Anto so Kabaliksan na Christmas ed Sika?

Panon mon ebatan? Say Christmas so (1) panaon pian nakaibay pamilyam; (2) panaon parad saray party; (3) panaon a panrelihyoso; (4) makapaaburidon panaon; (5) panaon a pannonot ed apalabas; (6) panaon na mabitabitar a panagkomersyo.

ANGGAMAN ompatnag a makapasurpresa, ed masulok a 1,000 totoon sinurbey ed Britanya, 6 lambengat a porsiento so mangipapasen ed Christmas a manunan relihyoson okasyon. Diad pidumaan, 48 porsiento so manisip a say Christmas so manunan panaon pian nakaiba so pamilya ra. On, dakel so mangikuan a satan so espesyal a panaon parad ugugaw. Bilang alimbawa, sakey a 11-taon ya ugaw a bii so inmebat sanen tinepetan no antoy labalabay to nipaakar ed Christmas: “Say pangayaga, panliket, [tan] paniiteray regalo.” Miabobon so The Making of the Modern Christmas a “say sankabiskegan iran panangidanet ed . . . ‘tradisyonal’ a Christmas so andi-duaruwa ed ayaman, ed pamilya tan nagkalautla’d ugugaw.”

Balet say Christmas so sakey a pam-pamilyan okasyon nagkalautla ed mamasagur a Kakristianoan, sano mandaragup so kakanayon pian mansasalatay regalo. Diad saray bansan baleg so impluensyay Eastern Orthodox Church, mas importanti parad sikaray Easter; siansia ni, say panaoy-Christmas so gendagendat a panaoy bakasyon.

Sakey a “Panangipakurang na Komersyo”

Say Christmas so “ondadalan ed sakey a proseson sankapatnagan . . . a panagkomersyo,” kuan na The New Encyclopœdia Britannica. Anggapo la angankoy pasen a nagkalautlan tua iya nen say diad Hapon.

“Saray Hapon so angitalirak ed amin a pankuan-kuanan a sikaray relihyoso tan impagmaliw day Christmas a sigpot a panangipakurang na komersyo,” kuan na Daily Record na Washington. Inyarum to ni a say Christmas ed Hapon so “baleg a selebrasyon a napnapnoy komersyalismo tan walaay daiset a relihyoson aspekto.”

Anggan diad dakel a mankuan a Kristianon bansa, sayan “relihyoson aspekto” so mabetbet a mairap a nalikas. Ngalngali 40 taon ed apalabas, onia so intagleey na sakey a pulyeton sumpad Christmas: “Say Christmas so idadalangirang na komersyon mundo. Saya so sankabalgan a panagpawalay-kuarta a panaon na taon. Iilaloan na saray mankuan a Kristianon negosyante so panaoy Christmas, aliwan nisesengeg ed Kristo, noagta nisesengeg ed pakatoboan da.” Agaylan tua irayan balikas natan! Diad dakel a daldalin, naynay tayon makarengel na saray panonot no pigara nin agew so natitilak pian manaliw na saray regalo parad ontumbok a Christmas anggan sakbay ni na isabi taloran kaunoran a bulan na taon. Mas maples so negosyo legan a mansamposampot so taon, a say kakapat a kabiangay tinaon a lako na saray lakoan so manlalapud panaoy-Christmas.

Antokaman so kabaliksan na Christmas ed sika natan, nayarin manumameng kan tuloy no panon so inggapo to. Diad tua et kasin susuportaay Biblia so panangiter na regalo no Christmas? Kasin saray selebrasyon na Christmas so peteg a makakristiano? Nengnengen tayo.