Kayamanan ya Inmatalek ed Sikatayo
1 Pinablin maong nen apostol Pablo so kimey a panagpulong ya ingganggan na Dios ed sikato tan satan so tinukoy to bilang “kayamanan.” (2 Cor. 4:7, Maung a Balita) Sinusungdoan to iray kairapan tan panamasegsegang pian nagawaan to itan. Nansagpotan ton pinulongan so siopaman a naabet ton nayarin pulongan. Ararawi iray naknakar to tan nanlalayag ni ingen ed dayat anggaman saratan so mairap tan mapeligro. Panon tayon naalig si Pablo diad ontan et nipatnag tayon makanakana ed sikatayo so ministeryo? (Roma 11:13) Akin a sakey ya agnaparaan a kayamanan so ministeryo tayo?
2 Sakey a Superyor a Kayamanan: Mabetbet a say katekep na materyal iran kayamanan et pirmin sakit na linawa tan limitado odino temporaryo labat iray nagunggona. Diad biek a dapag, say ministeryo tayo so mangipagamor ed sikatayo tan ed saray arum na magnayon iran gunggona. (1 Tim. 4:16) Natulongan na satan iray masimoon a totoo a nakabat si Jehova, napasimbalo so kabibilay da, tan nagamoran so peteg ya ilalo ya andi-anggaan a bilay. (Roma 10:13-15) No papablien tayon maong so ministeryo tayo, nawalaan itayo na makapenek a gagala ed bilay, makapaligsan ilalo ed arapen, tan nalikna tayon walay nagagawaan tayo.—1 Cor. 15:58.
3 Ipatnag a Papablien Yo so Kayamanan Yo: Kaslakan lan nipapatnag tayon talagan importante so sakey a bengatla ed sikatayo no mabulbulos itayon mansakripisyo parad satan. Agaylan pribilihyo ya usaren so panaon tan biskeg tayo pian idayew si Jehova! (Efe. 5:16, 17) Kaukolan a napatnagan ed panangusar tayo na panaon a mas importante ed sikatayo iray espiritual a bengatla nen saray materyal a gegemtan. Lapud say inanabang tayo et mabmablin maong, labalabay tayon ipulong itan tekep na ligsa tan alisto itayo a mangibaga ed maong a balita diad amin a pankanawnawa.
4 Saray mabmablin kayamanan so kaslakan lan ag-iyaamot noagta ipaparungtal pian nabista na arum. No ipasen tayo a kayamanan so ministeryo tayo, magmaliw itan a manunaan ed bilay tayo. (Mat. 5:14-16) Tekep na misalsalamat a puso, komon ta lawas tayon aligen si apostol Pablo tan anamoten so amin a pankanawnawa pian nipanengneng tayo a talagan papablien tan ipapasen tayon kayamanan so ministeryo tayo.