No Akin a Sika’y Nepeg ya Onatendi

SIKA so makaawat na apatiran makagungguna iran agew na espiritual a simbawa diad “Madibinon Panangibangat” a Distriton Kumbension. Diad Estados Unidos lambengat, masulok a 150 ed sarayan panduroypo so ginawa ed asasakbay na sayan taon. Inkalapagan, say programa so onggapo ed Huebes na 1:20 ed ngarem tan nasumpal ed Simba na 4:10 ed ngarem. Sakey a nipabitar ed arum a kumbension et saray report na saray misionero, a tinulongan pian makasempet ed dilin bansa ra lapud sayan maliket ya okasyon.

Balanglan sikayo so matatken odino tobonbalo​—asawan laki, asawan bii, ama, ina, katayatdang, odino ugaw—​sikayo so makaawat na bangat ya iparungtal ed malinew, makaingganyon paraan a mangungguna ed sikayo. Alimbawa, dakel so manetepet natan na, Anto so gagala na bilay? Diad kabuasan na Biernes, panggayagaan yo so idengel ed sayan tepet a nasingbat tan manliket ed naawat yo diad panulong ed arum a natalosan so tema.

Diad ngarem na Biernes et iparungtal na programa iray partin “Panggawa ed Panamaley a Magnayon a Pankasakey,” “Manggunaet Para’d Kilalaban na Sankaabungan Yo,” tan “Atateng​—Kaukolan na Saray Anak Yo so Nikaduman Imano.” Kasumpal a tuloy na saraya, niyapasakey so ispisipikon imano ed saray probleman kidudungetan na saray tobonbalo tan no panon dan pidenengan iratan. Sikaray nepeg a napaseseg ed modernon-agew a drama ya apauloan na Saray Tobonbalo a Mannononot ed Manamalsa ra Natan.

Diad Sabado et iparungtal na programa so propesiya nen Jesus ed kaunoran iran agew tan nagkalautla ed saray salita to: “Tampol kayari na kairapan ed saraman ya agew say banwa so ombilunget.” (Mateo 24:29, NW) Kaliktan yon narengelan so diskusyon nipaakar ed no kapigan so kagawa na satan a kairapan. Say programa ed Sabado so manrepaso met ed rekord na Tastasi nen Jehova ed modernon panaon tan ipaimano to no anto so agawaan da.

Diad Simba et sananey lamet a drama, apauloan na Agpatitilaan odino Ludlureyen so Dios, so mangipaarap ed angat diad Kristianon katooran na sakey lapud popular iran video tan musika natan. Iparungtal na publikon paliwawa ed ngarem so teman “Mabunigas a Panangibangat Para’d Maatap Iran Panaon.” Say programa so sampotan ed pasakbay a “Mansiansian Malet ed Madibinon Panangibangat.”

Maseguro, sikayo so nagunggunaan diad kiwala ed apatiran agew! Sikayo so ampetapetang ya iimbitaan ya onatendi. Pian naromog so pakagawaan a sankaasinggeran ed ayaman yo, ontupleg ed lokal a Kingdom Hall na Tastasi nen Jehova odino mansulat ed mangipapalapag ed sayan magasin.