EBAT ED SARAY TEPET ED BIBLIA

Akin et mairap ya niwalay kareenan ed mundo?

Nabasad Biblia so duaran manunan rason. Unona, anggano wala ray maabig ya agawaan na totoo, ag-ira pinalsan walaay abilidad ya igiyay sarili da. Komadua, aliwan marakep so nansumpalan na saray plano na totoo lapud “say interon mundo et walad pakayari na samay sakey a mauges,” si Satanas a Diablo. Kanian anggan antoy gawaen da, agda sarag ya napawalay kareenan ed mundo.—Basaen so Jeremias 10:23; 1 Juan 5:19.

Sakey ni, baleg met so epekto na pansarilin interes tan ambisyon na totoo. Say gobierno labat ya makapangibangat ed saray sakop ton mangarod maong tan mangiyansakit ed sakey tan sakey so makapawalay kareenan ed mundo.—Basaen so Isaias 32:17; 48:18, 22.

Siopay panlapuan na kareenan ed mundo?

Insipan na Makapanyarin Amin a Dios a sikatoy mangiletneg na saksakey a gobiernon manuley ed interon dalin. Salatan na satan iray gobierno na totoo. (Daniel 2:44) Say Anak na Dios, si Jesus, so manuley bilang Prinsipe na Kareenan. Ekalen toy kaugsan ed interon mundo tan ibangat toy kareenan ed totoo.—Basaen so Isaias 9:6, 7; 11:4, 9.

Natan ni labat, diad panangidaulo nen Jesus, minilyon a totoo diad interon mundo so manguusar ed Salita na Dios, say Biblia, pian ibangat iray totoon mikareenan ed balang sakey. Asingger lan niwalay kareenan ed mundo.—Basaen so Isaias 2:3, 4; 54:13.

Parad kaaruman ya impormasyon, nengnengen so kapitulo 3 na libron Anto so Peteg ya Ibabangat na Biblia?, ya im-publish na Saray Tasi nen Jehova