Tongtongan Nipaakar ed Saray Topic Diad Biblia​—Anto so Masanton Espiritu?

LABALABAY na saray Tasi nen Jehova so mitongtong nipaakar ed Biblia. Wala ta ray tepet yo nipaakar ed Biblia? Kasin walay labay mon naamtaan ed saray papanisiaan odino paraan na panagdayew na saray Tasi nen Jehova? No wala, itepet yo labat ed saray Tasin nakatongtong yo. Maliket dan ebatan iray tepet yo.

Nabasa yo dia so alimbawa no panon ya itotongtong na saray Tasi nen Jehova iray topic ed Biblia. Imadyin yon walay Tasin say ngaran to et Sam a linma’d abung na lakin say ngaran to et Bert.

Antoy Pakatalos Yo’d “Espiritu Santo”?

Bert: Sikayo ran Tasi nen Jehova et aliwa kunon Kristiano ta agkayo manisia ed espiritu santo.

Sam: Kristiano kami. Diad tua, say pananisiak ed si Jesu-Kristo so rason no akin ya wadia ak ed sikayo natan. Sikato so angiganggan ed saray patumbok to ya manpulong. Balet nitepet ko labat, antoy pakatalos yo’d “espiritu santo” o masanton espiritu?

Bert: ’Amay mikatlon persona ed Trinidad. Walay Dios Ama, Dios Anak, tan wala met so Dios espiritu santo. Satan imay insipan nen Jesus ya mananulong. Importante’d siak ya nalikna itan ed bilay ko.

Sam: Ontan met so amta na dakel a totoo. Balet ta inusisak no antoy ibabaga na Biblia nipaakar ed satan. Labay kon ibaga ed sikayo no antoray naaralan ko, anggan pigaran minuto labat, sarag to?

Bert: Sige, pigaran minuto labat manaya.

Sam: Siak manaya si Sam, sikayo ey?

Bert: Siak si Bert.

Sam: Magano ak labat kuya Bert kanian pigara labat so pantongtongan tayo ed sayan topic. Imbaga yo nen niman a say masanton espiritu so mananulong ya insipan nen Jesus. Tua ’tan. Balet, agta panisiaan yon say masanton espiritu et persona tan mipara itan ed Dios?

Bert: E, ta ’atan so imbangat da’d sikami.

Kasin Persona so Masanton Espiritu?

Sam: Maabig no basaen tayoy sakey ya salaysay ed Biblia a makatulong pian naamtaan tayo no kasin say masanton espiritu et persona odino andi. Ompan abasa yo met la iya. Say kuan to dia ay ed Gawa 2:1-4 et: “Kaleganan na agew na piesta na Pentecostes, nandaragup iran amin diad saksakey a pasen, tan biglan sinmabi so sakey ya ungol manlapud tawen a singa maksil a siplog na dagem, tan manungol ed loob na interon abung ya akayurongan da. Tan akanengneng ira na diladila a singa apoy tan niyutob iraya, tan walay sakey a dinmapo ed kada sakey ed sikara, tan napno ran amin na masanton espiritu tan nansalita ra na nanduruman lenguahe, unong ya inter na espiritu a salitaen da.”

Bert: Ay e, singa abasak la ’tan.

Sam: Kuya Bert, nayari kasin say sakey ya too et napano na sananey nin persona?

Bert: Siempre andi.

Sam: Basaen tayo pa met imay bersikulo 17, diad satan lanlamang a kapitulo. Say kuan na unonan parte na satan et: “‘Diad kaunoran iran agew,’ kuan na Dios, ‘ikalbok so espirituk ed amin a klase na totoo.’” Kuya Bert, nikalbo kasi na Dios so kapara ton Dios?

Bert: Andi.

Sam: Wala met so imbaga nen Juan a Managbautismo nipaakar ed pagmaliw ya napno na masanton espiritu, balet sananey iran salita so inusar to. Nabasa ’tan ed Mateo 3:11. Nayarin pibasa yo?

Bert: “Siak et bautismoan ta kayo ed danum lapud panagbabawi yo, balet samay onsabin katumbokan ko et mas mabiskeg nen siak, ya agak anggan makanepegan a mangekal ed sandalyas to. Sikato so manbautismo ed sikayo ed masanton espiritu tan ed apoy.”

Sam: Salamat. Diad sayan binasa yo, antoy imbaga nen Juan a Managbautismo nipaakar ed masanton espiritu?

Bert: Wala kunoy bautismo ed masanton espiritu.

Sam: Duga kayo. Tan wala met so imbaga ton pampabautismo ed apuy. Et siempre aliwan persona so apuy. Base sirin ed sayan bersikulo, nibaga tayo kasin say masanton espiritu et persona?

Bert: Andi.

Sam: Kanian diad sarayan bersikulon abasa tayo, apaneknekan tayon say masanton espiritu et aliwan persona.

Bert: On ya tua awa.

Akin et Tinawag a “Mananulong”?

Sam: Nen niman balet et imbaga yon say masanton espiritu et “mananulong.” Imbaga itan a mismo nen Jesus diad Juan 14:26. Basaen tayo pa. Say kuan to: “Say mananulong, say masanton espiritu, ya ibaki na Ama diad ngaran ko, so mangibangat ed sikayo na amin a bengatla tan mangipanonot ed sikayo ed amin ya imbagak ed sikayo.” Isipen na arum ya papaneknekan na sayan bersikulo ya persona so masanton espiritu, ta say kuan to dia et satan so ontulong tan manbangat.

Bert: E, talagan ontan so papanisiaan ko.

Sam: Balet, posible kasin mangiyaaliling labat si Jesus? Alimbawa, basaen tayo pay Roma 5:14. Say kuan to dia et: “Say ipapatey et nanuley bilang ari.” Nibaga tayo kasin persona so ipapatey ta say kuan to dia et nanuley itan bilang ari?

Bert: Siempre andi. Inyaliling labat na Biblia so ipapatey ed sakey ya ari.

Sam: Duga kayo. Ontan so impangiyaliling na sayan bersikulo ed ipapatey ta balbaleg so epekto na satan ed sikatayo, a singa to tayo uuleyan. Walaran talagay nabasa’d Biblia ya figure of speech, ya aliwan literal so labay dan ibaga. Say sakey a klase na saya et say personification, odino say paneskribe ed sakey a bengatla a singano persona itan. Singa bilang, no masalimuot, wala ’may ibabaga ran, “Lukasan moy bintana pian onloob so dagem.”

Bert: Ibabagak met ’tan no maminsan.

Sam: Labay kasin ibaga na saya a say dagem et persona, ya singa sakey a bisitan palooben yo’d abung yo?

Bert: Andi, aliwan ontan so labay ton ibaga.

Sam: Kanian sanen imbaga nen Jesus a say masanton espiritu et mananulong odino managbangat, agta figure of speech labat itan?

Bert: E, singa mangiyaaliling labat ya tuay Jesus. Mas mikonektaan itan ed saramay bersikulon binasa ta nen niman a say espiritu et nikalbo tan walaray totoon nabautismoan ed espiritu. Balet no aliwan persona so masanton espiritu, anto ’tan sirin?

Anto so Masanton Espiritu?

Sam: Diad Gawa 1:8 et imbaga nen Jesus no anto itay masanton espiritu. Sarag ton basaen yo?

Bert: “Makaawat kayo na pakayari sano onsabi ed sikayo so masanton espiritu, tan mantasi kayo nipaakar ed siak diad Jerusalem tan ed interon Judea tan Samaria tan diad sankaarawian a pasen na dalin.”

Sam: Unong ed si Jesus, walay pankonektaan na masanton espiritu tan pakayari. Base ed saray bersikulon abasa tayo nen niman, iner so panlalapuan na satan a pakayari?

Bert: Diad Dios Ama.

Sam: Duga. Say masanton espiritu et samay puersa met lanlamang ya inusar na Dios sanen pinalsa toy uniberso. Nabasa tayoy nipaakar ed satan diad Genesis 1:2. Onia so kuan to: “Say espiritu na Dios ginmalaw ed tapew na saray danudanum.” Say espiritu na Dios odino masanton espiritu et say agnanengneng a puersa ya uusaren na Dios pian nasumpal so gagala to tan ipaamtay linawa to. Wala ni sakey a bersikulon labay kon ipabasa’d sikayo. Sarag ton pibasa yo ’ya ay so Lucas 11:13?

Bert: “No sikayo et amta yoy mangiter na maong iran regalo ed saray anak yo anggano mauges kayo, say Ama ed tawen et mas lalon mangiter na masanton espiritu ed saramay onkekerew ed sikato!”

Sam: No kokontrolen na Ama tayo’d tawen so masanton espiritu, ya iiter to itan ed saray onkekerew ed sikato, kasin nibaga tayon pareho labat so masanton espiritu ed Ama?

Bert: Andi. Atalosan ko lay labay mon ibaga.

Sam: Imbagak nen niman kuya Bert ya pigaran minuto ak labat. Antis ak balet ya onalis, walay itepet ko bilang rebyu ed saramay apantongtongan tayo. Unong ed saramay abasa tayon bersikulo, anto lay pakatalos yo’d masanton espiritu ey?

Bert: Puersa manaya itan na Dios.

Sam: Duga. Tan sanen imbaga nen Jesus ed Juan 14:26 a say masanton espiritu et mananulong odino managbangat, mangiyaaliling labat manaya.

Bert: Natan ko labat ’tan naamtaan.

Sam: Diad satan ya imbaga nen Jesus et walay naaralan tayon talagan makapabiskeg na liknaan.

Bert: Anto ’tan ey?

Sam: Sarag tayon kerewen ed Dios so masanton espiritu to ya ontulong ed sikatayo sano nanairapan tayo. Sarag tayo met itan a kerewen pian ontulong ed sikatayon naamtaan so katuaan nipaakar ed sikato.

Bert: Ay balibali sirin no ontan.

Sam: Balet nonot yo pa kuya Bert, no say masanton espiritu et puersa na Dios, di sarag to itan ya usaren pian gawaen so antokaman ya labay to.

Bert: Ay on!

Sam: No anggapo manayay limitasyon na pakayari to, akin kasi et agto itan usaren pian ekaley amin ya kairapan tan kaugsan ed mundo?a

Bert: Talanti, no maminsan, naiisip ko met ’tan.

Sam: Anto kasi no onla ak lamet dia no ontumbok a simba ed onian oras pian pantongtongan tayo itan?

Bert: Sige. Alagaren ta ka.

[Paimano ed leksab]