.” Agta satan so maabig a panonot ed sikatayon amin? No iisipen yo so arum a proyekto, anganko et say pangipaalagey na kaaruman ed abung yo odino arum a bengatla, akin ya agyo tepetan so inkasikayo: Kasin saya so ontulong ed espiritualidad ko tan diad pamilyak odino satan so mangamper? Kasin peteg a nakaukolan ko irayan amin a bengatlan magunaet ya aanapen na saray totoo na mundo, odino nagawaan ko a saratan so anggapo?
10. Panon a saray panmoria na sakey a “toon silalaman” so miduma ed saraman so panmoria na sakey a “toon espiritual”?
10 Anggaman kuan, nayarin isuppiat na sakey: ‘Kasin say ontan a dilin-sakripisyo so peteg a nakaukolan? Kasin sikatayo so nakaukolan a mangipakurang na asimbang, simplin bilay?’ Bueno, sinalita nen Pablo “iray bengabengatla ed sakey a too” tan “saray bengabengatla na Dios” tan kuanto: “Say sakey a toon silalaman so agmangawat ed saray bengatla ed espiritu na Dios, lapud sikara so kakulangkulangan ed sikato; tan agto ra naamtaan, lapud sikara so nausisa ed espiritu. Anggaman kuan, say toon espiritual so mangusisa a peteg ed amin a bengatla.” (1 Corinto 2:11, 14, 15) Nayarian yon magmainomay so magmaliw a sakey a “toon silalaman” diad pananap tan pangegemtan ed saray agnakaukolan a bengatla a materyal. Diad ontan a kipapasen, say dilin-sakripisyo so nengneng toy alablabas, ludlureyen ni ingen. Balet ontan so panmoria na sakey a “toon silalaman,” aliwan say panmoria na sakey a “toon espiritual.”
11. Anto komon so nayarin aliwan asimbang a kurang nen Noe, tan panon so pangipakurang tayo na asimbang a bilay natan?
11 Say toon espiritual so sakey a manmoria ed saray bengatla ed panamegley na saray mata na pananisia. Nanengneng to iray bengatlan manlapud punto de bista na Dios. Imanoen si Noe. Kasin sikato so nagmaliw ya asimbang no, kayari na impakaamta to ed gagala na Dios a maneral ed mundo ed panamegley na delap, et inusar to so panaon to diad impamaalagey na babaleg tan magmaong ya ayaman tan impangegemtan ed lalon dakel iran kaykayarian? Siempre andi! Say biong so tuan kaligenan to. Para ed si Noe, say pambilay na asimbang, simplin bilay so anaglawi ed pangideboto na nagnap ya imano diad pangipaalagey na biong tan diad pagmaliw a “managpulong ed inkatunong,” anggaman ed panagludlurey na saray andi-pananisian ‘totoon silalaman.’ (2 Pedro 2:5; Mateo 24:37-39) Miulibay, lapud sikatayo so aliwawaan nipaakar ed inkaasingger la na anggaan na mundo, say mogmon asimbang a dalan na bilay ed sikatayo et say pangiyapasakey na imano tayo diad panaggawa ed linawa na Dios tan diad panangiyabawag na maong a balita, anggaman satan so nayarin manasaglawi ed panmoria na dakel a bilang panagsakripisyo ed natatawag a normal a dalan na bilay.—1 Juan 2:17.
Sikatayo So Binangatan nen Jesus No Panon
12. (a) Anto so imbaga nen Jesus a nepeg tayon tundaan lan gawaen, tan anto so nepeg tayo ingen a gawaen? (b) Akin a sayan pananguman ed gagala so nakaukolan?
12 Diad Sermon to ed Palandey, inter nen Jesus so maabig a simbawa diad panagbilay na asimbang, simplin bilay. Inkuanto: “Tundaan yo la ed inkasikayo so pantipon na saray kayamanan ed dalin, a sikara so upoten na bokbok tan lati, tan looban tan takewen na saray mamatakew.” Inusar nen Jesus so salitan “tundaan” lapud saray totoo so gendagendat a basta mantultuloy a “mantipon” na saray materyal a bengatla ed inkasikara. Balet say toon magmaliw a babangatan nen Jesus so agnayarin manggawa la ed saya. Say bilay to so nepeg a walaan na duman gagala, a singa impanengneng na ontumbok a bilin nen Jesus: “Noag ingen, mantipon kayo na saray kayamanan ed tawen, a ditan et ag-upoten na bokbok nisay lati, tan agnalooban tan takewen na saray matatakew.” Inter to so rason no akin a sayan pananguman a gagala so nakaukolan, ya inkuan nen Jesus: “Tano iner so kawalaan na kayamanan yo, ditan met so kawalaan na puso yo.”—Mateo 6:19-21.
13. No sikayo so mantipon na saray kayamanan ed tawen, anto so nepeg a kakumbinsian yo?
13 Say kayamanan yo so ipasen yon tuan importante. Kasin saray materyal a kayarian so kayamanan yo? Odino kasin say panamasantos ed ngaran nen Jehova a Dios tan say nisipan a tumang to? Diad pangusar yo na bilay yo ed pantipon na kayamanan ed tawen imbes a diad dalin, nayarin sikayo so nagnap a kumbensido ed kapetegan na Panarian. Say balon mundo so nepeg a petepeteg ed sikayo a satan so nanengneng yo ed mata na kanonotan yo tan nanengneng yo so inakasikayon mankikimey a mamaarap ed kasumpalan na saray gagala nen Jehova a para ed dalin. Singa si Moises, nepeg yon ‘nengnengen so Sakey ya agnanengneng’ tan mapekder a kumbensidon ‘tumangan to iraman so magunaet a mananap ed sikato.’—Hebreos 11:6, 27.
14. Antoray pansumpalan no saray puso tayo so niteen ed materyal a bengatla?
14 Balet anto no say puso yo, a mangisasakup ed saray pilalek yo tan kalikaliktan yo, so niteen ed saray materyal a kayamanan? Ibabaga na Biblia: “Say aro ed kuarta so sakey a lamut na amin a nengneng na makapasakit a bengatla, tan diad pangegemtan ed sayan aro et arum so abalang a manlapud pananisia tan tinalos da so inkasikara ed dakerakel ya ot-ot.” Say pangusil ed saray materyal a bengatla a nasaliw na kuarta so agmakapawala na tua tan magnayon a kapenek. (1 Timoteo 6:10; Eclesiates 5:10) Balet say nagkalalon makapasakit ed amin, say aro ed kuarta tan materyal a bengatla so manesyang na relasyon yo ed Dios, a maniilalo ed sikayon sikato so lingkoran ed “nagnap a puso.”—1 Awaran 28:9.
15. (a) Anton ilustrasyon so inter nen Jesus nipaakar ed mata? (b) Diad namparan pisikal tan espiritual a pantalos, panon so pamasiansia na sakey a too ed simplin mata? (c) No say mata tayo so simpli, panon a say espiritual a pakanengneng tayo so singa saman so talora ed saray apostoles nen Jesus?
15 Pian natulongan itayon makapaliis ed patit na materyalismo, angiter si Jesus na duaran ilustrasyon. Ununa, inkuanto: “Say silewan na laman et say mata. No, sirin, say mata yo so simpli, say interon laman yo so masnag; balet no say mata yo so marelmeng, say interon laman yo so ambilunget.” (Mateo 6:22, 23) Diad pisikal a pantalos, say “simplin” mata so sakey ya akaapasakey, a mangipapasabi na malinew iran retrato ed kaisipan. Say aliwan niyapasakey a mata so mangipapasabi na agutgut tan buragas a retrato. Miulibay, say espiritual a mata a “simpli,” odino niyapasakey, so mangipasabi na malinew a retrato ed Panarian na Dios, aliwan buragas, burarog a retrato a manggawa ed balon mundo a singa bengatlan tongtong-basilio odino mito. No say espiritual a mata yo so akaapasakey, say insipan na Dios a balon mundo so petepeteg ed sikayo a singa say Panarian so ontan ed saray taloran apostoles ya apribilehyoan a makanengneng ed itsura to diad mamilagron pasingawey na transpigurasyon nen Jesus.—Mateo 16:28–17:9; Juan 1:14; 2 Pedro 1:16-19.
16. Diad komaduan ilustrasyon, panon so impangipanengneng nen Jesus ed pankaukolan na inkasaksakey ed gagala?
16 Si Jesus so angiter na kumaduan ilustrasyon. “Anggapo so makapagmaliw ya aripen ed duaran katawan,” inkuanto, “ta balanglan gulaen to so sakey tan aroen to so sananey, odino sikato so mansiansia ed sakey tan balawen to so sananey.” Diad impangipaarap to ed punto, indanet to lamet so pankaukolan ed panangipanengneng na inkasaksakey a gagala, a kuanto: “Agyo nayarian so magmaliw ya aripen na Dios tan diad saray Kayamanan.” (Mateo 6:24) Simplin satan so aliwan epektibo. Sirin intuloy nen Jesus: “Nisengeg ed saya et ikuan ko ed sikayo: Tundaan yo so pagmaliw a mapaga nipaakar ed saray kakamarerwa yo ed no anto so kanen yo odino no anto so inumen yo, odino nipaakar ed saray laman yo ed no anto so ikawes yo. . . . Lapud amin na saraya so bengabengatlan magunaet ya aanapen na saray nasyones. Lapud kabat na mangatatawen ya Ama yo a nakaukolan yo irayan amin a bengatla.”—Mateo 6:25-32.
17. (a) Anton punto so gagawaen nen Jesus diad saray instruksion to nipaakar ed saray materyal a bengatla? (b) Anto so idadanet dia nen Jesus, tan anto so lalanoren na pambilay na asimbang, simplin bilay?
17 Aglabay nen Jesus ya ibaga a saray patumbok to so mangipalima la ed kitarya na materyal a nakakaukolan ed tsansa odino sikara so magmaliw a mangiras tan agla mankimey ta pian nitaryaan da so inkasikara tan say pamilya ra. (1 Timoteo 5:8) Andi, noagta say punto et sarayan materyal a bengabengatlan magunaet ya aanapen na saray nasyones so agnepeg a wala ed unaan. Imbes, a singa imbilin nen Jesus: “Itultuloy, sirin, ya anapen ya ununa so panarian tan say inkatunong to, tan amin na sarayan bengatla so niarum ed sikayo.” (Mateo 6:33) Sirin totongtongen dia nen Jesus so nipaakar ed saray kalat ed bilay tan idadanet to so kaapaan na panangusil ed saray materyal a bengatla. Say pambilay na asimbang, simplin bilay so manasaglawi diad pangiyapasakey ed saray mata tayo a saksakey diad saray interes na Panarian, a gawaen so amin nin bengatla a segundaryo.
Ehemplo nen Jesus tan Saray Arum
18. Panon so impangiletneg nen Jesus na manepeg ya ehemplo ed sikatayo?
18 Sanen papasesegen toray Kristianos a “mangekal ed amin a pakabelatan tan say kasalanan [na kakulangan odino kabalang na pananisia] a magmainomay a mangonigon ed sikatayo,” impaseseg nen Pablo: “Ombatik itayo a tekep na panagsungdo ed babatiken a niiyan ed arap tayo, legan a sikatayo so onnengneng a mapetepet ed Manunan Ahente tan Manamayadyari na pananisia tayo, si Jesus.” (Hebreos 12:1, 2) Si Jesus so sigpot a debosyonadon tuloy ed saray intereses na Panarian a say kipapasen to so unong a singa deniskribe to: “Saray kuyangen so walaan na saray balaong tan saray kamanokan na tawen so walaan na ubong balet say Anak na too so andian na pangisaralan to na ulo to.” (Mateo 8:20) Ontan met, si Jesus so aliwan sakey ya asetiko. Ipapanengneng na Kasulatan a nanggayagaan to so maabig a tagano tan kawesen, ingen ta say manunan kalat to ed bilay et say panumpal ed ministeryo to. Sirin si Jesus so nambilay na asimbang, simplin bilay.—Lucas 5:29; Juan 19: 23, 24.
19, 20. (a) Anton ehemplo so inletneg nen Pablo nipaakar ed materyal a bengatla? (b) Anton leksion so nayarin naaralan na dakel natan, tan panon so liknaan da nipaakar ed kurang na bilay da?
19 Si apostol Pablo met so angipasen ed saray uunaen to diad manepeg ya oksuy. Impaliwawa to: “Agko ibilang so kamarerwak ed anggan anton kipaakaran a mabli ed siak, no komon ta nasumpal ko lambengat so kurang ko tan say ministeryon inawat ko ed Katawan a Jesus, a mangitarok na nagnap a pantasi ed maong a balita.” (Gawa 20:24) On, diad panumpal ed lawas-importantin ministeryo, si Pablo so kontento ed walan nakakaukolan balet ta aliketan a manggayaga ed inkadaakan a pamipaminsan. Insulat to: “Diad amin a bengatla tan diad amin a kipapasen et naaralan ko so kasiliban ed no panon so pagmaliw a napesel tan no panon so kaerasan, namparan no panon so nawalaan na daakan tan no panon so panagmak na kakulangan.”—Filipos 4:12.
20 Literal a pigamplon libulibon totoo so akaaral na parehon leksion natan. Dakel ed sikara so sigpot-panaon iran ministros na Tastasi nen Jehova, a pati saray misionero, payunir, managbiahen manangasikaso, tan saraman so manlilingkor ed internasyonal a hedkuarter na organisasyon tan saray sangasangan opisina. Kayari na saray taon na sigpot-panaon a serbisyo, maslak so mangikuan: “No nakaukolan ko nin pawilen lamet, agko gawaen so antokaman a miduma.”
Saray Bendisyon a Napanggayagaan Yo
21, 22. (a) Antoran tumang so panggagayagaan anggan natan sano sikatayo so mangipakurang na asimbang, simplin bilay? (b) Antoran arapen a bendisyon so napanggayagaan yo?
21 Legan a mangipapakurang na asimbang, simplin bilay a manasaglawi na sakripisyo, saray bendisyon tan gayaga so agnaparaan. Sirin nawalaan kayo na malaglaem a panaon diad pangiyabante ed intereses na Panarian tan babaleg a pankanawnawa diad pananap ed saray interesadon totoo tan bangatan ira nipaakar ed gagala na Dios. Kayarian yo so tuan kapenek tan inkakontento, a pati say kareenan na nonot tan say paseguro a napapaliket yo si Jehova a Dios. Satan so sakey a tumang a nayarin panggayagaan yo la anggan natan.—Filipos 4:6, 7.
22 Balet saray arapen a bendisyon so lalon babaleg, a gawaen to so anggan anton kaplesan iran sakripisyo a nayarin gawaen yo ya onkespa ed pangikumpara. Saray bendisyon nen Jehova so mangisasakup ed “bilay ed panaon ya andi-geter.” On, satan so nayarin bendisyon yo—maandon bilay ed liket diad matunong a balon mundo nen Jehova. Manbilay na asimbang, simplin bilay, agbalot aabuloyan iray bengatla na sayan mundo a mamanking ed sikayo. Nonoten a say Dios so mangiter ed sikayo diad saray kerew na puso yo.—Salmo 21:3, 4; 37:4; 133:3.
Saray Tepetepet ed Repaso
◻ Antoran ehemplo tan ilustrasyon so naimano yo a nayarin ontulong ed sikayo a mangipakurang na asimbang, simplin bilay?
◻ Panon a say pambilay na asimbang, simplin bilay so manalimbeng ed sikatayo?
◻ No say espiritual a mata tayo so simpli, anto so kabaliksan na saya ed sikatayo?
◻ Panon so impangibangat nen Jesus ed sikatayo na panangipakurang na simplin bilay?
◻ Antoray bendisyon na pambilay na asimbang, simplin bilay?