Atendian so “Maridios a Takot” a Distriton Kumbension!

Kasin akapanplano kan onatendi ed 1994 a “Maridios a Takot” a Distriton Kumbension na Tastasi nen Jehova? Maseguro, nagunggunaan ka diad pagmaliw a presenti ed amin a taloran agew! Diad 42 iran kumbension a nisyeskedyul diad Pilipinas lambengat, maseguron walay kumbension ya asingger ed panayaman mo.

Walaray nengneng na takot a mamaletey ed pakpel tan maneral na ilalo; anggaman ontan, say keynote address ed kabuasay Biernes so manguker ed maridios a takot tan maneskribe ed dakel iran gungguna to. On, say interon programa na kumbension so mangipabitar ed sarayan gungguna.

Diad ngarem na Biernes, narengel yo no panon a say maridios a takot so mamabiskeg ed panamaley tan bilay na pamilya, ontan met ed no panon a makatulong itan ed saray kalangweran a mansiansian mabiskeg ed katooran da ed Dios. Say sesyon ed ngarem so sampotan na makapabiskeg ed puson presentasyon a “Ligliwa ed Saray Inateyan.” Naapresyam so praktikal ya impormasyon a nitarok legan na satan a paliwawa a tulongan iramay naandian na inad-aro.

Ipanengneng na programa ed Sabado no panon a say maridios a takot so mamabiskeg ed pananumbok ed panangiwanwan nen Jehova no nipaakar ed kongregasyon tan ministeryo tayo. Diad paliwawan “Basaen so Salitay Dios, say Masanton Biblia, ya Inagew-agew,” saray delegado so makaawat na praktikal iran simbawa parad panagbasa tan panagaral na Biblia. Nasampotan so programa ed ngarem na Sabado na makasagyat-interes a teman “Say Makapataktakot ya Agew nen Jehova so Asingger La.”

Sakey a pabitar ed programa ed Simba et say paliwawan “Wala so Kioli na saray Matunong.” Diad onggendan iran diskurso, “Niliktar a Mabilay Diad say Baleg a Kairapan,” sakey a salaysay so nitarok ed makapakelaw a sipan nen Jesus nipaakar ed saramay agbalot ompatey.​—Juan 11:26.

Say sesyon ed kabuasan na Simba so sampotan na makatenyeg-kanonotan ya 40-minuton drama ya apauloan na Saray Panagpilin Kidudungetan Yo. Saray dumerengel so napanonotan nipaakar ed agew nen Josue tan nanengneng da so kipanengneng ed mapekder a determinasyon ton manlingkor ed si Jehova. Say subok nipaakar ed apuy ed agew nen Elias so niparungtal met, tan saray leksion so nipanengneng ed sarayan namparan ebento ya ontulong ed saray delegadon mangidemostra na maridios a takot natan. Diad ngarem, say mapublikon paliwawa a “No Akin a Takotan so Dios Natan,” so pabitar na kumbension.

Manplano la natan ya onatendi. Pian naromog so pasen a sankaasinggeran ed ayaman mo, anapey lokal a Kingdom Hall na Tastasi nen Jehova odino sulatan iray manangipalapag na sayan magasin. Say Disyembre 8 a paway na Awake! so mangililista met ed saray address na amin a pasen na kumbension ed Pilipinas.

[Picture Credit Line ed pahina 32]

T. Rosenthal/SUPERSTOCK