Tepetepet Manlapud Saray Managbasa

Walaray Tastasi nen Jehova ya inopresiay trabahon lalanoren toy relihyoson bilding odino kayarian. Anto so Makasulatan a panmoria nipaakar ed ontan a kimey?

Sayan problema so nayarin kidungetan na saray Kristianon masimoon a mangiyaplika ed 1 Timoteo 5:8, ya idadanet toy kaimportantian na panlegpet na sakey ed sankaabungan to. Anggaman talagan kaukolan a tumboken na Kristianos itan a konseho, agto ikakatunongan so pangawat da na antokaman tan amin lan klase na trabaho ed mundo, ya anggan anto la ditay lalanoren na trabaho. Bidbiren na saray Kristiano a kaukolay pagmaliw a makatebek ed arum niran kakaukolaney linawa na Dios. Alimbawa, say pilalek na toon suportaay pamilya to so agmangikatunongan ed panumlang to’d ibabaga na Biblia nipaakar ed imoralidad odino panagpatey. (Ikompara so Genesis 39:4-9; Isaias 2:4; Juan 17:14, 16.) Importanti met ya onkiwas iray Kristiano a mitunosan ed ganggan ya ompaway ed Babilonia a Baleg, say empiryo na palson relihyon.​—Apocalipsis 18:4, 5.

Diad sankagloboan et nipapaarap iray lingkor na Dios ed nambabangil a kipapasen na trabaho. Anggapoy kana tan agtayo nayarian a salien ya ilistan amin iray posiblin onlesan situasyon tan manggawa na saray absoluton totontonen. (2 Corinto 1:24) Balet, salambiten tayo paray pigaran pamaakaran a kaukolan a konsideraen na saray Kristiano sano mandesisyon ira nipaakar ed empleyo. Sarayan pamaakaran so nidatak lan antikey diad The Watchtower na Hulyo 15, 1982, diad artikulon nipaakar ed pakagungguna tayo’d inter-Dios a konsiensia tayo. Walay apalesan duaran importantin tepet ed kahon insan nilista ditan so arum niran makatulong a pamaakaran.

Say unonan importantin tepet et saya: Kasin say trabaho a mismo so kinondena ed Biblia? Nipaakar ed satan et inkuan na The Watchtower a kokondenaen na Biblia so panagtakew, agsuston panangusar na dala, tan say panagtalintao. Kaukolan ya agmantrabaho so sakey a Kristiano ed direktan mangiyaalibansa na aktibidades ya ag-abobonay Dios, a singa saramay kapkapansalambit.

Say komaduan tepet et: Kasin say pantrabaho ed onia et pagmaliwen toy sakey a minonong ed sakey a nakokondenan agamil? Malinew, say toon empleyado ed panagpasugalan, klinikay aborsyon, odino abung na prostitusyon et sakey lan minononong ed agmakasulatan ya agamil. Anggano say trabaho to diman ya inagew-agew et managpanis labat na saray datal odino manag-ebat na telepono, sikato lay manggagawa na agamil a kokondenaey Salitay Dios.

Nalmoan na dakel a Kristianon nipaarap la’d panagdesisyon nipaakar ed empleyo a makatulong so panganalisa ed saratan a tepet ta pian makapandesisyon ira.

Singa bilang, manlapud saratan a duaran tepet, natalosan na sakey no akin a say tuan managdayew et agmagmaliw a direktan empleyado na sakey a palson relihyoson organisasyon, a mantratrabaho parad sakey a simbaan tan diad loob a mismo na simbaan. Idadatak na Apocalipsis 18:4 so ganggan: “Ompaway kayo ed sikato, baley ko, pian agkayo nalanor ed saray kasalanan to.” Napilanor so sakey a too ed saray gawa tan kasalanan na Babilonia a Baleg no sikatoy regular ya empleyado na sakey a relihyon a mangibabangat na palson relihyon. Balanglan say empleyado et sakey ya hardinero, dyanitor, manag-apiger, odino accountant, say trabaho to so onkana’d kiyalibansa na panagdayew a sumlang ed tuan relihyon. Niarum ni, moriaen na totoon makaimano ed sayan empleyadon mamaparakep ed simbaan, manmamantini, odino manusumpal ed saray relihyoson gegemtan to a sikatoy nisisiglaot ed satan a relihyon.

Komusta balet imay aliwan regular ya empleyado na sakey a simbaan odino relihyoson organisasyon? Anganko ta sikatoy atawag lapud kakkaukolan a pangapiger ed aderal iran tubo ed silongan na simbaan. Agta midumaan itan ed pangitasa to na sakey a kontrata, a singa say pangipeket odino pamaklas ed atep na simbaan?

Lamet, dakel so nanduruman situasyon a nayarin naisip tayo. Kanian repasoen tayo paray kaaruman a limaran pamaakaran ya indatak la na The Watchtower:

1. Kasin say trabaho et nipaakar ed serbisyo na too a satan a mismo so agsuppiaten na Kasulatan? Alaen pan alimbawa so kartero. Say panangitulor to na koreo et agmankabaliksan a sikatoy mangiyaalibansa na nakokondenan agamil no sakey ed bilding ya angituloran to ed satan a lugar et sakey a simbaan odino klinikay aborsyon. Itatarok na Dios so liwaway agew ya onsisinag ed saray bintanay amin a bilding, pati ed simbaan odino ed ontan a klinika. (Gawa 14:16, 17) Nayarin ikuan na sakey a Kristianon kartero a say gagawaen to et agew-agew a serbisyon parad amin. Mipadpara itan ed sakey a Kristianon onkiwas ed sakey ya emerhensia​—sakey a tuberon atawag a mamatunda ed kadelap na sakey a simbaan odino sakey ya attendant na ambulansia so atawag a manambal ed toon nalmay legan na pimimisa. Nayarin konsideraen to labat iya a nibanan pananulong ed too.

2. Diad anton laknab so pakauley na too ed agawaan la? Say Kristianon akanpuesto so agbalot onabuloy ed pan-order tan panlako na saray talintao, espiritistikon galing, sigarilyo, odino saray longanisan nandala. Bilang akankayarian, walay panangontrol to. Nayarin sikatoy sagyaten na arum a manlako na saray sigarilyo odino talintao ta pian makalmo, balet ta sikatoy onkiwas unong ed saray sisiaen to ed Kasulatan. Diad biek a dapag, say Kristianon empleyado ed baleg a panagsaliwan na tagano so nayarin niasain bilang kahera, managlinis na saray datal, odino bokkiper. Anggapo’d kontrol to no antoray orderen tan ilakon produkto, anggano pigara ed saraya so kuestionable, a singa saray sigarilyo odino produkton parad relihyoson piestay opisyal.a (Ikompara so Lucas 7:8; 17:7, 8.) Mitukoyan iya ed ontumbok a punto.

3. Diad anton laknab so kalalanoran na sakey a too? Pawilen tayo pa so alimbawan nipaakar ed sakey a puesto. Anganko ta niasain so sakey ya empleyado a mankahera odino tunggal paminsan a mangiyan na saray sigarilyo odino relihyoso iran produkto ed iskaparate; melag labat itan a kabiangan na intiramintin trabaho to. Balet, baleg so pidumaan to no say trabaho na empleyado ed parehon puesto et diad mismon seksion na saray tabako! Say intiramintin kimey to ed kada agew et nisentro’d bengatlan kontra ed saray sisiaen na sakey a Kristiano. (2 Corinto 7:1) Iyiilustra na saya no akin a say laknab na impibali odino impibiang so nepeg ya analisaen diad pandesidi ed saray probleman nipaakar ed trabaho.

4. Antoy lapuan na sueldo odino say lugar na kagawaay trabaho? Konsideraen pay duaran situasyon. Pian naparakep so reputasyon to ed publiko, denesidi na klinikay aborsyon a manueldoy manlinis ed saray lansangan ed komunidad. Sikatoy suesueldoan na klinikay aborsyon, balet ta agmantratrabaho diman, tan anggapoy makakanengneng ed sikato a sanagew a wadman ed saman a klinika. Imbes, say naiimano ra et say pankikimey to parad publiko, a satan a mismo et agsumlang ed Kasulatan, anggano siopa la’d tay manusueldo ed sikato. Balet nia la so pidumaan. Diad bansan legal so prostitusyon, say panpublikon serbisyo ed bunigas et mansueldo ed sakey a nars a mantrabaho ed saray abung na balangkantis, ya ipapakurang iray pan-eksamin na bunigas diad gagalan naamper so kilaknab na saray makaalis a sakit lapud sekso. Anggaman sikatoy suesueldoan na panpublikon serbisyo ed bunigas, sigpot a say trabaho to et diad kaabungan na prostitusyon, a pagmamaliwen ton agpakarisgoan so imoralidad, mas naaksobi. Sarayan alimbawa so mangiyiilustra no akin a say lapuan na sueldo tan say pantratrabahoan et aspekton kaukolan a konsideraen.

5. Antoy epekto na pantrabaho; kasin gonigonen toy konsiensia na sakey odino pakatiroran na arum? Kaukolan a konsideraen so konsiensia, nampara ed konsiensia tayo tan ed konsiensia na arum. Anggano say sakey a kimey (pati say lugar tan lapuay sueldo) so ompatnag ya aawaten na maslak a Kristianos, nayarin nalikas na sakey a nagonigoy konsiensia to. Si apostol Pablo, ya angipanengneng na maabig ya alimbawa, so nankuan: “Ilaloan mi a wala so maabig a konsiensia mi, a panpirawatan mi so manbilay a sigagalang dia ed saray amin a bengatla.” (Hebreos 13:18) Nepeg a paliisan tayo so trabahon pakagonigonan tayo; ingen, kaukolan ya agtayo met balawen iramay midumay konsiensia ra. Diad pisunian, nayarin parad say sakey a Kristiano et mitunosan ed Biblia so trabaho to, balet ta namoria ton pakagonigonan itan na dakel diad loob na kongregasyon tan ed komunidad. Impatnag nen Pablo so suston awawey ed saray salita to: “Agkami mangiter na bengatlan kagapolan pian say panangasikaso mi agnabalaw; et dia ed balang bengatla imatalek mi inkasikamin dili, a singa ministros na Dios.”​—2 Corinto 6:3, 4.

Pawilen tayo pay manunan tepet a pantrabaho ed sakey a bilding na sakey a relihyon, a singa say pangipeket na saray balon bintana, panlinis ed saray alpombra, odino pangapiger ed heater. Panon a nisiglaot iray pamaakaran a walad tagey?

Nonoten pay aspeton nipaakar ed pakauley. Kasin say Kristiano so akankayarian odino manedyer a sarag ton desidien no kasin awaten to odino andi itan a kimey parad sakey a simbaan? Kasin say Kristianon walaan na pakauley et labay toy minonong ed Babilonia a Baleg diad pantasa parad sakey a trabaho odino pikontrata pian natulongay sakey a relihyon a mangiyalibansay palson panagdayew? Agta mipadpara itan ed pandesidi pangilako na saray sigarilyo odino talintao ed mismon lakoan na sakey?​—2 Corinto 6:14-16.

No say sakey a Kristiano et empleyado ya agmakapandesidi ed no antoran trabaho so naabobonan, nepeg a konsideraen iray arum a pamaakaran, singa say pantratrabahoan tan laknab a pakapilanoran. Kasin akerew labat ed empleyado a mangitulor odino mangilira ed saray yurongan ed sakey ya okasyon odino lapu labat ed serbisyo to’d too, a singa say panebseb na bumbero ed pool ed sakey a simbaan sakbay ya onkamayat itan? Midumaan so panmoria na dakel ed saya ed samay empleyado na sakey a negosyon mangusar na baleg a panaon ed panpinta na simbaan odino regular a hardinero pian pagmaliwen itan a marakep. Say ontan a regular odino mabayag a pilimog so mamaloor ed posibilidad ya isiglaot na dakel so sakey a Kristiano ed sakey a relihyon ya ibabaga ton agto idadalangirang, a maseguron pakatiroran da.​—Mateo 13:41; 18:6, 7.

Pinabitar miray pigaran importantin kokonsideraen no nipaakar ed trabaho. Saraya so nipresenta unong ed konteksto na espisipikon tepet a mangilalanor ed palson relihyon. Ingen, nikonsidera met iratan no nipaakar ed arum niran nengneng na trabaho. Diad balang kaso, say masimoon a pananganalisa so kaukolan a gawaen, ya ikonsidera so espisipiko​—tan anganko et nikaduma​—iran aspekto na walan situasyon. Saray pamaakaran a niparungtal so akatulong la ed dakel a masimoon a Kristiano ed panggawa ra na saray masimoon a desisyon a pakapatnagay pilalek dan manakar a madantal tan maptek ed imaton nen Jehova.​—Uliran 3:5, 6; Isaias 2:3; Hebreos 12:12-14.

[Paimano ed leksab]