Maseseg a Papastolan na “Langkap a Lalaki” so Pulok na Dios
1 Agaylan maaron probisyon so itatarya nen Jehova panamegley na Anak to diad pangitatarya toy “langkap a lalaki”! (Efe. 4:8, 11, 12, NW) Sikaray walaan na dakel a responsabilidad, laktip lay aktibo tan maseseg a panagpastol ed pulok na Dios. (1 Ped. 5:2, 3) Amin tayo so nagunggonaan manlapud sayan kakkaukolan a probisyon. Sarayan lalaki so interesadon maong ed espiritual a pankaabigan na amin, balanglan arum so makakaabet na saray kairapan, balo nin mililimog ed kongregasyon, walaan na pigaran kakapuyan, odino sinmuawi.—Fil. 2:4; 1 Tes. 5:12-14.
2 Sano saray makapakebbiew a nagagawa ed mundo so pansengegan na katatakot, sarayan managpastol so mamapaneknek ed sikara a “singa amotan na dagem, tan sakey a siroman ed bagyo.” No naiirapan odino nabebelatan itayo tan mankaukolan na ligliwa, wadtan iran mamabiskeg ed sikatayo. Diad ontan iran kipapasen, sikaray singa “agus na saray danum ed pasen ya amaga” odino “singa anino na sakey a baleg a batondampay ed sakey a dalin ya apagaan.”—Isa. 32:2.
3 Pasesegen so Inaktibo: Panggugunaetan a tuloy na mamatakken a pasesegen iraman so nagmaliw ya iregular odino inaktibo, a tutulongan iran makapibiang lamet a regular ed amin ya aktibidad na kongregasyon. Say maaron panagpastol ya idadalaw so akatulong ed dakel pian regular ya onatendi ed saray miting na kongregasyon tan napabiskeg ed espiritual anggad punton mibiang ira lamet ed lawak na ministeryo. Amin na saratan a sagpot ed biang na mamatakken so pakapatnagan na maaron panangiyansakit nen Jehova tan say aktibon panangidaulo nen Jesu-Kristo. Sikatoy angiletneg na pangaligan ed pangipanengneng na kapagaan ed siopaman ed karnero to a nayarin nisuawi odino abalang.—Mat. 18:12-14; Juan 10:16, 27-29.
4 Saray katulongan a pastol so mangiimano ed saray pakapatnagan sano walaray nayarin onleletey ed espiritual. Siopaman a mangipatnag na pakadidismaya, magmamaliw ya iregular ed pipiaral, odino ontatayam ed lawak na serbisyo so nayarin mankaukolan na espiritual a tulong. Magunaet iray mamatakken ya ontulong ed siopaman ya onggagapon mangipapatnag na minumundon panagkawes tan panag-ayos odino siopaman a makababayubo na mapasang ya awawey ed kongregasyon. Tekep na masimoon ya interes tan matamoy a panangaro, saray mapagan manangasikaso so mabulos a ‘manginabang na dilin kakamarerwa ra’ diad sagpot a napaelet lamet so panangaro ra ed si Jehova.—1 Tes. 2:8.
5 Diad apalabas, pigaran dedikadon Kristiano so agla mililimog ed kongregasyon, nagmaliw ya inaktibo ed espiritual lapud sikaray tinalonaan na saray problema ed bunigas, saray kairapan ed ekonomya, odino saray desdes ed pamilya. Saray mamatatken so aliwan mapasang noagta mapangasin mangiiter na panamaseguro ya aasikasoen nen Jehova so amin a karnero to tan tulongan to ira diad mairap iran panaon. (Sal. 55:22; 1 Ped. 5:7) Saray alerton managpastol na pulok so makatulong ed sikara a makamoria a no sikaray ‘onasingger ed Dios, sikatoy onasingger ed sikara,’ a mangiter na ligliwa tan pakarepreskoan.—Sant. 4:8; Sal. 23:3, 4.
6 Pablien so Maletey: Saray maaron katulongan a pastol so mapaga met ed saraman so nayarin nibabaliwala. Pigara ed saray mililimog ed kada kongregasyon et saray agmakayari, a wala ed saray panagkomponian (nursing home), odino agla makayari. Natalosan a limitado lay pibibiang da ed panangiyabawag na mensahe na Panarian lapud saray sirkumstansya ra. Nayarin say pankanawnawa da labat a manpulong et diad saray ombibisita, arum a pasyente, odino diad saray managkomponi. Anggaman kuan, antokaman so nasarag dan gawaen et momoriaen bilang makanan suporta ed interamentin panagpulong a kimey. (Mat. 25:15) Anggano sikaray makapanpulong labat na 15 minuto, nepeg iyan ireport, tan itultuloy iran ipilaktip bilang regular a manangipalapag na Panarian.
7 Saray “langkap a lalaki” so nagkalalo lan mapaga ed saray espiritual a pankaukolan na agagi ra ed sayan panaon na Memoryal. Agaylan matukoy a panaon parad mamatakken so panggawa na nikaduman sagpot pian tulongan so amin a sinmuawi pian naeksperiensya lamet so gayaga tan kareenan na nonot bilang resulta na maligsan pililimog ed kongregasyon! Manliket itayo sano nanengneng tayo iratan a “kaamong [tayo ed] pananisia” a presente diad saray miting ed kongregasyon tan ompapaway ed ministeryo, a mamepekder lamet ed pananisia ra ed dondon bagat.—Gal. 6:10; Luc. 15:4-7; Juan 10:11, 14.