‘Saray Gawa To so Ontutumbok ed Sikato’

DIAD 8:50 na kabuasay Huebes, Hulyo 28, 1994, anampot la so mangaraldalin a kurang nen George D. Gangas. Sikato so mantaon na 98. Bilang sakey ya alanaan, si George Gangas so membro na say Mananguley ya Ulop na Tastasi nen Jehova nanlapulad Oktubre 15, 1971.

Amin a personal a makapikabat ed kinen Brother Gangas so makaamta ed aro to ed inkatunong tan gula to ed inkarelmeng. Natandaan dan tuloy so paulit-ulit ya impaneskribe to ed si Satanas bilang sakey ya alablabas, makapataktakot, marelmeng, mabanday, tan makapadimlan matila. Diad pidumaan, sinalita to si Jehova bilang sakey a maaro, mapangasi, maabagey, matamoy, tan maasikason Ama. Nanonotan met na dakel a labalabay to so mantepet na tepetepet ed Biblia. Diad dinanman a tongtongan, sikato so ag-onsasaew a mamalesa na tepetepet​—arum ed saratan et simpli, arum et mas mairap. Peteg, ya inad-aro to so katuaan ed Biblia.

Si Brother Gangas so abautismoan nen Hulyo 15, 1921. Ginapoan to so sigpot-panaon a karera to ed panagpulong a ministeryo (panagpayunir) nen Marso 1928. Kanian, sikato so wala la’d sigpot-panaon a serbisyo ed dagup na 66 a taon. Sikatoy nagmaliw a membro na komikimey ed Brooklyn hedkuarter na Watch Tower Bible and Tract Society nen Oktubre 31, 1928.

Say istorya na bilay to so niimprinta ed Oktubre 15, 1966, a paway na The Watchtower. Dedeskribien to so sakey a tuan maespiritual a too na Dios. Diad saman ya artikulo, masimoon ton imbalikas so onggendan: “Inarok so bilay tan labay kon nagamoran na agagik so bilay. Ibilang kon, kaiba si apostol Pablo, ya amin ya arum niran bengatla so ‘onlereg nipaakar ed ontan la a karlangan na pikakabat ed Cristo Jesus.’​—Filipos 3:8.

Impanengneng nen Brother Gangas ed kakikiwas to a talagan sikatoy ontan, ya inaro to so bilay, tan magunaet ya angipanabang na “pikakabat [to] ed Cristo Jesus” ed arum. Sikato so nailiw tayo, balet agaylan sikatayo so magayaga natan ta naawat to la so mangatatawen a tumang to! Natan, ‘sikato so manpainawa ed sagpot to, ta saray gawa to so ontutumbok ed sikato.’​—Apocalipsis 14:13, New International Version.

[Saray litrato ed pahina 31]