Ipasal Iray Anak Yon Magmaliw a Ministro
1. Unong ed Salmo 148:12, 13, antoy nepeg a gawaen na saray Kristianon atateng?
1 Iimbitaan nen Jehova iray kalangweran a mangidayew ed sikato. (Sal. 148:12, 13) Kanian, aglabat ibabangat na saray Kristianon atateng iray anak da ed katuaan na Biblia tan saray ganggan na Dios nipaakar ed moral, noagta ipapasal da met ira a magmaliw a ministro na maong a balita. Panon iyan nagawaan a tuloy-tuloy?
2. Anto so epekto na maabig ya ehemplo na ateng ed ananak to?
2 Maabig ya Ehemplo: Inkuan nen Ukom a Gideon ed saray 300 a sundalo to: “Onnengneng kayo ed siak, tan gawaen yo so onia.” (Uko. 7:17) Onnenengneng tan aaligen na ananak iray atateng da. Walay sakey ya ama a mantratrabaho ed labi, balet imbes ya onugip kasabi to’d abung ed Sabadoy kabuasan, itagar to ray anak to a manpulong anggano naknaksawan. Lapud satan et nibabangat to ran mangiyuna ed ministeryo. (Mat. 6:33) Kasin naoobserbaan na ananak yo so liket yon mibibiang ed nanduruman nengneng na panagdayew, a singa say panagpikasi, panagbasa na Biblia, panagkomento, tan panagpulong? Siempre, agkayo magmaliw ya perpekton ehemplo. Balet mas mainomay ya onkiwas iray anak yo ed panggugunaet yon ibangat ira a mandayew ed si Jehova no nanenengneng day seet yon manlilingkor ed sikato.—Deu. 6:6, 7; Roma 2:21, 22.
3. Nepeg a tulongan na atateng iray anak da a manggawa tan mangapet na antoran tuloy-tuloy ya espiritual a kalat?
3 Tuloy-tuloy Iran Kalat: Makulikulin ipapasal na atateng iray anak da ya onakar, mansalita, manpales, tan arum nira. Legan ya ombabaleg ira, walaray balon kalat a niiiyan ed arap da. No Kristiano iray atateng, tulongan da met iray ananak da a manggawa tan mangapet ed espiritual iran kalat depende ed edad tan abilidad da. (1 Cor. 9:26) Kasin ibabangat yo ray ananak yo a mankomento ed dili ran salita tan iparaan dan dili so asainmin da ed Teokratikon Eskuelaan Parad Ministeryo? (Sal. 35:18) Kasin ipapasal yo iran mibiang ed nanduruman nengneng na ministeryo? Kasin papasesegen yo ira a magmaliw a kalat day pampabautismo tan full-time a serbisyo? Kasin tutulongan yo ran milimog ed saray maliket tan maseseg a manangipalapag a mamaseseg ed sikara?—Uli. 13:20.
4. Panon a nagunggonaan iray anak lapud pangipapasal na atateng da ed ministeryo manlapud kaugawan da?
4 Inkuan na salmista: “O Dios, sika imbabangat moak a nanlapu ed inkaugaw ko; tan angga ed natan ipaamtak so saray pankelawan a kimey mo.” (Sal. 71:17) Igapon ipasal iray anak yo a magmaliw a ministro manlapud kaugawan da. Seguradon makagunggona ed sikara anggad ibaleg da so espiritual a pundasyon ya inletneg da diad tulong yo!—Uli. 22:6.