Kasin Sikayo so Kualipikadon Manlingkor?

“Say inkasustoy kualipikasyon mi so nanlapud Dios.”​—2 CORINTO 3:5.

1. Say Kristianon kongregasyon so andian na lugar parad totoon anton nengneng?

SI Jehova a Dios tan si Jesu-Kristo so kumikimey. Inkuan nen Jesus: “Si Amak mankikimey ni angga ed natan, tan siak mankimey ak. (Juan 5:17) Ag-abobonan na Dios iray totoo ya onsumgay a mankimey; nisay abobon to et niwala ed saraman so manggunaet ed responsabilidad pian nagamoray pakayari ed saray arum. Anggapoy lugar na saray maliton odino parad saray sinesiblet ya ambisyon ed Kristianon kongregasyon.​—Mateo 20:25-27; 2 Tesalonica 3:10.

2. Akin a wala natan so baleg a pankaukolan parad lalaki a mansakbat na responsabilidad ed kristianon kongregasyon?

² Saray Tasi nen Jehova so walaan na ‘daakan a kimey ed Katawan,’ ilautla natan a dakerakel a katooan so oonla ed “palandey” na tuan panagdayew. (1 Corinto 15:58; Isaias 2:2-4) Wala so baleg a pankaukolan ed lalakin kualipikado ed espiritual a mansakbat na responsabilidad diad kongregasyon. Agdagdagen na sinesiblet ya ambisyon, ya ipaatagey na ontan iran lalaki si Jehova, ya aliwan sikaran dili. Kabat dan tinulongan ira na Dios pian onkualipika ed saray kimey ed kongregasyon, a singa sikatoy ‘nansusto ya onkualipika iray ministro ed balon sipanan.’​—2 Corinto 3:4-6.

3. Manunaan, antoray responsabilidad na saray mamatatken tan ministeryal ya ariripen?

³ Natan, a singa ed limog na inmuna iran Kristiano, saray lalaki so tinuro na masanton espiritu tan ed panamegley na organisasyonal ya areglo nen Jehova a manserbi bilang mamatatken tan ministeryal ya ariripen. (Gawa 20:28; Filipos 1:1; Tito 1:5) Pastolan na mamatatken so pulok na Dios ed espiritual, a mangipaparaan na makasalimbeng a panangasikaso. Sikara so tinulongan na saray ministeryal ya ariripen, a saray kimey da so aliwan diretson lanoren to so panangasikaso ed espiritual. (1 Pedro 5:2; ipareng so Gawa 6:1-6.) Mipara ed Anak na Dios, a linmad dia a manlingkor, pilalek na ontan iran tinuro a manserbi ed kapananisiaan. No sikayo so Kristianon laki, kasin walaan kayo na satan ya espiritu?

Saray Kualipikasyon so Nabenbenan a Pareho

4. Iner nagkalautla so pakaromogan tayo na saray listaan na kualipikasyon parad saraman so apalangkapan na responsabilidad ed kongregasyon?

⁴ Nikabkabiig so saray kakaukolanen para ed saramay angimatalekan na responsabilidad ed kongregasyon ya inletneg nen apostol Pablo diad 1 Timoteo 3:1-10, 12, 13 tan Tito 1:5-9. Legan a konsideraen irayan kualipikasyon, arum ed saya so onaplika ed mamatatken tan ministeryal ya ariripen, ya agtayo ikuenta iratan ed minumundon pananokatan. Imbes, onnengneng tayo ed saratan unong ed inmunan siglon areglo tan unong a makana ed limog na katooan nen Jehova. Say panapet ed saray kakaukolanen agto kaukolan so inkanaspot, lapud no ontan anggapoy toon makakualipika. (1 Juan 1:8) Balet no sikayo so kristianon laki, balangla walaan kayo natan na kimkimey ed kongregasyon odino anggapo, akin ya agyo analisaen so personal iran kualipikasyon yo?

5. Anto so kabaliksan na pagmaliw ya andian na kabalawan?

⁵ Anggapoy kabalawan; walaan na maong a panamintua a manlapud totoo ed paway; bulos a manlapud pangidaleman. (1 Timoteo 3:2, 7, 8, 10; Tito 1:6, 7) Sano aturo tan legan a manlilingkor, saray ministeryal ya ariripen tan mamatatken et nakaukolan ya anggapoy pakabalawan, salanti, bulos ed pakatetelan tan ed antokaman a pankaukulan a nabaat ed matunong a pangidaleman na makapuy a walna odino bangat. Saray palson dalem a ginawa na “palson agagi” odino saray arum agto gawaen so too a nabalaw. Pian naekal so sakey a too manlapud panaglingkor ed kongregasyon, kaukolan a say dalem so aliwan agmakabaliksan, tan kaukolan a napaneknekan a mitunosan ed Makasulatan iran pananokatan. (2 Corinto 11:26; 1 Timoteo 5:19) Say sakey a tinuro ed kongregasyon “kaukolan met a nawalaan na maong a panamintua a manlapud totoo ed paway, pian sikato so agnayarin napelag ed kabalawan tan patit na say Diablo.” No akapanggaway sakey a too na seryoson kasalanan ed imbeneg, nayarin sikatoy naturo lambengat no alingwanan lay kabalawan tan akagaway maong a ngaran para ed inkasikato.

6. Bilang sakey ya asawa na sakey a bii so mankabaliksan na anto?

⁶ Asawa na sakey a bii. (1 Timoteo 3:2, 12; Tito 1:6) Agkabaliksan na saya a saray walay asawa lambengat so nayarin magmaliw a ministeryal ya ariripen tan mamatatken. No walay asawa, aggaman, nakaukolan a nawalaan so sakey a laki na sakey a mabilay ya asawan bii tan nepeg a matoor ed sikato. (Hebreos 13:4) Aliwan singa dakel iran aliwan-Kristianos a lalaki ed inmunan siglo, agto nawalaan na dakel ya asawa.a

7. (a) Kasin say pisikal ya edad so mankualipika ed laki pian magmaliw a matatken? (b) Anto so lanoren na pangasikaso ed kaabungan ed sakey a maabig a paraan?

⁷ Mangipangulo ed sankaabungan to ed sakey a maabig a paraan, tekep na ananak a manpasakup. (1 Timoteo 3:4; 5, 12; Tito 1:6) Liknaen na arum a saray matatken so nepeg a manedad ya ag-onkulang a 30-taon, balet say Biblia ag-angiletneg na edad. Balet, say too so onkiwas bilang sakey a matatken a laki ed espiritual a sentido. Nepeg a walad dugan edad iray ministeryal ya ariripen tan mamatatken a nawalaan na ananak. No walay asawa, say laki so ag-onkualipika no sikatoy onkiwas ed sakey a maridios a dalan ed arum balet sakey a masebeg ed abung. Nayarin agamoran toy respeto ed pangipangulo ed kaabungan to unong ed prinsipyos na Biblia, tan say gagala to so nepeg a walaan na espiritual a talona a kaibay balang membro na pamilya. Unong a kaslakan a tutumboken, say sakey a matatken ya ama so nepeg a walaan na disiplinadon minor ya ananak a “mananisia.” Balanglad sikaray onaaligwas ed panangitalaga ed Dios odino sikara lay abautismoan bilang saray Tasi nen Jehova. Say lakin agmakapangipalagey na pananisia ed saray anak to so agmakayarin makapanggawa ed arum.

8. Sakbay a magmaliw a matatken so ulo na pamilya, anto so nepeg ton aralen a gawaen?

⁸ Sakbay a say sakey a lakin walaay pamilya et magmaliw a matatken a makapangitarok na espiritual a panangasikaso ed sakey a kongregasyon, nepeg ya aralen to no panon a mangiderihe ed dilin kaabungan to. ‘No siopaman a laki et agto kabat no panon a mangipangulo ed dilin kaabungan to, panon ton panpagaaan so kongregasyon na Dios?’ (1 Timoteo 3:5) Tua, say laki nayarin sumlangen na agmananisian asawan bii. (Mateo 10:36; Lucas 12:52) Odino nayarin sakey ed saray ananak to et nankasalanan na sakey a seryoson kasalanan, anggaman onaaligwas iray arum ed espiritual. Siansia, no agawaaan na laki’y amin a nayarin iilaloan, tan nagkalautla no walaan na espiritual a talona dingan na arum ed kaabungan to, say pangipulisay ed maabig a panangidirehi na sakey a membro na pamilya et agto kabaliksan a sikatoy agkualipikadon magmaliw a sakey a ministeryal ya aripen odino sakey a matatken.

9. Anton pangasikaso so nepeg ya agamilen na matatken odino sakey a ministeryal ya aripen nipaakar ed alkohol iran iinumen?

⁹ Aliwan sakey a makolkol odino mainum na alak. (1 Timoteo 3:3, 8; Tito 1:7) Say sakey a ministeryal ya aripen odino sakey a matatken so nepeg ya ag-alablabas ed alkohol iran iinumen. Say inkapuger ed saratan so manresulta ed pakabalang na dangka na saray nonot tan liknaan, a mangitonton ed pikolkol odino pilaban. Nepeg a sikatoy ‘agmainum na alak’ odino walan kabkabat a sakey a maparanay odino buanges. (Uliran 23:20, 21, 29-35) Agaylan makapaermen no sakey a panagpastol ya idadalaw so naamper ed panamegley na inkalablabas a panag-inum! No say sakey a laki so maiinum, agto nepeg a gawaen itan sano mibibiang ed pantitipon, say ministeryo, odino arum a sagradon serbisyo.​—Levitico 10:8-11; Ezekiel 44:21.

10. Akin a say pangaro ed kuarta tan saramay maagum ed agmatuan gungguna et aliwan kualipikadon magmaliw a matatken odino ministeryal ya aripen?

¹⁰ Aliwan maaro ed pilak o maagap ed agmatuan gungguna. (1 Timoteo 3:3, 8; Tito 1:7) Saray maaaro ed pilak so wala ed espiritual a peligro tan “saray maagap a totoo’ so agmakatawir na Panarian na Dios. Sirin, ag-onkualipika iray ontan a lalaki a magmaliw a mamatatken odino ministeryal ya ariripen. (1 Corinto 6:9, 10; 1 Timoteo 6:9, 10) Say lamot a salita ed Griego ya ageteran ya “agmatua” so manunan mankabaliksan a “makapabaing,” tan satan a termino so nipatalos a “gungguna” et misiglaot ed anggan dinan a nengneng na gungguna odino bentaha. (Filipos 1:21; 3:4-8) Siempre, say disposisyon na lakin mangipanengneng a sikatoy manatro ed “karnero” na Dios ya ag-matua so ag-onkualipika ed responsabilidad ed kongregasyon. (Ezekiel 34:7-10; Gawa 20:33-35; Judas 16) Say pankaukulan ed panag-alwar ed panggawa na rekomendasyon so nidanet sano say laki, a bektan aturo, so angimatalkan na pundo tan natukson mantakew na kabiangan na say kuarta.​—Juan 12:4-6.

11. Akin a nepeg a say “balobalonin akumberten laki” et agnairekomenda parad responsabilidad ed kongregasyon?

¹¹ Aliwan balobalonin akumberte; asubok unong ed inkanepeg. (1 Timoteo 3:6, 10) Say balobalonin abautismoan a too so andian na panaon a paneknekan a sikatoy matoor a manasikaso ed nipabtang iran kimey. Nayarin makulang ed abagey parad saray apairapan odino mankaukulan na pikakabat ya ontulong ed kaparan mananisia tan nayarin anggan agmangingalngalep ed saray arum. Sakbay a nayarin irekomenda bilang sakey a ministeryal ya aripen tan nagkalautla bilang sakey a matatken, sirin, say sakey a laki so nepeg ya “asubok unong ed inkanepeg” tan nepeg a mangipanengneng na ebidensya na maabig a panangukom tan inkamatalkan. Anggapoy nigeter a panaon a niiter ed sayan panagsubok, tan saray indibidual so nanduruma ed espiritual ya ibabaleg. Ingen saray mamatatken so nepeg ya aliwan masiglat a mangirekemonda na balobalonin laki “diad takot ompan sikatoy manpatagey ed kinon tan napelag ed panangukom a nipalabas ed Diablo.” Abuloyan komon so lakin mangipatnag ya ununa na mala-Kriston inkamaapabeba.​—Filipos 2:5-8.

Saray Kakaukolanen ed Ministeryal ya Ariripen

12. Kasin saray nilistan kakaukulanen ed saray ministeryal ya aripen so dampoten da lambengat?

¹² Pigara iran kakaukolanen so nilista parad ministeryal ya ariripen. Ingen, no saray ontan a kakaukolanen so agnakapet met na saray mamatatken, ag-ira onkualipika a manlingkor. Bilang Kristianon laki, kasin onkualipika kayo ed sarayan bengatla?

13. Anto so kabaliksan na pagmaliw a seryoso?

¹³ Seryoso. (1 Timoteo 3:8) Say sakey a lakin onkualipika a manlingkor bilang sakey a ministeryal ya aripen et agnepeg a manlemlemew ed responsabilidad. Sikatoy nepeg a mismon onkiwas a masimpit pian nagamoray respeto. Anggaman tunggal paminsan a niabuloy so panelekan, sikatoy ag-onkualipika no maparanay ya onkiwas a makapalpalek.

14. (a) Agmagmaliw a managtalabutob so mankabaliksan na anto? (b) Mankaukolan na anto so malinis a konsiensia?

¹⁴ Aliwan managtalabutob; walaan na malinis a konsiensia. (1 Timoteo 3:8, 9) Saray ministeryal ya aripen (tan saray matatken) so nepeg a matua, aliwan managtalabutob odino labirot. Lapud sikaray agmagmaliw a managtalabutob, nepeg ya aliwa iran mankuwankuwanan a mangibaga ed sakey a bengatla ed sakey a too tan say mismon kasonian ed sananey. (Uliran 3:32; Santiago 3:17) Nepeg met a mabiskeg a managsuporta irayan lalaki ed niparungtal a katuaan, “bebenbenen so sagradon sekreto na pananisia a tekep na malinis a konsiensia.” Diad arap na Dios, say ontan a konsiensia na too so mantasi a sikatoy maptek tan agmanaagamil na anggan dinan a bengatlan mabanday odino makadumsis. (Roma 9:1; 2 Corinto 1:12; 4:2; 7:1) Anggapoy onkualipikan manlingkor ed pulok na Dios likud no onbenben a malet ed katuaan tan maridios iran prinsipyos.

Ipasakey so Imano ed saray Kualipikasyon na Mamatatken

15. Siopa akankualipikasyon so naeksamin natan, tan antoy nagkalautlan lanoren na saraya?

¹⁵ Pigaran kualipikasyon so onaplika nagkalautla ed saray mamatatken tan lalo la ed kimey da bilang papastol tan saray managbangat. Bilang sakey a Kristianon laki, kasin kakapeten yorayan kakaukulanen?

16. (a) Anto so kakaukulanen na madanka ed kaugalian? (b) Panon a nayarin napansiansia na matatken so benben-na-linawa?

¹⁶ Maadia ed ugugali; madanka. (1 Timoteo 3:2; Tito 1:8) Say sakey a matatken so nepeg a mapalna, ya aliwan aripen na mauges iran ug-ugali. Sano arapen toray subok, sikatoy tulongan na Dios a mansiansian asimbang no sikatoy manpikasi a singa ginawa na salmista: “Apadaak iray gonigon na pusok; O ipaway moak a manlapud katakotan ko.” (Salmo 25:17) Nepeg met a manpikasiy manangasikaso na espiritu na Dios tan ipanengneng so bunga to, a pati dangka. (Lucas 11:13; Galacia 5:22, 23) Pansiansiaen iray kanonotan, salita, tan kiwakiwas ya asimbang et masarag ed sakey a matatken ya onarawi ed inkalablabas legan ya iparaan toy espiritual a giya parad kongregasyon.

17. Anto so lanoren na pagmaliw a malinis ed kanonotna?

¹⁷ Asimbang ed kanonotan. (1 Timoteo 3:2) Say sakey a matatken so nepeg a makatunungan, makabat, tan maalwar. Sikatoy nepeg a walaay gagala tan makatunungan ed salita tan saray kiwas. Say mapaabeba, balansen panagnonot so nibase ed maridios a pikakabat tan ed mabunigas iran bangabangat na Salita nen Jehova, a sikatoy nepeg a magmaliw a magunaet ya estudyante.​—Roma 12:3; Tito 2:1.

18. Say pagmaliw a mauksoy so mankaukulan na anto ed sakey a matatken?

¹⁸ Mauksoy. (1 Timoteo 3:2) Say Griegon salita a nausar dia so nipatalos a “maabig ya inkaalasir” ed 1 Timoteo 2:9. Sirin nepeg a say matatken so desente, maabig ya inkaalasir na padron na panagbilay. Singa bilang, nepeg a sikatoy adelantado. Mapatnag a say inmunan siglon Kristianos so agnanggawa na baleg a punto nipaakar ed panangiatol na rekord, tan say sakey a manangasikaso natan so agkaukolan ya eksperton accountant odino sekretaryo. Saray ministeryal ya aripen so nayarin manangasikaso ed saray bengatlan kakaukolanen ed sarayan pamaakaran. Ingen say Griegon termino parad “mauksoy” so mangipanengeng na maabig a kondukta, tan peteg ya ag-onkualipikay sakey a laki a magmaliw a matatken no sikatoy magulo tan agmauksoy.​—1 Tesalonica 5:14; 2 Tesalonica 3:6-12; Tito 1:10.

19. Lapud sikatoy maparawes, anto so gawaen na matatken?

¹⁹ Maparawes. (1 Timoteo 3:2; Tito 1:8) Say sakey a matatken ‘ontombok ed kurso na inkamaparawes.’ (Roma 12:13; Hebreos 13:2) Say Griegon salitan “maparawes’ so diad literal kabaliksan toy “maliket ed saray sankaili.” Sirin, say maparawes a matatken abrasaen toray balo ni ed Kristianon pantitipon, mangipapanengneng na parehon interes ed saray duruka unong a gagawaen to ed saray mayaman ed materyal. Sikato so maparawes ed saray managbaroy ed intereses na Inkakristiano tan mangibaki ed sikara ed dalan da “ed maabig a nengneng ed Dios.” (3 Juan 5-8) Peteg, say sakey a matatken mangipanegneng na inkamaparawes nagkalautla ed kaparan mananisia unong ed saray nakakaukolan da tan unong ya iyabuloy na saray sirkumstansya to.​—Santiago 2:14-17.

20. Diad antoran dalan a nepeg a say matatken so onkualipikan manbangat?

²⁰ Kualipikadon manbangat. (1 Timoteo 3:2) Say abilidad na sakey a matatken bilang espiritual a managbangat so agmanresulta ed abilidad ed kanonotan odino minimundon pikakabat. (1 Corinto 2:1-5, 13) Asabi itan lapud sikatoy “mamemben a malet ed matoor a salita nipaakar ed dunong [odino modo] na panagbangat to, pian nayarian to so mangibilin ed panamegley na mabunigas a bangat tan napasisia to met iray sumusumpa.” (Tito 1:8; ipareng so Gawa 20:18-21; 26, 27.) Nepeg a sikatoy ‘manbangat a tekep na inkaumildi ed saramay onsumpa.’ (2 Timoteo 2:23-26) Anggan say sakey a matatken so aliwan sankaabigan a managpaliwawa ed kongregasyon, nepeg a sikatoy maabig ya estudyante na Salita na Dios a sikatoy magenap ya onsiano a mangibangat tan mansimbawa ed saray mananisia, a manaaral met na Biblia. (2 Corinto 11:6) Nepeg ya onkualipika a mangipanabang ed “maabig iran bangat” a makatulong ed saray pamilya tan indibidual a mangituloy na maridios a panagbilay.​—Tito 2:1-10.

21. (a) Akin a nibagan say ontan a sakey matatken so aliwan sakey a masepak? (b) Anto so kabaliksan na sakey a makatunungan? (c) Aliwan makolkol so mankabaliksan na anto?

²¹ Aliwan masepak, noag ingen makatunongan, aliwan makolkol. (1 Timoteo 3:3; Tito 1:7.) Bilang mareen, say sakey a matatken so agmangabil ed arum ed pisikal odino tattakoten ira diad panamegley na panggawa na abuso odino makasakit a salita. (Ipareng so 2 Corinto 11:20.) (Say ontombok a komento a sikato so “aliwan sakey a buanges a milalaban” mangipanengneng ya onarawi ed abuso ed alkohol a maparanay a mangitonton ed panapagapag.) Bilang “makatunungan“ (odino “mangiyabuloy”), aliwan utoritaryan tan mairap a paliketen, ya agto mangusar na saray pantongtongan ed melag iran bengatla. (1 Corinto 9:12; Filipos 4:5; 1 Pedro 2:18) Lapud say matatken so aliwan makolkol, odino mapasang, sikatoy onarawi ed pibabalingaan tan “agmisasanok.”​—Tito 3:2; Santiago 1:19, 20.

22. Anto so idanet na katuaan a say sakey a matatken so agnepeg ya atagey a linawa?

²² Aliwan atagey a linawa. (Tito 1:7) Diad literal, kabaliksan toy “aliwan dilin-panagpaliket.” (Ipareng so 2 Pedro 2:10.) Say matatken so nepeg ya aliwan dogmatiko noagta mangala ma mapaabeban panmoria ed saray abilidad to. Agmannonot a nayarian ton benbenen iray maabig a bengatla nen saray arum, mapaabeba ton ipanabang iray responsabilidad to ed saray arum tan pablien toray dakel a managsimbawa.​—Numeros 11:26-29; Uliran 11:14; Roma 12:3, 16.

23. (a) Panon yon isalaysay so “maaro ed kaabigan”? (b) Say pagmaliw a matunong so mankabaliksan na anto?

²³ Maaro ed kaabigan; matunong. (Tito 1:8) Pian onkualipika bilang matatken, nepeg na laki ya aroen so kaabigan tan magmaliw a matunong. Say maaro ed kaabigan inaro to no anto so maabig ed arap nen Jehova, manggawa na mapangasi tan makatulong iran gawa, tan mangipanengneng na panamabli ed kaabigan ed saray arum. (Lucas 6:35; ipareng so Gawa 9:36, 39; 1 Timoteo 5:9, 10.) Bilang sakey a matunong kabaliksan toy itombok ed saray ganggan na Dios tan estandarte. Arum nin bengatla, say ontan a laki so agmanablabi tan mansiansian matunong, malinis, tan ed maabig iran bengatla ed nonot. (Lucas 1:6; Filipos 4:8, 9, Santiago 2:1-9) Lapud say kaabigan so midumaan manlapud inkatunong lapud palambasen to no anto so kaukulanen na hustisya, say sakey a manangaro na kaabigan so manggawa na nagkalalo ed saray arum a mas ni no anto so kakaukolanen ed sikato.​—Mateo 20:4, 13-15; Roma 5:7.

24. Say pagmaliw a matoor so ontawag na anto?

²⁴ Matoor. (Tito 1:8) Say sakey a kualipikadon magmaliw a matatken a mansiansian agnatinag a debosyon ed Dios tan ed ontombok ed dibinon ganggan, anggan no panon a nasaliy integridad to. Gawaen to no anto so ilaloan nen Jehova ed sikato, tan saya so mangilaktip ed panaglingkor bilang sakey a matoor a mangiyabawag na Panarian.​—Mateo 24:14; Lucas 1:74, 75; Gawa 5:29; 1 Tesalonica 2:10.

Dampoten Iray Kualipikasyon

25. Saray kualipikasyon ya asingbat lambengat so nakaukolan parad siopa, tan panon a nadampot so ontan iran kualipikasyon?

²⁵ Kaslakan na saray kualipikasyon ya asingbat lambengat lanoren toray bengatlan kakaukolanen ed balang Tasi nen Jehova tan nayarin nadampot ed panamegley na saray bendisyon na Dios ed balang panagaral na sakey, gunaet, maabig a piulop, tan pikakasi. Saray indibidual so nayarin mas mabiskeg ed arum iran kualipikasyon nen saray arum. Ingen diad makatunungan a laknab, saray ministeryal ya ariripen tan arum iran matatken so nepeg a dampoten ya amin iray kakaukolanen parad nikabiig a pribilehyo.

26. Akin iray Kristianon lalaki et gawaen day inkasikaran akaparaan parad kimkimey ed kongregasyon?

²⁶ Amin na saray Tasi nen Jehova so nepeg a malabay a gawaen ya amin a bengatlan posibli ed panaglingkor ed Dios. Sayan espiritu so mamakiwas ed Kristianon lalaki ya akaparaan ed kimey ed kongregasyon. Kasin sikayo so dedikado, abautismoan a laki? No ontan, dampoten yo tan manggaway gunaet pian onkualipika!

[Paimano ed leksab]

Panon so Pangebat Yo?

◻ Akin a wala so baleg a pankaukolan na abautismoan iran lalaki a mangawat na responsabilidad ed kongregasyon?

◻ Antoray pigaran kualipikasyon a nepeg a dampoten na saray ministeryal ya ariripen?

◻ Anto iray arum a pankaukolan a nepeg a kapeten na saray mamasiken?

◻ Akin a nepeg a kabaten na sakey so pangasikaso ed kaabungan to?

◻ Anto so mamakiwas ed Kristianon lalaki ya akaparaan ed saray kimey ed kongregasyon?

[Litrato ed pahina 20, 21]

Mamatatken tan ministeryal ya ariripen so nepeg a mangasikaso ed kaabungan da unong ed prisipyos na Biblia